نعى اليم ...... سودانيز اون لاين دوت كم تحتسب الزميل فتحي البحيري فى رحمه الله
وداعاً فتحي البحيري
|
|
 من وحي كتاب المطالعة
|
من وحي كتاب المطالعة
قالوا في زمن الفراعنة كان في ملك فرعون .. لكن فرعون بالجد ظالم ظلم العدو . ممكن كان عطست في حضرته تروح فيها .. وكان دائما حولة السدنة من اعلاميين ووزراء ورجال امن وحراس وشعراء كعادة الفراعنة في ذاك الزمان الغابر .وكان الاعلاميون جاهزون لتبرير أي بطشة يبطشها في واحد من المساكين ... يضخموا فعله حتى يبرروا سحلهم له .. يعني مثلا في حالة العطسة تجد من يقول ( قد أبطلت قواتكم الباسلة المحاولة اليائسة من الخونة والمارقين وذلك بدسهم لاحد المزكموين في حاشية جلالاته الا أن قوات الأمن تمكنت منه بعد أن عطس في حضرة جلالاته كما تمكنت قواة الوقاية في احتواء أثر ذاك الفعل الشنيع ونحب نطمئنكم أن الفرعون بخير ولا نامت أعين الجبناء ) . في هذا الجو المكهرب بالحليب .. جاء شاب يحمل شنطة وطرق باب كبير الوزراء ودار معه الحوار التالي .
- أيوا يا أخينا أنت عاوز شنو ؟
- عاوز أقابل جلالة الفرعون يا سيدي كبير الوزراء .
- يا سلام ؟ بالسهولة دي أنت منو عشان تقابل فرعوننا العظيم ..
- أنا ترزي يا سيدي الوزير ؟
- وكمان ترزي ؟ يعني لا سفير ولا عالم نووي أوعالم بترول ولا حتى خبير نفايات دولية ؟ يلا أمشي أمشي هوينا القال ليك منه فرعون محتاج لترزية عنده ملابس لو غير كل ساعة غيار تكمل بعد مائة سنة . يلا أمشي هوينا .
- لكن أنا يا سيدي ما ترزي عادي ..
- ومال ترزي بالشملة ولا ترزي باللوز .؟
- يا سيدي أنا ترزي متخصص في أقمشة معينة أسمها أقمشة الفضيلة ..الأقمشة دي ما يشوفها الا الانسان الذي يتمتع بالقيم الفضلى . يعني مثل الصدق الامانة الشجاعة الحلم الكرم وغيرها من الصفات الحميدة .وأي شخص ما فيه الصفات دي ما بيشوفها .
- شنو كدي ورينا أوهامك دي ..
يثير حديث الترزي فضول الحضور من شعراء ووزراء واعلاميين وغيرهم ويلتفوا حوله ليشاهدوا الآقمشة .
يفتح الترزي الشنطة وتبدو فاضية ما بها أي شئ .. لكن مثل بيديه كأنه يقلب في أقمشة ورفع يديه في الهواء كأنه يستعرض في قماش .
- أها رأيك شنو يا مولاي في القماش دا عمرك شفت زيه ..
الوزير والحضور بدأوا يتلفتوا لبعض هم ما شيايفين شئ لكن خافوا التهمة تلبسهم بأنه ناس جبناء نصابين دجالين وحرامية فقالوا ننافق احسن .بدأهم الوزير .
- يا سلااااااااام ياخ دي حاجة جميلة خلاص
وواحد تاني : خاصة البنفسجي التحت البرتقالي داك يا سعادة الوزير . وكل واحد بدأ يستعرض في مشاهدته ليثبت أنه أصيل ما فيه شك .
الوزير قال للترزي خلاص أنتظرني هنا آخذ ليك أذن من مولاي الفرعون . ودخل على الفرعون قائلا . وهو لازال في مجلسه وحوله سفراء دول ومستثمرين وشوية وزرا .
- مولاي الفرعون .
- نعم يا وش السعد عندك شنو ؟
- في واحد ترزي عاوز يقابلك ؟
- شنو ترزي ؟ أنت جنيت ولا شنو ما شايفني مشغول ولا دي قلة أدب جديدة .. جيب السيف دا يا ولد ..
- لا لا لا دقيقة يا مولاي خليني أشرح لك . ويهمس في أذن الفرعون شارحا له موضوع الترزي .. فرعون يهز رأسه مهتما بالموضوع ويرفع رأسه للحضور ..
- يا جماعة عن اذنكم أنصرفوا الآن عندنا موضوع طاريء يهم الدولة نشوفكم مرة تانية ..الوزرا خليكم قاعدين الضيوف والشعرا مع السلامة .
يدخل الترزي مع الاعلاميين ومع الوزرا الخارجين وهو يحمل شنطته .. فرعون يبدأ الحوار .
- هو أنت الترزي العجيب .
- نعم يا مولاي
- يلا ورينا عندك شنو ؟
- يا مولاي انا عندي نوع من القماش أسمه الفضيلة . ما يشوفه الا الشخص الذي يتمتع بالقيم الفضيلة المعروفة منذ خلق الله البشر ..
- زي شنو كدا مثلا .
- زي الصدق والامانة والشجاعة والكرم والمروة والشهامة ..
- طيب طيب مفهوم ومن الشخص الذي لايراه
- لا يراه اللص والمنافق والجبان والخائن والكذاب وعديم المروة والاناني .
- خلاص خلاص يلا ورينا الاقمشة دي .
فتح الترزي الشنطة ( الفاضية طبعا ) وبدأ في الهواء يستعرض في الأقمشة غير الموجودة .
وبدأ المنافقون يبدون انبهارهم الزائف .ويهمهمون وبعضهم يرفع صوته ليثبت كل واحد منهم أنه (الفاضل الفاضل ).
- يا سلام ياخ تصور أنا قبيل التركوازي داك ما شفته والعجب البني التحت الاصفر .
فرعون طبعا هوما شاف حاجة لكن خاف الحكاية تلبسه هو بعد صمت وتفكير سريع قال نخوض مع الخائضين لمن نشوف آخرتها ما تنقلب علينا الحكاية .
- يا سلام ياخ يسلم الهداك لينا يلا عايز كل واحد من الوزرا والمسؤولين ديل يختار قماش عشان عندنا عيد نهاية الاسبوع لازم كل الدستوريين والمسؤوليين يكونوا لابسين الزي الجميل دا أمام الشعب والحضور . فرعون قال في نفسه ما دام الناس شايفين الأقمشة دي انا مالي ما عادي بشوف نفسي في الحمام عريان .
وقال للترزي عندك باقي الاسبوع دا كله تفصل لنا البدل واللبسات ..
- الترزي قال الوزرا ممكن لكن الاعلاميين ما عندي وقت يكفيهم ..
- فرعون قال ليه ما مشكلة أديهم كل واحد قطعة قماش أنشاء الله يعملها ( قرقاب ).
وبدأ الترزي أولا يوزع في الاقمشه و يتظاهر بالقاءها وهم كل واحد فيهم يقبض في الهواء ويضعه في كتفه . وقام عليهم أخذ المقاسات كلهم بما فيهم الفرعون .
وخصصوا له غرفة في القصر . والترزي شغال ليل نهار والوزير يمر عليه شنو لبستي ما خلصت . قربت بس باقي ليك الزراير ..
وفي نهاية الاسبوع صبيحة الاحتفال اجتمع فرعون في القاعة الرئيسية مع الوزرا وجا الترزي بنفس الطريقة الاولى رمى لهم اللبسات وكل واحد فيهم دخل على حمام عشان يغير (أكيد قصر فرعوني يكون فيه خمسمائة حمام .. أنا مش عارف هم داخلين الحمامات ليه ؟.. المهم )
خرج الجميع ملتمين على بهو القصر الكبير ويتقدمهم فرعون والجميع ( يا مولاي كما خلقتني ) لا العفو عدا الفرعون طبعا لانه كان يحمل الصولجان ويلبس تاج من الذهب وبس .( وعلى قول عادل امام أنا لو شفت حاجة تانية حا انكرها ليه يعني )
وطبعا الاعلاميين قاموا بدورهم تماما نشروا خبر القماش وهيئة الوزرا مع الفرعون وركزوا على أنه الما بشوف القماش اللابسه فرعون أكيد فيه ( كبشة من الانن ) وأنتشر النفاق الاجتماعي كما ينتشر الحريق في الغابات . الجمهور والجماعة كلهم مصطفون على جمبات الطريق لمشاهدة موكب الفرعون .. وكلهم ينافقون وكل واحد خائف من الذي يقف بجواره يخاف أن يكون مدسوس من جهة أمنية ما فيبدأ ينافق ليثبت أنه شايف ما شافش حاجة غريبة بجمل من نوع ..يا سلام لبسة وزير الدفاع جميلة .. بس لكن لو تلاحظ قصيرة شوية و هو طويل ..والعكس وزير الزراعة لبسته جاره بالواطة . ما كان يكفها أحسن . الظاهر الترزي استعجل .
هكذا مر الموكب وكل شخص مرر الأمر عادي كأنه لا يوجد شئ غريب ..
لسوء الحظ كان في أطفال تلاميذ مدرسة ابتدائية فرعونية أولى هيروغريفي .مفترض أنهم يقولوا نشيد وطني بمجرد ما يحازيهم الفرعون وجماعته . لكن كان فيهم واحد شليق الظاهر عليه كان غايب لامن شرح لهم الاستاذ حكاية القماش العجيب .. وقبل ما يبدأ زملاؤه النشيد قال .
- الاه أنتو فرعون وجماعته ماشين ميطي مالهم .؟؟
أنفجر باقي التلاميذ في ضحك هستيري وكذلك أنتشر الضحك بين الحضور .. يا داب شعر فرعون وجماعته بالبرد .. وفرعون عرف المقلب .. في الوقت داك كان الترزي واقف على تلة صغيرة متكي في عجلته يتفرج وميت بالضحك .. فرعون شافه وقا ل بأعلى صوت ( هاتو لي ود الكلب داك ) الترزي ركب عجلته وقام سداري وجري . والوزرا ما عارفين يسكوه ولا ينسترو في الأول .
أما الاعلاميين الحمد لله اتصرفوا ربطوا البدل والقمصان في محل القرباب .
غايتو كان يوم .
|
|
 
|
|
|
|
|
| العنوان |
الكاتب |
Date |
| من وحي كتاب المطالعة | درديري كباشي | 12-09-14, 06:54 AM |
| Re: من وحي كتاب المطالعة | علي دفع الله | 12-09-14, 07:46 AM |
| Re: من وحي كتاب المطالعة | درديري كباشي | 12-09-14, 08:05 AM |
| Re: من وحي كتاب المطالعة | ولياب | 12-09-14, 09:09 AM |
| Re: من وحي كتاب المطالعة | درديري كباشي | 12-09-14, 09:29 AM |
 Re: من وحي كتاب المطالعة | معاوية المدير | 12-09-14, 10:22 AM |
| Re: من وحي كتاب المطالعة | درديري كباشي | 12-09-14, 02:09 PM |
| Re: من وحي كتاب المطالعة | Sameer Kuku | 12-09-14, 02:54 PM |
| Re: من وحي كتاب المطالعة | درديري كباشي | 12-09-14, 02:59 PM |
| Re: من وحي كتاب المطالعة | درديري كباشي | 12-09-14, 03:32 PM |
| Re: من وحي كتاب المطالعة | Sudany Agouz | 12-09-14, 04:33 PM |
| Re: من وحي كتاب المطالعة | درديري كباشي | 12-09-14, 08:47 PM |
| Re: من وحي كتاب المطالعة | درديري كباشي | 12-10-14, 06:48 AM |
| Re: من وحي كتاب المطالعة | حامد بدري | 12-10-14, 06:56 AM |
| Re: من وحي كتاب المطالعة | درديري كباشي | 12-10-14, 07:12 AM |
| Re: من وحي كتاب المطالعة | عبدالحفيظ ابوسن | 12-10-14, 08:12 AM |
| Re: من وحي كتاب المطالعة | درديري كباشي | 12-10-14, 08:35 AM |
| Re: من وحي كتاب المطالعة | درديري كباشي | 12-10-14, 09:21 AM |
| Re: من وحي كتاب المطالعة | درديري كباشي | 12-10-14, 02:19 PM |
| Re: من وحي كتاب المطالعة | درديري كباشي | 12-10-14, 04:31 PM |
| Re: من وحي كتاب المطالعة | درديري كباشي | 12-11-14, 07:01 AM |
| Re: من وحي كتاب المطالعة | درديري كباشي | 12-14-14, 10:19 AM |
| Re: من وحي كتاب المطالعة | درديري كباشي | 12-14-14, 10:19 AM |
| Re: من وحي كتاب المطالعة | درديري كباشي | 12-15-14, 02:10 PM |
| Re: من وحي كتاب المطالعة | درديري كباشي | 12-17-14, 06:52 AM |
| Re: من وحي كتاب المطالعة | درديري كباشي | 12-17-14, 10:46 AM |
| Re: من وحي كتاب المطالعة | Dahab Telbo | 12-17-14, 10:58 AM |
| Re: من وحي كتاب المطالعة | درديري كباشي | 12-20-14, 09:32 AM |
| Re: من وحي كتاب المطالعة | درديري كباشي | 12-20-14, 09:37 AM |
| Re: من وحي كتاب المطالعة | درديري كباشي | 12-21-14, 06:28 AM |
| Re: من وحي كتاب المطالعة | درديري كباشي | 12-21-14, 08:26 AM |
| Re: من وحي كتاب المطالعة | درديري كباشي | 12-21-14, 07:42 PM |
| Re: من وحي كتاب المطالعة | درديري كباشي | 12-25-14, 07:53 AM |
| Re: من وحي كتاب المطالعة | يوسف السماني يوسف | 12-25-14, 12:35 PM |
| Re: من وحي كتاب المطالعة | درديري كباشي | 12-26-14, 08:14 AM |
| Re: من وحي كتاب المطالعة | درديري كباشي | 12-26-14, 08:22 AM |
| Re: من وحي كتاب المطالعة | درديري كباشي | 12-27-14, 02:46 PM |
| Re: من وحي كتاب المطالعة | درديري كباشي | 12-31-14, 04:31 AM |
| Re: من وحي كتاب المطالعة | درديري كباشي | 01-03-15, 09:11 AM |
| Re: من وحي كتاب المطالعة | درديري كباشي | 01-03-15, 09:43 AM |
| Re: من وحي كتاب المطالعة | درديري كباشي | 01-03-15, 02:16 PM |
| Re: من وحي كتاب المطالعة | درديري كباشي | 01-04-15, 08:06 PM |
| Re: من وحي كتاب المطالعة | درديري كباشي | 01-07-15, 03:36 PM |
|
| |
فيس بوك
تويتر
انستقرام
يوتيوب
بنتيريست