قال والله زمان..! ثم ، قال مشتاقين قال..!! الشوك اليقوم ليك مسكيت في دقنوسك ، ويسور مصنع نديم للصابون..!
ممكن نهدي؟
المنبر زمان يا عمك ، كان فيهو واحد اسمو هارون دياب ، هجست بيهو الهواجس ، وقام جاب واحدة اسمها زينة افتيموس..بتغني لسيدنا ابراهيم الكاشف (عليهو السلام).. فكان كشف جديد فيهو الإبداع والإبتكار..!!
ممكن نهدي يا عمك؟
لمن قريت رواية ابكر ادم اسماعيل (الضفة الأخرى) لأول مرة قبال ينشرها ، شديت ليهو سلك عاتي ، وقلت ليهو: شن جاب الرعاوية للدويم شات والركوب عجلات (ودي الصفة المحببة التي يطلقها صديقنا ول ابا الناضر هشام هباني عنها)؟ ضحك ابكر ، وقتها ، وقال لي ابيت ما احا اوريك كيف عرفت الدويم..!
ثم تحية لصديقنا الجميل عبد الكريم رجب سعيد ، اجمل سوداني يتحدث لغة الدينكا بطلاقة لمن يشهيك تبقى دينكاوي ذاتو..!
سلامات لروتو السمحات بنوتو..ودويم عبد الله كرشينقا ، دويم ابكر باتا ، دويم امين الريس ، دويم الوطن ، الأشبال ، الثوار ، الهلال ، الشاطي ، دويم باكمبا ، دويم التوحيد و رمبيك ومصانع نديم..
ومن عجب ما كان فيها فريق مريخ (لها الياسمين ، وللحاقدين الرماد)..!!
ولمن كانت شعوب امسودان بتسال روحها : ابوكم مين ؟..و بتجاوب روحها : نميري..!..نحن كان هتافنا: النيل النيل ، ابونا خليل..!!
خليل ده منو؟..ناس الدويم يجاوبوا..!!
ثم كان المنبر مبهور بانو عيال وبنات بن اسرائيل ، غنوا (القمر بيضوي ، انا شن بلاني بالنجوم)..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة