[صور حصرية من دول الساحل]

Quote: الاخ الكريم صاحب البوست تشكر على هذه الصور لتنوير الناس بان حياة الشعوب في تلك الدول لا تختلف عندنا في السودان وخيش قصي شخص مشاتر وعديم الاحساس ليس لديه اكثر من يا زول انت البحومك في المناطق دي شنو؟ مع انه البيئة التي يعيش فيها بالجزيرة لا تختلف عن هذه المناطق بس هو بياكل عصيدة لينة ونية وبملاح لبن لكن زي العصيدة في الصورة دي لا شافها ولا بيعرفها . طبعا هذه الدول يشترك مع السودان في كثير جدا من العادات الغذائية من عصيدةوغيره وحتى الاسماك في تشاد نحمل نفس الاسم عندنا من بلبوط وكجيك وبلطي عكس الاثيوبيين تماما فهم لا يحبون او ياكلون الطعام السوداني الا اطرارا. اعجبتني كل الصور وخاصة صورة الشواء ونفس الطريقة ايضا تستخدم في غرب دارفور في الجنينة واسواق الضواحي . كان الوالد رحمة الله عليه يحدثنا كثيرا عن دارفور وخاصة الجنينة بلدنا الاصلي ولانه صاحب لوري وتاجر كان يعرف غرب السودان معرفة دقيقة جدا وكان يقول لنا اننا لا نعرف شراء اللحم بالكيلو اما ربع خروف او منصاص اي نص خرف كما في الصورة وحتى اليوم يباع اللحم بنفس الطريقة لكن لظروف الحرب دخلت عليهم عادة بيع اللحم بالكيلو في الفترة الصباحية فقط اما في الفترة المسائية فيباع بالربع والمنصاص. يوجد سوق بالجنينة يسمى سوق اللغاويس هذا السوق للشواء فقط يعني بي 15 جنيه لحم مشوي يشبع نفرين او تلاتة انفار وفي الضواحي ورك الخروف الكبير المشوي ب15 والصغير بي 10 جنيه نفس طريقة الشوي الموجودة في الصورة طبعا ده قبل ستة سنوات. طبعا العصيدة في الصورة دي بتاعة (دامركة) وطريقة تحضير الدامركة يتم بتخمير الدخن لمدة ثلاثة ايام ومن ثم تجفيفه ونزع القشرة الخارجية وطحنه وطبعا طحن المرحاكة بتخلي العصيدة متماسكة ولذيذة وفي دارفور تشتهر المسلاتيات والزغاويات والبرتاويات بعمل اجود انواع العصايد والتقليات. يوجد نوع اخر يسمى بملاح التمنجنقو وطرقه تحضيره كالاتي يتم سلق اللحم وتفه في الفندق ولا يتم تحمير البصل او اضافة الصلصة وتضاف اليه الويكة

محمد مهاجر من الفيسبوك

ياخي تشكر علي المعلومات الثرة في المداخلة. متعة والله ومتعك الله بالصحة والعافية.

أكاد أجزم أنه لاتوجد خلافات في الأنماط الحياتية والغذائية من الضفة الغربية للنيل الأبيض وحتى ضفاف نهر السنغال في غرب إفريقيا. مافي فرق بين الجنينية وقوز بيدة. شخصيا ما قاعد أحس بالغربة في هذه الدول أبدا.

وطالما عجبتك صورة الشواء نهديك صورة شية من نيامي العاصمة النيجرية.

عجبتنى تسمية سوق (اللغاويس) في الجنينة.

شكر ليك وللناجي ومحمد طاهر من الفيسبوك

https://www.0zz0.com

https://www.0zz0.com

https://www.0zz0.com