كستاوي..حبابك يا صديق كتر خيرك على المرور واضافات بعض المواد هنا.. شكلك يا صديقي البرداية والجيلد بتاع اليومين الفاتن ديلك نساك حاجات كتيرة..
الرقص متشابه ومتقارب شديد ، ولو راجعت رقصة المردوم (القائم عليها الريتم الأساسي بتاع المقطوعة ) بتلاحظ نفس التفاصيل..وهي الإشتغال بالتعبير الجسدي باستخدام الجزء الأعلا من الخصر ، وهو معاكس لأهلنا ناس الكنغو والكاميرون وانجولا (ديلك ناس فريق تحت). برضك لو اتفرجت في رقص الشبان الحبش ، حتلاحظ صوت الشباب الذي يشبه الكرير..وهو نفس الطريقة الموجودة في المردوم..ونادر ما تلاقي ليك راقصين مردوم اولاد من غير ما يصدروا اصوات من الصدور..والشغلانة دي مهمة في التنفس عشان ترقص لأطول فترة ممكنة (طبعا رقصة المردوم شاقة واشبه بانك تلعب مباراة باكست بول)..
المفارقة ، البنات ، سواءا في اثيوبيا أو في كردفان ، نهائي ما بتصدر منهن اصوات..خصوصا الراقصات..والواحدة ممكن ترقص لأطول فترة ممكنة..بتنفسن كيف ؟..ده سر المهنة..!
برضك الأولاد ، في كردفان ، بيحفظوا التوازن بمد الأيادي في شكل اجنحة معقوفة..وبنسمي الحركة دي(رقصة ام جناح)...اهلنا الحبش بتلقى الأولاد بخطو ايديهنم في الخصر..ووبيعملوا التشكيلات وهم واقفين (استاتيك) ، في حين رقصة المردوم الأولاد بيكونوا متحركين (ديناميك)..شفت البهجة دي كيف؟..
يعني بالرغم من التشابه الكبير ، الإ ان رقصة المردوم بتقوم على الحركة المستمرة.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة