ابوريش..حبابك يا صديق كتر خيرك على توفير المساحة دي..و اتفرجت في قطعة البنية دي .. بتاعة (جري الخيل) اكتر من خمس مرات..و كل مرة بتجبرني ارجع ليها تاني..
كتر خيرك على ذكر الآلة (ارهو) وطبيعتها (وترين)..وسرعة القطعة مقارنة بجري الخيل..ودي النقة المحتاجين نسمعها..خصوصا في جلب مواد الفيديو..كتر خيرك كتير عليها..
وانا احب مزيكا ناس الصين كتير.. لأنها حنينة وبتشبهنا نحن الرعاوية بتاعين افريقيا وكده..!
في نفس الحتة بتاعة التواصل ( ويا ريتك تركز عليها اكتر).. اهديك مزيكا من غرب افريقيا..وهي لأختنا الديفا.. خيارا عربي من شمال مالي.. وتحديدا..قصدي تركز مع الة وترية.. وترها واحد فقط..وقاعدين نسميها في ثقافات البقارة (امكيكي)..وعندي مزعم انو دي اصل فكرة الة الكمان المعروفة..!
في كردفان امكيكي اوتارها بتصنع من سبيب الخيل (ضنب الحصان)..وهي من وتر..وقوس..!
في العمل ده ، يا ابوريش.. عاين حكاية بطء الريتم.. فالقطعة بتاعة الشافعة الصينية اسمها (جري الخيل)..سريعة.. اشبه بجري الحصان..وفي القطعة بتاعة خيارا عربي.. الشغل صحراوي .. اشبه بمشية الجمال..حاجة بطيئة...بطيئة..ومنتظمة الإيقاع..!!!
كتر خيرك ياحبيب..ونحن ناس انثربولوجيا ثقافية ساكت.. أي حاجة من تحت طوالي بنتفق معاها..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة