السلام عليكم يا جماعه انا لاني استغدت كتير من الصفحه دي عشان كدا حبيت انقل ليكم تجربة حصلت لي امبارح في مطعم ستاربوكس في المشتل .... بصراحه تجربة صدمتني و خلتني اقرر اني نهائي ما امشي عليهم و حبيت احكيها عشان اتمنى انو ما في زول منكم يحصل ليهو نفس الموقف ...
الحصل انو امبارح زي الساعه تلاته مشيت عليهم و شايله لابتوبي عندي حاجات دايره اعملها قلت اطلب نسكافيه ولا تحليه و اعمل شغلي و كنت منتظرة زوجي يجي نقعد شويه ... المهم قعدت و طلبت و فتحت اللابتوب و بديت شغلي .. بس اول ما انتهيت من السينامون رول جاني زول الكاونتر قالي متاسف لكن ممنوع القرايه في المحل .. استغربتا قلت ليهو طيب كان تكلموني قبال ما اطلب و انتو شايفني شغاله في اللابتوب .. المهم ما اشتغلت بيهو و بعد شويه جات واحده تانيه من المحل و شايله الفاتورة في يدها و انا ما تميت لي نص ساعه .. قلت ليها القاليكي منو انا دايره الفاتورة ؟؟ قالت القراية ممنوعه و داا كلام المديرة .. قلت ليها طيب انا منتظرة زوجي جاي . قالت امشي انتظريهو بره !!!!!! قلت ليها بره كيف انا جيت و اخترت المحل الانا قاعده فيهو .. قامت نادت المديرة و جات المديرة بكل وقاحه والله با جماعه كانها بتطردني من بيتها ... قالت انتي ماسكه لينا محل و دي مواعيد غدا في حين انو في تلاته قروبات كانو قاعدين قبالي لمن جيت بس هم بيتونسو وانا فاتحه لابتوبي !!! المهم زعلت جدا و طلعت و جا زوجي و دخل اتكلم معاها بيتناقش قام جا ولد المديرة و بيتكلم و كمان داير يمد يدو ... والله يا جماعه كان تعامل بمنتهى السوء و عدم الاحترام و لي هسا انا ما فاهمه مشكلتهم شنو مع اللابتوب يعني كان ممكن اكون بتونس او قاعده في تلفوني و برضو ماسكه زمن .. المهم دي اخر مره امشي ليهم و حبيت اني اشاركم تجربتي ...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Abuzar Omer
فيس بوك
تويتر
انستقرام
يوتيوب
بنتيريست