من "بيت الكلاوي"*: مع الثعيد (بسمات رحيم وأميرة السيد وقد أوحيتا لي)

Quote: قبل ساعات اليوم بحسن التوفيق لقينا أحمد التاي في الاسكايب.. وطلع أنه قاعد في مدني في بيت استاذ دفع الله.. وجاء الأستاذ دفع الله وجاءت فتحية والأخت قدم الطاهر واميمة بحر وجابوا شاي اللبن ونحنا جبنا شاي لبنا وهم جابو رغيف مقطع.. ونحن نعاين ليهم وهم يعاينو لينا ونشرب الشاي.. وكانت ونسة طويلة ممتعة وأنشدت لنا أميمة بحر قصيدة وتبادلنا الشجون والرؤى والنكات.. جلسة ممتعة محلقة باجنحة من غير ريش.. ذكرتني فتحية بزيارتهم لينا في بيتنا في الرياض مع ناس استاذ سعيد واستاذ جلال وذكرتني بأغنيتي "حبايبي الحلوين".. وفعلا حكيتها ليهم بتفصيل شديد في جلستنا المحلقة تلك.. وزيارتهم تلك كانت في بداية التسعينات حيث كنت في اليوم قبل الزيارة عند ناس استاذ عبداللطيف.. ودون سابق إنذار استاذ عبداللطيف قال (ناس سعيد ديل قالوا جاييب بكرة!).. وكانما انطلقت النار في الموجودين واذكر من الموجودين الأخت سامية حجاز.. فبدات تسأل أستاذ عبداللطيف اسئلة كثيرة: أها وين بيجو؟؟ وكيف نلاقيهم؟؟ وبرنامجهم شنو؟؟ و........ .. استاذ عبداللطيف قال ليها (والله نحن ما عارفين حاجة.. بس هم قالوا جايين.. دا كل العارفينه هسع).. وأنا قلت لسامية حجاز (كلنا والله شاعرين زيكـ لكن الظاهر إلا الواحد يتابع).. وفعلا في اليوم التاني وبعد قضيت مشاويري في الخرطوم غشيت خالد المهدي حيث كان يعمل في Save the Children وكان الوقت حوالي الساعة إتناشر نهار.. قلت لخالد (يا أخي عرفت امبارح من استاذ عبداللطيف انه ناس استاذ سعيد الليلة في البلد.. فإيه رايك نمشي بيتنا نتغدى ومن هناك نركب عربيتنا ودنقش الثورات دي.. يمكن حظنا يضرب نلاقيهم في محل).. وطبعا حبيبي يا هو دا شغله ودي إهتماماته فما صدق غاب دقايق استاذن باقي اليوم وجاني بلهفة.. الوقت داك طبعا ناس بثينة وفطومة وامونة ديل لسع.. الأيام ديك كنا ساكنين في شقة من شقق الجامعة في محطة المشتل في الرياض وكان مستلمين عربات اللادا جديدة .. وكان شقتنا في الطابق الرابع.. وفعلا وصلنا البيت وطلعنا أنا وخالد.. قبل ما ندخل الشقة استغربت لقيت باب الشقة "متاقى"... وفي حركة ناس في البيت.. لزيت الباب فإذا أول شخص أجده امامي أستاذ سعيد بذاته راقد في السرير الكبير في الهول في حالة قيلولة.. وببطء دخلت فإذا بالسرير المقابل ليه برقد عليه استاذ جلال شخصيا.. وتقدمت فإذا المكان يعج بالمدنيين ولا أذكر الآن تحديدا .. أذكر الأستاذ فضل الزبير ثم الحاشية الملكية المرافقة ناس ود موسى ومحمد حسن وعدد... والجميع في حالة قيلولة.. ثم تقدمت للغرفة الأخرى بهدوء حتى لا أزعج الناس وهم في غفوة قيلولة عامة.. ووجدت الباب مواربا فإذا بالأستاذ عبداللطيف على سرير والأستاذ شيخ ابراهيم في السرير المقابل.. والأستاذ شيخ علي .. وعدد من الحاشية الملكية الخرطومية المرافقة للوفد الملكي الزائر.. ذهبت للمطبخ ووجدت نجاة ومعها فتحية وأخوات... وأبخرة الطبايخ والحلل في النيران.. ونجاة وجهها يتوهج فرحا قالت لي (عايزين شوية طماطم.. وعايزين زيادة رغيف.. وعايزين....... وعايزين .......).. وطبعا خالد المهدي دا نسيته خالص ما عارفه مشى وين من دخلة الباب.. ونزلت درجات السلالم تلاتة تلاتة للطوابق الأربعة .. ولكن الغريب في المسألة اني كنت اغني اغنية (عبدالوهاب الصادق) ما عارف الختاها في خشمي شنو.. والفرح لا يسعني.. حبايبي الحلوين أهلا جوني وأنا ما قايل حلوين زي ديل بزوروني.. أغني وأنا أرقص بالوسط في "وانا ما قايل".. جوني زاروني شايلين ازهار شايلين الليل قلبوهو نهار وأنا ما قايل.. يا لها من أيام..........