دُرر من واتسابي

Quote: (ياخ معقولة)!! ***************** ياسيدي كلامك على راسي قبّال ما أعرفو زاتو شنو وطلباتك كلها مقبولة وأنا فرحانة ومبسوطة شديد زي فرحة طفلة ف سنة أولى زارون في بيتون زول طيّب جاب ليها حلاوة ومصاصة وقال ديل للبت العسّولة!! أو فرحة زول عاجز يائس جاو هاتف خير قال ليهو قضيتك محلولة أو فرحة زول مستني حبيب طيارتو خلاص حان وصولا أو فرحة زول دايماً كومبارس وفجأة كده ادوهو بطولة (ياخ معقولة)!! أنا من الفرحة دي عاوزة أطير بس ساكت بعمل ممهولة شان أنا لمن افرح ما بعرف عن أفعالي أكون مسئولة وأنا لو ما عاملة حساب الناس كان اتنططت ف راس البيت وقلبت الدنيا دي بي طولا بس أنا بفرح بي كلماتي وقدّام الناس زولة خجولة (ياخ معقولة)!! الحب ده شنو؟ العارف يقول لي يا عالم دي حكاية عجيبة ومجهولة!! حاجة بتملاك كده حنّيّة وتفتح ليك سككاً مقفولة تديك احساس كده بالطيران لو حتى رجولك مشلولة تديك احساس كده بالهيمان والناس من حولك مشغولة تديك احساس كده بالدهشة وتخليك روحك مزهولة ياخ أنا ما بعرف اوصّف كيف البعرف حاجة يجي يقولا! ما تلوموني مالقيت تعبير غير اني أقول (ياخ معقولة)!! لـ سلمي الحسن ـــــــــــــــــــــــــ Read more: http://www.blue-nil.net/vb/showthread.php؟t=67414#ixzz40M0EKUkG[/QUOTEhttp://www.blue-nil.net/vb/showthread.php؟t=67414#ixzz40M0EKUkG[/QUOTE]