علي ..حبابك يا صديقي
والتحية لضيفات وضيوف هذا الخيط..
قرأت مداخلتك المسحوبة في بوست ول ابا صديقي الأستاذ الطيب رحمه قريمان..وهي كانت مداخلة غير موضوعية وفيها اسفاف وشخصنة للأشياء ونبذ في الفارغة..ولا علاقة لها البتة بموضوع الخيط المعني..وسلوك الطيب في مسح المداخلة خطأ بين للغاية ولم تكن هناك ضرورة للضيق والسنسرة والسحب..!
واقولها لك بكل صدق ياعلي اكثر من يسئ حرية التعبير في هذا المنبر هم الشيوعيين الذين يتكالبون بعقلية القطيع ، دون تبصر ، ويكتبون ما يشاؤن وليس همهم مقارعة الحجة بالحجة وانما كل همهم احداث الجلبة عبر التسفيه والقمع (مثلهم مثل الجبهة الإسلامية ، والإثنين عقليات شمولية ) ، ودونك ما يحدث في اخر بوست لحيدر قاسم..وغيره من البوستات..!!
في هذا الخيط استغربت للغاية لموقف اخونا وصديقنا دكتور عوض وموقف ابنتنا وصديقتنا دكتورة ياسمين (وضاحة)..و ان كان هذا هو موقفكم من حرية التعبير لماذا التباكي يا عوض على قولنا ان جهاز الأمن الوطني يعمل وفق القانون الساري في السودان وبصلاحيات محدودة؟ لماذا التباكي على الرقابة القبلية والبعدية (السنسرة الواحدة دي) التي يفعلها جهاز الأمن الوطني السوداني تجاه الصحف السودانية ؟.. الغريبة ، نفس الطيب قريمان الذي مسح مداخلة على دفع الله عنده رأي كنا نظنه موفق للغاية وقال يجب ان تزال الرقابة قبلية او بعدية وكل صحفي أو كاتب يحاسب بالقانون على أي اسفاف او اكذوبة ينشرها في حق الآخرين بلا حق.. ثم اخطأ ، الطيب ، بمسح مداخلات الباشبوزك الشيوعيين وهو يعلم ماذا يقصدون وماذا يفعلون.. سقط الطيب رحمه في الإمتحان..امتحان احتمال حرية التعبير..!!
كيف يا ياسمين ، تجوعرين الليل والنهار ضد نظام الجبهة الإسلامية ، وفي اول منعطف تمارسين الإسقاط والسقوط..؟.. البيمنع شنو يا ياسمين انو جهاز الأمن لمن يمارس رقابة قبلية أو بعدية علي الصحف ويحد من حرية التعبير ، انو بتحجج بنفس حججك الغريبة بتاعة تهذيب الناس وتأديبهم؟.. انتي جبهة اسلامية ولا شنو يا وضاحة؟..
واستغربت لموقف صديقنا كمال عباس الداير يسويها نص نص..!!..دي حرية تعبير يا عالم هوي ، يا نقبل بيها كلها (بكل ضعفها واخفاقاتها واسقاطاتها ) او نلغيها كلها غير ماسوف علينا..!!
طيلة تواجدي في هذا المنبر ، اتمسحت مداخلات قليلة في خيوط تخصني ، وهي مداخلات لدينق ولعربي يعقوب ، ومسحت دون تدخل مني او ارادتي ، وكانت بطلبات من اناس طيبون كانوا يظنون انهم يحموني ويحمون ظهري ، وطلب المسح من صديقنا بكري ابوبكر مباشرة ، والأغرب خيوطنا عن دينق وتراجي وبنية الوعي التناسلي برضك اتمسحت بطلبات الطيبون والطيبات الذين لا يحتملون حرية التعبير، وبالطبع غضب من مُسحت مداخلاتهم ولاموني وحملوني المسئولية ، لأ ايدي ولا كراعي ..وغضبت أنا ،عشان مسح هجايصهم دون ارادتي ، لأنني اؤمن تماما مهما اختلفت مع الناس ومهما ساموني العذاب والإسفاف بصورة غير موضوعية أو منطقية الإ اني اؤمن بحقهم في التعبير عن حاجاتهم حتى ولو كانت كلام خارم بارم ساكت..!
نعم يا علي دفع الله.. انا ضد الإستيكة في المنبر وفي الصحافة السودانية (بتاعة الرقابة القبلية والبعدية) وضد السنسرة في حرية التعبير والفكر والإعتقاد..!!!
كانت اجمل قيمة في هذا المنبر هي حرية التعبير المطلقة.. كل زول/ة يشوت زي ما عايز والمعيار هو الرأي العام الذي يملك من الذكاء التمييز بين الأشياء..!!
التحية لصاحبنا دينق (بيت الأشباح دينق اخوان ، بيت الأشباح نمبر 1)..وشايفو اليومين ديل قاعد يتزاوغ مننا.. ولو يا دينق جاك احساس ، مجرد احساس ساكت ، انو محمد النوركبر (طبعا دينق اكتر زول حافظ اسمي بطريقة اكتر مني أنا ذاتي..والله صحي..!!)..ممكن يمسح مداخلاتك أو يعمل سنسرة.. فانت غلطان..و تعال قول الرووب عشان نعتذر ليك..!!
علي بالحلال يا علي دفع الله ، يشيلوا الإستيكة ، الوهابي المتناقض سيف ابكر ما يقعد ضحوة في المنبر ده.. يجيكم زي النبي الكوشي بشاشا ، دقيقة والتانية يقول ليكم سيف ابكر كاسح ، تنفسوا الصعداء يا جلابه..!!
المنبر اداة تعليمية ، واكتر حتة ممكن تختبرفيها ممارسة حرية التعبير.. يجب ان تزال السنسرة ..عشان الشيوعيين والسلفين أول ناس ح تدق الدلجة زي الترتيب..والله صحي..!!
وليكن معيارنا هو الرأي العام السوداني ، وهو رأي ذكي للغاية رغم انف الحاقدين من شيوعيين وسلفين وداعشيين وكيزان ذاتو..!!
ودمتم..
كبر