سودانيون هاجروا من زمان بعيد من السودان..

Quote: العجبني في الموضوع ربط المتحدث للـ happy ending بكرم السودانيينعطلة نهاية الأسبوع الماضي قضيتها مع ثلة طيبة من أعيان سودانيي صلالة... حكى أحدهم قصة مشوّقة عن عم له أسماه "عم عابدين"... محور القصة كان عن الكرم.. ولعله بدأها بـ "أصلو الكريم دة ما بيضام" .. أستوقفني فيها بجانب ذلك مسألة التسيير العجيبة و"قرآءة الأيام" المعينة على الشكر..يحكي فيقول – بتصرّف –الموضوع بدا بكبريتة... الكلام دة في التلاتينات أظنو.. عم عابدين دة وشباب كتار زيو مشو الحبشة وعملو قروش هناك.. عم عابدين كان مشهور عنو لما يجي المطاعم بيدفع للسودانيين الموجودين كلهم.. يوم أكلو ودايرين يدخنو، طلع ما عندهم كبريتة.. أها الكبريتة دي الموضوع كلو.. هنااااك في طربيزة سودانيين، عم عابدين مشى استلف منهم كبريتة.. ولعوا ..... شال الكبريتة رجعها.. الجماعة قالو ليهو: لا!! حرّم ما ممكن ترجع.. رجع بي كبريتو لناسو... أها.... بعد فترة أهل الكبريتة قامو مارقين دايرين يحاسبو الجرسون قال ليهم الحساب مدفوع.. عروفوهو دة زولم زول الكبريتة.. شكروهو واتخارجو... زماااان مرّ وعمنا عابدين قرر يرجع السودان .. في القضارف قريشاتو دخلن في سمسم... آخر الموسم "الكعوك" لهط السمسم.. عمنا بقى أباطو والنجم.. من مزرعتو كداري لي القضارف .. لما وصل محطة السكة حديد الفيهو كملت.. فتر تب!! عربية قطر فاتحة ومقابلة الهمبريب تووووشك دخل وراح في ستين نومة ... وكتين صحا ... القطر جق جق جق مرق في أم صفقن عراض... شويتين الباب دق .. الكمساري: تذكرتك ياخينا.. تذكرتي عند أخوي أخد ليهو مرقة لف وتعال.. قال عم عابدين أصلو لامن الكمساري يجي راجع تاني بكون وصلت أي محطة بنزل فيها واقبل على قضروف ود سعد تاني... جق جق جق ... تاني دق دق باب القمرة دق.. مرق لقاهو الجرسون بتاع السنطور وصينية مليانة كسكليتات و حاجات بالشكل بالنوع دة وقزازتين نبيت .. عم عابدين لذيذ يقول ليك للنبيذ نبيت ... يازول مافي زول طلب أكل.. لا الأكل دة في زول طلبو وبجيهو هنا ... شويتين الباب تاني دق... الكمساري ذاتو.. أها أخوك جا؟! لا!! لسع.. ياخوي، الكمساري دافر الباب وداخل، أخو وااااحد عندك بجي مافي...كدي في أكل جابوهو هنا؟ ..... آآآآي!! ... وهّط الصينية بيناتنا وبفففففف فتح ليك النبيت..... أظنك ما عرفتني؟!.. ما عرفتك والله يا اللخو!! من وين في الأهل؟ ... أهل شنو؟ تتذكر الكبريتة؟؟!! أووووه!! أووووه!!مزمزوا عضام ديك وضربو نبيتم وعمك عابدين بدأ ليهو من الكبريتة نامن وصلو الكعوك وركبتو في قطر الجن دة والمحطة الجاية بنزل اقبل على "سلامة البيه".. يا زول سلامة بيه شنو؟! ..... وكتين وصلت لي هنا، فركة كعب وننزل بورتسودان شوف هناك يمكن الله كاتب ليك فيها رزق.. قلت كدة؟! خير وزين ... كو كو كو.. مشى لزول بعرفو من زمان جهة ابوحشيش دي .. أنا مدردح وعندي رخصة سواقة عامة شوف لي شغل ... بكرة الله يفتح.. الأدروبات داخلين ومارقين بالجبنة .. عمنا عابدين قال يشوف ليك زول بي عقالو جا دخل على سيد المحل .. حق الله بق الله .. عندنا مشروع في جدة ودايرين لينا بنايين وطلب.. مر علينا بكرة.. مرقتو كدي العربي فت دخلت على زولي وقلت ليهو أكتبني أول واحد.. يا زول؟؟!! ات شن عرفك بالبنيان؟! ... ... عرفة شنو؟ كمان شيل قدح المونة دي بغلب ليهو ود مقنّعة.. يا زول أكتبني ... يومين تلاتة البابور صبحتنا في جدة ... لقوني ليك مدردح وبعرف أكتب وأقرأ بقيت رئيس الأدروبات كلهم أكتب أوفرتاينن وحاجاتهم كلها وأمش الكلوب أجيب ليهم الميز و.. و...... أها يا سيدي اللمنت عليك لامن جابو بولمان بقوني سواق كمان ودة بي حقو ودة بي حقو.... وحاتك شوية شوية بقيت كمندة وشوية شوية بقى عندي شغلي براااي وفتحت معاي ... دي ما كانت كبريتة دي... أها وحاتك وكتين درت العرس الجماعة رشحو لي تكرونية بت حلال بي تابعيتها ... الدنيا مشت تديني بالقلاب وتقبل تدي غيري بالكوريق وتاني تصد تجي تديني بالقلاب... قال محدثي: وحاتك قعد مع تكرونيتو ديك ما شاء الله له أن يقعد.. ماتت ورثها وأمورو حرقت تش... واحاتك أنا القدامك دة سنة 79 في الخرتوم دي شفتو جا بعد ما بقا شاااايب ... كركب خلاااس ... رسلنا جنب تلاجات الموز الجنب لوكاندة الليدو ديك قال عندو تحويلة جاية من جدة نجيبها ليهو... مرقنا .. قال تعالو تعالو شيلو شنطة.. شنطة شنو يا عم عابدين؟؟!! آآآي شنطة ... شلناها ستفوها لينا قروش رزم رزم شي ابو خمسة وشي ابوعشرة وشي ابوجنيه واحد... عم عابدين خت الشنطة تحت سريرو قريب الحيطة ... البدخل عليهو كلو من أهلو شي حفصة وشي مالك وشي مسكة داخلين ومارقين وعمك عابدين يدخل ايدو ويخمش أنت وحظك وأحدين مرقو بأبو عشرة وواحدين بابو وأحد جاتك نيلة دة حظك كدة... شيل شيل أمش....الله يرحمو عم عابدين ... بعد زمن من جيتي صلالة دي سمعت قالو مات.... ياها الدنيا..... الله يرحمو

(عدل بواسطة عبدالله عثمان on 12-24-2015, 08:23 AM)