Quote: كلام طاعم بالحيل آود المدير ذكرتنا الزمن القبيل زمن حبوباتنا الحنينات وشهيتنا نزور بلدكم السمحة ام نخيل الا عاد صحى الحاجات بقن كتار ومساخ وان بقيت داير ترحل من بيت لبيت دفارات ما بتكفيك وستيف العدة يكسر ضهرك قالوا تستيف العدة سووله شركات عديل! تحياتى
والله الليلة زارونا ناس سمحين بالحيل. أمانة ما كان زمناً سمح بالحيل، وأمانة الناس ما كانوا سمحين وطيبين. يا مهيرة بلدنا ياها بلدك، واهلنا ياهُن أهلك. مرحبتين حبابك، كنا نقوم الدغش عشان نلحق باظ سِتة أو قولي باظ العبيدية. بيقولوا باظ سِتة عشان مواعيدو الساعة سِتة صباحاً، وأصلو لا حصل جا سِتة لا حصل قام سِتة إنما يتحرك حسب رغبة ناس البلد ويسير حيثما ساروا. نمشي سوق اتبرا عشان نركب باظ سِتة، والناس عادةً بيتلمو عند المدير ود الشيخ واللآ عِن خدر الكِعيك، وغالباً بيكونوا عندهم حاجات دايرين يقضوهِن من سوق اتبرا، وتسمعي، يا جماعة فلآن دا وينو ؟ دايرين نمشي. هوي يا زول هوي، ما تجي مِنسل لآ جاي. يا ناس ما تصبروا ضايقين مالكم، لآحقين شنو ؟. وبعد دآك تسمعي، عليك الله القفة دي احشرا تحت كرعيك. البهمة البتنبح دي مطيرنها وين ؟. يا ناس ود الشيخ دا دحين ما قال قايم معانا ؟. ساقوهو ولآد الحسن ود مصطفى وقال بيجي باكر. وتبدأ الرحلة، نفوت خليوة والريافة وكنور، وندخل دار مالي، وفي الطريق اكان لقينا ناس يدفنو في جنازة الباظ كلّو يعرج عليهم لرفع الفاتحة والمساعدة، وتسمعي الحليفة بالطلآق وغير الطلآق ان لآزم تواصلو إنتو علي سفر، ما قصرتوا تب. أكان عدينا بكدباس نتنسم عبير الصالحين الشيخ الجعلي، ونمُر بود الفكي علي وندخل بالجول وفتوار، وغالباً ما نمشي عن طريق المخيرف، بربر ؤُ بهناك الضانقيل والفريخة، ثمّ ونصل العبيدية ومن العبيدية لمشرع الباوقة. البانطون بغرب والباوقة تبدو كغابة نخيل خضراء فوق تلّة عالية، ونحن بالشرق نشرب الشاي في الرواكيب نطايب دا ونسالم دآك والبساط أحمدي والونسة والقرقرآب لحدي ما يصل البنطون، ونطايب النازلين ميممين صوب اتبرا وبربر ناخُد خبرُن ونديهُن خبارنا. بتكون في كميّة من المطايبة والمحاننة واللوم والعتاب والمحبة دايماً بتكون هي سيّدة الموقف. نعدي لأُم زهور وبغرب نركب البرنسات نصل نطايب اللهل ويطايبونا. مرحبتين حبابك يا مهيرة تجي إن شاء الله تمشي معانا نزور البلد كان واتينا المغموّل ناكل المغموّل، وكان واتينا أُم راس ناكلنا أُمات راس، واللآ قُرامات طير، وكان بقينا في بداية الموسم بنلقى سبق الجوع مرق، والموية نواحي السافل موية نيل نشرب من الجدول. نحن قومٌ لا نعرف الأُفُق فمسكننا وسط الجناين، والزراعة هي حرفة اجدادنا، والأرض هي كل شي في حياتنا. الحاجات يا مهيرة بِقن كُتار ؤُ مُساخ ونحن سافرنا وبعدنا.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة