الخرطوم عاصمة الجهل

Quote: قالوا ليك ( بلال) ود العوض (رطب شديد) بعد كان بحلق للحمير في الحله ، انتو عارفين (بلال) دا زول راسه نضيف بس الدنيا (عركتو) وفضل صابر الوقت دا كلو يجز في شعر (الحمير والغنم). طبعا انتو عاوزين تعرفوا الشمار تحديدا وكيف ( بلال ) دا رطب كدا ،عشان كدا انا بقول ليكم قصتة . بلال دا يوم شغال يجز سااااي في حمار ( مكادي ) وصاحب الحمار مقرش وربنا فاتحه عليهو . اها اثناء ما( بلال) بجز في الحمار جوا ناس المحليه داقشين الحله وطبعا جية المحلية دي ماعشان يبنوا ( مستوصف للحله ) ولاعشان يحفروا ( بياره مويه) ولاعشان ياسسوا ( مدرسه ) ولالدراسه مشروع ؟؟؟؟ الجماعه ديل دقشوا الحله عشان عاوزين يشيلوا الضرائب بتاعة المحليه من كم ( كنتين) في الحله. وقف صاحب عربيه المحليه المكندشه قصاد ( بلال ) مناديا له: يازول تعال هنا ؟؟ وقف بلال علي طوله وتوجه نحو افندي المحليه مرحبا.كعاده اهلنا السودانيين : هلا والله حبابكم الف ارررررح علي البيت.. زول المحليه : الله يكرمك ، انت ود منو ؟؟ بلال: ودالعوض ودحاج الطاهر بتعرفوا ؟؟ زول المحليه عاوز يعمل فيها مفتح وهو ماناقش الحله ذاتا: اي بالحيل كيف ياااخ ابوك دا مازول كلس وابوالكرررم. بلال: الله يكرم اصلك زول المحليه: انت شغال شنو ياودالعوض ؟؟ تردد بلال واخذ عقله يشطح به كثيرا ،فلو قالوا ليه بقص في الحمار دا بسالني :انت شغال حلاق حمير ؟؟ ويعمل لي فليم ووينها اوراقك ووينها بطاقه والاحتمال الكبير يشيل منه قروش جبايه. خطرت في راس (بلال ) فكره شيطانيه فرد لزول المحليه: والله عندنا حبوبة لينا عندها ( ورم ) في شعرها وودينها البندر ،والدكاتره قالوا عندها سرطان. اها جبناها صاده للحله قلنا ( اكان جاء امر الله التموت في بيتها ) واسع ناس الحلال(جمع حله) كل يوم كاسرين فوقنا ويدونا في وصفات ليها . ودحين في (جد) لينا قال: جربوا شعر الحمار امسحوا ليها فوق راسها بعد تخلطوا بزيت سمسم. واسه جيت احلق للحمار دا عشان نعمل ليها الوصفه. بتاع المحليه (المكنه ) مشت فيهو. وصدق كلام بلال دا وشالو شويه شعر من الحمار (مجانا طبعا) وانكشح داخل الحله. وبعد ماجمع جبايته رجع البندر وفك خبر (شعر الحمار ) وعلاجه للسرطان والخبر طبعا انتشر انتشار النار في الهشيم والواطه كلها قالوا ليك كسرت علي (دكتور بلال ودالعوض ) اصلو نص البلد بقت مصابه بالسرطانات من الاكياس واللغاويس البناكل فيها والمواد التموينيه المغشوشه. وبكدا رطب (بلال ) فاصبح بين ليله وضحاها من حلاق حمير لاخصائي باطنيه. ودا طبعا مامستغرب في السودان الان. الناس يكافي البلاء بعد كان مضرب انسانها مثالا في( الذكاء والنباهه ،والثقافه والعلم )وصلنا لمرحله سك ( ابوالقنفد ) وبعرة حماره. ومامعروف الجااااي شنو ودمتم سالمين ،،،