المهدية لم تكن ثورة وإنما كانت إستبدال ظالم أجنبي بظالم وطني

Quote: يخيل لي أن عبد الله عارف نفسه بعمل في شنو بيحطم الإيقونات كما يقول الفرنجة أي بيكسر في المقدسات وحكاية إنه عارف دي حاجة كويسة عشان النفس ما يقوم وتحصل المشاكل والمنابذ أول المقدسات هي "الثورة" وفي سوداننا هي مقدسة لناس اليمين ولناس اليسار وللناس اللا في اليمين ولا في اليسار وتاني المقدسات هي "الثورة الوطنية التي طردت المستعمر " فعشان نفكر بعقل مش بعواطف هل أي ثورة قامت في تاريخ البشرية كانت "نتائجها" إيجابية؟؟؟ (مع تمام علمنا ان معظم الثورات بتقوم ضد الظلم أين كان مصدره) بمعني آخر لو سألنا سؤال مبتدر البوست إذا الثورة إستبدلت ظالم أجنبي بظالم وطني فدي حاجة كويسة ويجب أن نبتهج ليها؟؟؟ (أو علي الأقل يخليها فوق النقد وما في زول يتكلم عنها ولا في زول يتعلم من تجاربها؟؟؟؟) يعني لو الجهادية بتاعين المهدي بيضربوا ليهم في سوداني نقول للسوداني إنت زعلان مالك وبتكورك ما البضربوا فيك ديل سودانيين زيك ومسلمين وأنصار كمان؟؟؟؟؟ حكاية الإستقلال من المستعمر الاجنبي بالجد دايرة إعادة نظر وأنا لحدي هسع ما لقيت زول يقنعني أنه الانجليز البنو لينا بلد كانت مشتعلة حروبات محلية ومع الجيران في مصر وإثيوبيا وفتن قبلية الإنجليز الإنتقلوا بينا نقلة أقل ما يقال عنها أنها حضارية السفر بدل الجمال والمراكب بقي قطر وطيارات وعربات وبصات وبواخر التعليم من الخلاوي بقي في المدارس والجامعات وما بعد الجامعات في الداخل وفي الخارج والعلاج من فقير وبصير إلي مستشفيات من أصغر شفخانة في أي قرية ومستشفي أي مدينة إلي العلاج بالخارج وغير الاطباء والإخصائيين ومحضري العملية بقي عندنا ملاحظين ومفتشين صحة وتطعيم للأطفال بدلا من نار الحطب بقعت عندنا كهرباء وبدلا من نشل البير بقت عندنا مواسير في البيوت وبدلا من الحراتة بالطورية والحش بالمنجل بقي عندنا تراكتر ودقاقة وبدلا من السقي بالساقية والشادوف بقي عندنا الطلمبة جاز وكهرباء بقت عندنا مشاريع كبيرة زي الجزيرة وبقي عندنا بوستة وتلغراف وتلفونات وبدلا من المغازل والمناسج اليدوية بقي عندنا مصانع الغزل والنسيج الغني من الرق والطار بقي فيه كمان وأورغن وحاجات تانية أساميها ما بنعرفها ما لقيت زول يقول لي إنه المستعمرين الإنجليز ديل الكانوا السبب في كل هذا "التمدن" كعبين أجانب وكمان كفار وناسنا الوطنيين الخربوا كل هذ المعمر هؤلاء الوطنيين والمسلمين الذي عذبوا الناس حتي الموت في بيوت الأشباح وما زالوا يفعلون هؤلاء الوطنيين المسلمين الذين شردونا في بلاد الكفر هذه..... هم الكويسين مما ذكرني بنكتة "الكافرة أمك دي" والتي أظن أن كل الناس قد سمعت بها