شيخ الامين يعفوعن مزمل فقيري

Quote: هناك خلط في الأمر .. وده مكمن الخلاف .. الموضوع من شقين .. شق لشيخ الامين فيه حق لان مزمل فقيري افترى عليه .. ولم يستطيع ان يقدم حجة تدعم اتهامه بأنه شيخكم بيحنن النسوان .. فحكمت المحكمة له وهذا حقه .. وتنازله عن مبلغ الغرامة المفروضه من المحكمة .. وعفوه عن شيخ مزمل حاجة جميلة .. وتجسيد تام لأدب الصوفية .. الشق التاني .. عدم اجادة الرجل للقرآن وعدم حفظه له .. فده امر غريب وعجيب جداً .. لأنه اي (حوار ) بيتخرج من أي خلوة من خلاوي الطرق الصوفية .. يجيد القرآن حفظاً وكتابة وبالقراءات أحياناً .. اليس من المستغرب الا يحسن شيخ الامين قراءة القرآن !! .. ويكسّر فيهو فينصب مجروره تاره ويجر مرفوعه أخرى .. ويلحن فيه بهذه الطريقة المفجعة الغريبة .. أعتقد ان من حق الناس أن يقدحوا في أمر شياخة الرجل .. وده حق لامراءة فيه فكما تم اثبات حق شيخ الامين .. في رد اعتباره بحكم المحكمة .. لأن في الأمر انصاف مستحق له .. ومزمل فقيري أكيد حيكون إتأدب كويس .. وتاني مااظن حيتكلم ويتهم الناس .. ويخوض في اعراضهم بالباطل ودون أي اثباتات .. كما فعل .. ده كوم والتاني كوم براهو .. لأن شيخ الامين في شياخته الكثير من القولان والارتياب .. فلاهو سليل شيوخ .. ولاخليفة شيخ .. لأنه ديل وحسب معرفتنا كان الزول ما حفظ القرآن ده عن ظهر فلب .. والتزم سمت التصوف في كل حياته .. كان (صنقر ) لن يستطيع أن يكون شيخ طريقة .. ولايحلم بيها حتى وسيتم فرزه وابعاده .. فبعض أصحابنا أولاد مشايخ لطرق صوفيه معتبرة .. ورغم إنهم نسباً سلسال شيوخ معروفين .. فرغماً عن ذلكـ تم ابعادهم ولم يتم اختيارهم لشياخة الطريقة .. وبقوا ناس عاديين زيهم وزي اصغر (حوار ) في المسيد .. ( فمابالك بشيخكم ) .. شيخ قايم بروس ساي لابيعرف يقرأ قرآن ولاحاجتين .. فماهو أساس شياخته أصلاً !! .. وحيعلمكم في المسيد تحسنوا وتتقنوا قراءة القرآن كيفن ! .. وحيوريكم الصاح من الغلط كيفن ! .. زول مارق من مسيد شيخ مابعرف يقرأ قرآن ولاحافظ حتى ! .. طبعاً دي حقيقة دامغة وموثقة وشافوها وسمعوها الناس .. وشهد عليها القاصي والدانِ فحقو ماتزعلوا فيها ياعجب .. لأن من يدندنوا حول هذا الأمر عندهم حق وألف حق .. فحوارات الشيخ تمتليء وتحتشد وتشهد بضعف قراءته للقرآن .. ( أخطاء تخلي الزول يضرس عديل كده ) .. أما عن الشق الاول فلكم فيه حق ومن حقكم ان تحتفوا به .. لأنه ماعنده علاقة بي دين ولا شياخة طريقة .. ده زول اتهموه بي تهمة ملفقة وليس لها أي أساس من الصحة .. ومن زول موتور ومتهور وخواف كمان زي مزمل فقيري .. لمن الشغلة بقى فيها سجن بدل يركز قعد يبطبط .. و يسوي فيها نسواني تلاته وعيالي طرشمية .. كل ذلك لايمنع بانه المحكمة حكمت ليه .. باعتباره شخص عادي وبس تم الافتراء عليه .. يعني شغلة الدين والشياخة بره الموضوع تماماً .. فماتخلطوا ده بي ده .. عشان ترفعوا أسهم شيخكم ..

(عدل بواسطة Frankly on 09-26-2015, 06:43 PM)