ول ابا محمد النور kabar

كتب الطاهر الطاهر:

Quote: محمد النور kabar كاتب يتميز بثراء الموضوعات كماً ونوعاً ، تغوص في اعماق كتابته فتكتشف خلفيات مجتمعية وثقافية مختلفة.. يجيد فن اختيار موضوعات و شخصيات حية يعبر عن ذاتها بخطاب يناسبها ويحدد وعيها وموقعها في العالم .. في اعتقادي انه وصل مرحلة تلاشى الحدود بينه وبين عالمه الداخلي والخارجي حتى اصبح وعيه اولياً اي انه اصبح حراً غير مقيد لابجسمه ولا بافكاره ..

الطاهر..حبابك يا صديقي

كتر خيرك على المطايبة والشهادة..

وسعيد بهذه الكلمات الطيبات والتي نبهتني لأشياء كنت متذكر بداية اشتراكي في المنبر..ولكن بالمعافرة المستمرة تناسينا الكثير منها..

لمن دخلنا كلية القانون بجامعة الخرطوم ..كانت استاذنا المرحوم بروفسور عبد السميع عمر بيدرسنا مادة اسمها (المدخل لعلوم القانون)..فكان بيقول لينا كلام عجيب ومدهش.. انو ناس القانون لازم يكونوا ملمين بأي معرفة حايمة عشان ما يحرجوا روحهم في التعامل مع الأشياء في الواقع.. هذه الفكرة هي التي نعمل عليها بان نحاول بقدر الإمكان الإلمام باشياء كثيرة قدر المستطاع.. عشان كده بعض من اهلنا بيستغربوا و يقول ليك كيف يعني عامل فيها ابو العريف وداير يتكلم في أي حاجة..و هم ناسين أنو الفكرة بسيطة تدريب على منهج مبسط للغاية ..!!

تركيزنا على بعض الثقافات والمجتمعات المنسية..حتى ده ناس الغرض الأيدولوجي قاعدين يفهوموه خطأ بان يحاولوا يحصروك في خانة الجهوية والقبلية وشنو كده ما عارف.. فات عليهم أنو الإنصاف يقتضي ان تمثل هذه الثقافات في المشهد العام بطريقة او باخرى..

كتر خيرك يا الطاهر..والحرية في عدم الإلتزام بخندق سياسي او تنظيمي معين بتدي الإنسان فرقة كويسة للتعبير عن ذاتو..وقد قالها احد الأصدقاء: انتو ياهو ذاتك بنفس طريقة في المنبر وفي الواقع..وكنت مندهش , حكي لي عن بعض التجارب انو الناس مرات في الكتابة بتمرق افضل ما عندها حتى لو ناقض سلوكها الواقعي..والبعض بيحاول يعمل فيها بتاع شر ولكن في الواقع مسالم..

كتر خيرك يا صاحب..و ربنا يقدرنا نكون عند حسن الظن باستمرار..

كبر