وطن ببكيهو يوم عيدو

Quote: وطن ببكيهو يوم عيدو * بلد ببكيهو يوم عيدو وليه ما أبكي واتحسر كان غلب اجاويدو وبنعيك يا وطن شامخ وانادي المهدي يبكينا تعبنا خلاص ركبنا الهم دموع جرحت ماقينا تعال يا دقنه للصيوان يا أسد الشرق مغوار وجيب آب قرجه والزاكي نجومي العز وجيب دنقس بطل سنار يالكنداكه وين قولك وود حبوبه سيف بتار نحاس العز صبح مزمار يرقص شيخنا والركبه جديده شديد مين زيك وترقص حتى بالرقبه وادي السرقه كم شمبال وعرج في سما الهذيان خليلو زمن رقيصنا بطان وحليلك وطني يا سودان وترقص وأبكي يا تاريخ وتسخر من جبان خوان حرام يا شيخنا إسماعيل يا رافع العلم لينا بنبكي الليله فيك وطنا وكم كترت بواكينا وزي ما قال هشام الجخ (بتخلفينا ليه يا بلد ما دام حترمينا ) ويا ناس هوي.. صراحه بقولها بالغتو فرحنا وقلنا ديل انفاذ حيبنوا الفوقو والتحتو وكان حجر البلد طافي وحجرو الليله غطستو بلد ممتده مليون ميل وفي غمرة سواد الليل بعد الشهدا والويلات ومليارات ودبابات ويا حسرة أخويا المات وطني الغالي قسمتو اريتكم انتو كان موتو وريحتونا وارتحتو وشن فضل بعد وطنا ترابو للغالي ما صونتو بلد ممتده مليون ميل وانهار تربه صالحه عديل ونشحد نحنا في اللقمه ونستجدي القمح راضين وينو شعاركم ألما خلا يوم صدقنا ما قلتو فالناكل مما نزرع والنلبس مما نصنع ونقود العالم أجمع وانتو بهيمه ما قدتو مشروع الجزيره الكان دهب بيغذي في السودان كان مورد سيوله وخير كيف بالله دمرتو ووين بالله سكه حديد وين ثرواتنا وين يا ناس دهب بترول ونفط وخام سلبتوها و اكلتوها وما شبعتوا بنيتو قصور واي قصور من دم البلد شلتو ويسرق داك وينهب زين ترقوهو وتودو هناك عشان ينهب يلحقنا بامات طه والزينين وتقول ياخ البلد عقرت وماف رجال خلاف ناسكم وكم ناديتو بالتمكين وكان خنجر غدر سكين موضب حار وضمه سنين وباسم الإله والدين كم يا خونه ضبحتو حليل زمن الولاد تقرا تلاقي الشغله منتظرا واديتوهم الطرشا وأهل الحسبه عينتو وصالح عام غرق قبلو وشن لي أهلي فضلتو صمغ عربي وقطن يا ناس وثروه خير من الحيوان وعلما كرام يعمروا في أراضي الغير كم بالله شردتو حرام والله الف حرام كان غلبت اجاويدك حرام ابكيكا يوم عيدك وشعبي معلم الثورات متين تصحى وتصحينا من حلما حمانا سبات علي الوعد البيحيينا وينعيك يا وطن شامخ تعال يا المهدي ابكينا إدريس محمد ابراهيم الرياض 14 يناير 2014

(عدل بواسطة مهيرة on 01-19-2015, 07:06 AM)