ايمن..حبابك يا صديقي
وكتر خيرك على السؤال..
ولست متأكد من صحة المعلومة..ولكن..!
هي لمن ظهرت كموضة اول مرة كان اسمها (حلة فلاتة) لأن اغلب الصنايعية الكانوا بيصنعوها من اهلنا الفلاتة..وبرضك عندها اسم تاني (حلة تنقو تنقو)..
ولا يغيب عليك التشبيه بين شكل الحلة ورسومات عمك تنقو..!!..وفكرة تنقو تنقو من شكل الحلة العامل انتفاخ مختلف عن حلة البندر العادية..
ناس جريدة اليوم التالي عملوا تحقيق عنها وعن بقية ادوات المطبخ وكان التحقيق في سبتمبر2013 ، وبرضك في سبتمبر 2014 نفس الجريدة اتحدثت عن حلة تمبلباي ،
وكان عمل التحقيق صديقنا عبد الجليل سليمان في مدينة نيالا..ومن هناك اشار الى ان التسمية ترجع لرئيس تشاد الأسبق التربوي فرانسو تمبلباي..
اول مرة شفت الحلة في مدينة الدلنج في النصف الأول من الثمانينات..وكت داك اعمامنا الصناع كانوا بيشيلوا حق الصناعة فقط..وعندهم افران خاصة لصهر الألمونيوم ،
وكل زولة بتلملم الألمونيوم القديم وبتشيلوا وبيعيدوا صهرو وبينصعو منو حلة تمبلباي..!
من خصائصها انها بتسخن بسرعة ، والطباخة فيها بتكون سريعة ، في نفس الوكت بتحتفظ بحرارة الطعام لأطول فترة..
من الأساطير عنها ان الأكل فيها ما بتجيهو حكاية يحمض أو يبوظ..!
طبعا ألأسطورة كانت انو اهلنا الصانعين بيضيفوا روح (عرق او حجاب) عشان كده الحاجات بتكون محفوظة..!!!
ايضا من خصائصها انها متينة وبتعيش لفترة طويلة للغاية..
عبقرية الفكرة ، هي افران صهر الألمونيوم البدائية ، وفكرة الرسايكل واعادة انتاجو عبر توظيفو في حاجة مفيدة..!
طبعا اسم تمبلباي نادر ، وفي مناطقنا في كردفان (منطقة قليصة ، كان عايش فيها اخر ضابط في حركة اللواء الأبيض واسمو علي كباشي وكان عايش لغاية حقبة التمانينات)
كان يوجد شاعر طمباري اسمو تمبلباي (وثق ليهو صديقنا عضو المنبر احمد التجاني ماهل في احد محاضراتو التراثية ، وصديقنا معاوية وصديقنا محمد عبد الرحيم عيد)
وهو صاحب اغنية الصغيرون التي يغنيها الفنان عمر احساس وهي اغنية مشهورة..!
ياريت اكون اتوفقت في اضاءة مفيدة يا ايمن..!
ودمت
كبر
Kabar
فيس بوك
تويتر
انستقرام
يوتيوب
بنتيريست