في المنصورة؛ كانت لنا ذكريات!!! توجد صور

Quote: الجمعة 27/12/1987 ( عبد الرحمن ابراهيم مسعود ) ود العمدة (اداب المنصورة – 91) مدخل لكل انسان في حياته سنوات ومحطات لدي احساس بأن سنوات المنصورة الاربع من انضر و اجمل مراحل عمري؛ بالرغم من كل الصعاب تآخينا تعارفنا وتشاركنا في الحلو والمر مع ان حياة الطلب من غير معاناة تصبح رتيبة ، فالتحية لكل المنصورين الذين سبقونا لذلكم الصرح العظيم من اول خريج حتى اخر برلوم تخرج فالعافية للجميع والرحمة للذين ذهبوا للقاء ربهم اللهم اكرم نزلهم ووسع مدخلهم اجعل الله البركة في الخلف . في الجمعة 27/12/1987 م كان زواج احدى اخواتي والعالم ملمومة والدلوكة تقول وا ناري و العجاج حدوا السماء جانا الخبر قالوا ود العمدة قبلوا في الجامعة والعصرية بدأت ....... بتول بت بله بصوتها الطروب تغنى بسد الساحة وبشيل مفتاح وديك يا الباوقة اللذيذ تفاحا وتعمل كسرة التاية بت أمين مشيت للعمدة وقال لي ما بمضى قسيم الريد الحماني الغمدة وفجاه من وسط الدارة مرقت بت اب ضلعا حديد وزعردت علي الطلاق لما تزعرد في ما شيء ناقص الا الموت الاحمر من هناك جاءت تقدل الكريم عطانا (ام ناصر) قالت هيييييييييييي يا نسوان ود العمدة دخل الجامعة في اللحظة طلع عمي عباس الجعلي كان عندو سلاح ج 3 محلي الصنع دق الجفرات (الجفرات الكواهلة - قرية جنوب شرق مصنع كنانة لديهم ورشة لتصنيع السلاح الكيري ) عبأ الخزنة والنار ولعت و تسمع جوووووو دوووو دوووو في الصباح الباكر الوالد قالي تمشي الخرطوم تجهز للسفرك دخل المخزن وطلع من الشنطة رزمة اعطاني منها 900 جنية والعريس (احمد الطاهر نورالهادي- الله يجزيه خير ) اعطاني ورقة 100 دولار. ورقة المائة دولار سلمت امانة ل عمتي العافية قالت لي الورقة الدبساء دي شني قلت ليها دا دولار يا ام احمد قالت شنو الدولار تنطقها نطق غريب ما سمعت بأمريكا لكن بتعرف ريغان عشان سنة مجاعة 84 قطعوا في غنوا عشان جاب الاغاثة ومنها عيش ريغان - ريغان ود والسرور اللمانا في القندول قلت ليها دي قروش ناس ريغان قالت والله جعيصين شوفا كيفن سمحة كانت بتساوي 800 جنية شوف ناس الانقاذ لما جوا قالوا لو ما نحن جينا كان الدولار حصل 20 جنية !!! وسافرت يوم 28/12/1988 الي المناقل قابلت احد الزملاء اخبرني بأن اذاعة الطلاب اليوم دخلت لي مطعم صفاء كردفان لصاحبه محمد احمد الكرفاني ( ابو الحارث ) قلت ليه عمي ابو الحارث اليوم بذيعوا طلبة الجامعة لو سمحت اقفل المسجل وشغل الراديو وفتح المسجل وبدأ المذيع وإلا تسمع :- اليكم اسماء الطلاب المرشحون للقبول بكلية الآداب جامعة المنصورة :- 1-عبد الرحمن ابراهيم مسعود 2- عماد الدين حسن سيد احمد 3- الطاهر علي الطاهر 4 - محمد مجاهد هارون 5 - محمد البشير جويدة 6 - الهام عثمان احمد بدوي 7 - فاطمة محمد احمد 8 - صلاح محمد احمد محمد شكيرة 9 -غادة حسن - في نفس العام حولت الي جامعة القاهرة بدأت الإجراءات بالعلاقات الثقافية اول طالب قابلته كان (محمد احمد البكري) العذيبة ريفي رفاعة (علوم المنصورة). استخرجت بطاقة وادي النيل من الخرطوم بحري لعدم اكتمال اوراق الخدمة الإلزامية . تقابلنا مجموعة من البرالمة 03 يناير 1988 م وكوننا لجنة لزوادة الرحلة كان نصيب الفرد 5 جنية (طحنية ومربى وعيش). حوالي 80 طالب برلوم و Seniors Repeaters كانت تذكرة القطر 23 جنية والباخرة 89 جنية. يوم 9 يناير 1988 الاحد كان الميعاد السابعة صباحا في محطة الخرطوم كانت في هرج ومرج ظهر عسكري المحطة وقال بنادي علي المسافرين بالورقة الخاصة باللجنة بدأن 1 ثم 2 بعد الصعود اول مره اشوف القطر من جوه كنب الدرجة الثالثة حار وقوي زي ارضية الهوستن كان في معنا في نفس السفرية المرحوم محمد البشرى محمد خير ( الابيض) (هندسة المنصورة) توفى في 02/02/1992 لم يكمل دراسة الهندسة جمد الدراسة وسافر الي السعودية واكرمه الله بحفظ كتابه الله في الحرم المكي ثم انتسب لجامعة القرآن الكريم قسم القراءات عليه رحمة الله . ثم المرحوم عبد الرافع محمد عبد الملك ( قرية الحجاجاب ريفي المدينة عرب) تجارة (92) توفى الي رحمة مولاه في الرياض. ثم امال بابكر (الدامر) طلخا ومحمد سالم محمد (ام بادر) طلخا ثم وداد خلف الله (ودالسيد الجزيره) طلخا ثم نورالدين محمد عبد الشافي (دنقلا - تبو) تربية المنصورة شمس الدين المنا ( المناقل – معهد مساحة الجيزة) حبيب الله محمد كدام (المزروب – تربية رياضيات الزقازيق ) برير التجاني محمد احمد (قرية ام ذكري ريفي المناقل ) معهد كيمائي شبرا . و برير التجاني ما شاء الله عليه عند إرادة حديد جلس لامتحان الشهادة السودانية وتخرج من طب الفاشر في اخر الالفية السابقة. من سؤ حظي في يوم السبت يوم 8 يناير 1988 فقدت ورقة المائة دولار وما عندي غير كيس مليان خبيز من باقي الزواج ونص طبق بيض مسلوق وخمسة عشر جنية . (التذاكر موجودة) فقدتها في الكلاكلة دورت عليها ما لقيتها توكلت على الحي القيوم وسافرت طبعا اول مرة الواحد اسافر بقطر ومستغرب في الناس المسطحين !!!!. وصلنا حلفا الساعة 8 مساء الاثنين 10 يناير 1988 في ليلة شتوية جافة برالمة ما عارفين لا وكالات و لا فنادق التحفنا الارض وتغطينا بالسماء. في الصباح الباكر حضر مندوب الاتحاد العام يدعى الهادي من ناس التجمع (حقوق الزقازيق) ا خذ الجوازات لعمل تأشيرة شوهد عند الخروج القروش المصرية كانت مفروشة زي الطماطم كان الجنية ب اربعة جنية سودانية المواصلات الداخلية في حلفا كانت لاندروفر حتى الباخرة كانت رحلة في المرسى الباخرة ساق النعام اسمها مكتوبة بخط جميل على مقدمة العبارة جوار كابية القبطان كانت صفراء فاقع لونها نضيفه في قمرتين كبيرتين يفصل بيهما ممر فيها بينشات بنية اللون مقسومة علي قسمين كل قسم فيه 11 بينش وحمامات وعيادة طبيب ومطبخ وسطح مع غرفة الدرجة الاولى . تحركت الساعة السابعة مساء وصلت مرسى السد في اسوان 10 صباحا الغداء كان سمك وشية ثم ركبنا القطر القشاش تقريبا العصر التذكرة 4 جنية وصلنا القاهرة يوم 15 يناير1988 في شتاء بارد ومطير نزلنا في شقة تبع الاتحاد العام في المطرية بعد فرز الطلاب حسب المدن كان معي المرحوم عبد الرافع ونور الدين ومحمد البشرى . في تلك السنة كان الاتحاد يسيطر عليه التجمع ماعدا المنصورة كانت مسيطر عليها الاتجاه الاسلامي ورئيس اتحاد المنصورة كان والله اعلم اظنه كان اسامة حامد (صيدلة ) قابلنا مندوبا المنصورة الاخوان حسن النور (تربية ) والنعمان حسن (حقوق) مع العلم انا فقدت كل ما املك من نقود ما عدا مساعدة الاخوان الله يجزيهم خير وعن طريق حسن النور (تربية) ت عرف علي بلدياتنا والذي لم التقيه من قبل الاخ / الهادي الصادق محمد نور كان الهادي هذا هو السكرتير الاجتماعي للاتحاد العام وكادر خطابي لحزب الامة ( علوم - عين شمس) حسن النور حكي له قصة البرلوم الضاعت فلوسوا المهم الراجل ما قصر الله يجزيه خير رسلي 50 جنية ب عد كم يوم من المنصورة في الحقيقة اهلنا واهل الهادي تجمع بينهم كثير من المشتركات ( اغلب المنطقة حزب امة – وفي المشروع الحواشات جيران – والمدارس الابتدائية والمتوسطة حتى المحكمة الشعبية لكن لم التق بالهادي قبل ذلك لكن تقابلنا في المنصورة في موسم الندوات. وصلنا المنصورة في 17/01/1988 في ليلة شتوية مطيرة نزلنا في شقة الاتحاد شارع الترعة المنطقة حديثة العمران كان في طين ووحل وبعوض تعشينا ب عدس حار كان في برد شديد لم نعهده من قبل حتى كاد الدم ان يجمد في عروقنا تعارفنا علي الشباب كان المسئول من السكن في تلك الليلة عادل شمس الدين (حقوق) من المناقل. سكنت في عمارة شارع اداب شرق كلية الكلية جوار بيت الطالبات عمارة رقم 5 الطابق الثالث كان يسكن معنا عبد العزيز ميرغني الحسن (تجارة 90 ) ونور الدين عبد الشافي (تربية) والمرحوم رافع محمد عبد الملك (تجارة ) والمرحوم محمد بشري محمد( هندسة) كان عبد العزيز في وادي ونحن البرالمة في وادي والله ما عارفين ان هو عضو في الاتحاد ورئيس المجلس إلا بعد الانتخابات المجلس الاربعيني في الحقيقة كان يتكون من (24 عضو من ضمنهم بازعة علي الماجد (تجارة 90 ). المرحوم محمد البشرى ثاني يوم قبل التسجيل قابله عمر محمود (هندسة) لكن وصل قبل 15 يوم ديل ناس الطيارة قالوا عندنا امتحانات فصلية وهو لسع اغبش ذو طمرين تراب القطر ما نزل منه فعلا مشى الكلية بعد الكشف الطبي و التسجيل جلس للامتحان كان تفاضل وتكامل تقريبا جاني مستاء جدا ما كتب غير اسمه في تلك اللحظة قرر يجمد الدراسة وكانت سبب في تغير مجرى حياته بعد تقدير الله سبحان وتعالي وللتاريخ قا ل انا رغبتي كلية الاداب قسم اللغة العربية مع ان كان مقبول في كلية الهندسة – مساحة جامعة الخرطوم ناس الاتحاد عرفوا بان البرلوم قروشو ضاعت كان السكرتير المالي تقريبا والله اعلم ابراهيم محمد ابراهيم (تجارة) او عبد الحفيظ محمد احمد (تجارة) سلمنى 40 جنية سلفية تستقطع من البريزة بواقع 20 جنية شهري. بعدها حلت المشكلة بتحويل من السعودية والحمد الامور عدت كان البريزة الشهرية 35 جنية .وقد بدأنا معركة التسجيل. في الاداب كان كل المرشحين يرغبوا في دارسة اللغة الانجليزية لكن واجهتنا عقبة ان الدخول للمصريين في قسم اللغة الانجليزية لازم الطالب يحرز 70 من مائة وعاوزين اطبقوها علينا نحن ( اللغة الانجليزية والأدب الانجليزي ) تجمع وتقسم على 2 اقل من 70 درجة دبر حالك وشوف قسم غير اللغة الانجليزية طبعا زمان المرور في اللغة الانجليزية 30 درجة زمن كان امتحانات في الشهادة السودانية compositions subjects ( High Dam- Desertification ) امتحانات عصر جد تطلع الزيت بالعادم. المهم م مضى 65 % من العام الدراسي وحتى الآن لم نسجل في الاخير يوم الاحد 7 فبراير 1988 حسمت امري وتوجهت إلي قسم الجغرافيا ومعي محمد البشير جويدة تقرنا أيدي سبأ كان ( عماد حسن – الطاهر علي الطاهر ثم صلاح شكيرة ثم غادة حسن) لكن غادة نقلت الي جامعة القاهرة سجلوا في قسم الاجتماع ثم محمد مجاهد هارون( اللغة العربية) والهام عثمان بدوي سجلت (علم نفس وهذه رغبتها شهادة عربية (دبي) ثم فاطمة محمد احمد (شهادة عربية السعودية) سجلت انجليزي وبدأت ام المعارك. الديمقراطية عايدة ورائدة ،،، نتقابل في الحلقة القادمة

(عدل بواسطة عبدالمنعم الطيب حسن on 09-22-2015, 09:43 AM)