لمتذوقي الدوبيت والباحثين في ابداعاته..هل أضاف اليه الشعراء الشباب جديدا؟

Quote: الأستاذ عادل لك ولضيوفك عُشَّاق الأدب الرصين التحايا الزاكيات نعم إن هؤلاء الشباب ، شعراء رائعين وموهوبين جدا وهم إضافة لشعر الدوبيت، ولهم مفردة أنيقة وجميلة جدا في الدوبيت قديما توجد الحداثة وقد كان الشاعر الكبير ودالسميري ،رائد هذه المدرسة أي مدرسة التحديث في بادية البطانة وودالسميري أكبر عُمرا من الصادق أب آمنةومجايليه لكن تحديث دون إخلال بالوزن والسبك ودون إعوجاج للمربوعة شوف الصادق أب آمنة : جروحك نوسرن بعد الصقوط ماشاتن ظروفك جوَّه جوف قلبي المفوِّت باتَن غرامِك منُّو كِِرعي كنَّبَن يتخاتن كريفك طيبب روحي وعروقي الماتن في رأي المتواضع الشباب شعراء رائعين وعندهم إضافات جميلة جدا وفي شعرهم حلاوه وطلاوة وعندهم مسحة طرافة وغزلهم شفيف وعتابهم سمح، لكنني أري مفردة الأنا ظهرت كثيرا عند بعض الشعراء من الشعراء الشباب الذين أعجبني شعرهم إضافة للذين ذكرتهم في أوَّل البوست ،الشاعر ودالضو وعبدالله عباس والشاعر الرائع ،بيتاي والشاعر بيتاي دي مميز جدا وبه وهاطة وتواضع وشعره مدهش جدا أنظر له في هذه المربوعة الطافرة جدا فيك طبع البِزاوْلَن بي الصقايع نُفَّر وفيك حاجات تحيِّر وفيك محاسنن وفَّر فينا هواك تمكَّن يا الحسايسك كُفَّر صبَح حالنا كيف حال الجمال الجفَّر أيضا أنظروا للشاعر عبدالله عباس وهذه القافية الشرود: ما بهديكي ورده تجف و حالاً تزبُل ولا بهديكي عبقات البخور والفُل أنا بهديكي كل ما عندي أخدي الكُل و ليك ضلوعي سويهن ضراكي و ضُل نحنا نـعجنـو كارهـن و نرقـدو لُـخ ونحنا ندكو فوق ضلعو وعضامو نجُخ نحنا صغيرنا مو الجاهل البخاف من أُخ ونحنا الحيـَّه للسُّم و الزعاف بـنـبُـخ عندنا في بوادي الكبابيش استاذنا الشاعرعلي الشيخ "ودالمُر"هو رائد مدرسة الدوبيت الحديثة ومن شعره عيون الصيد ومن عين الأنيس متدراقي وفي جوه القلوب نيران غرامك حارقي قصيبة الهوى ورُقابة الجزيرة الزارقي ترباليكي يوت بجري وبتشربي سارقي ----------------------------- أنا دايماً بطوف بي ديارك وإنت ما بتحني ياعيون الغزالة خبارك؟ عشان ياشتلة الباوقة الشبك نوارك مغرم بيكي والقلب انحرق بي نارك؟ ----------------------------- علي الشيخ انشغل بي ريدك ورب العزة صور بي براعة خديدك عنقك باهي زي قرن العجيلة نهيدك أميرة جيل زمانك يا البنية وحيدك وله مسادير رائعة جدا كمسدار القمرية وودكسلا وعيون الصيد ومن بعده الشاعر حنفي حاج الطيب وله شعر رائع جدا وهو شاعر متميز جدا ،أنظر للحوار الذي دار بينه وبين قرين الشعر خَبَار لغتك بقت متبهدله ومنْحَطَّه يا مَالِكْ زِمَام حرفاً سواك مانخَطَّا نايِمْ لِي بَدَرِج ْفيك محطة محطَّه ما عارفني كحال العيون بي الشطَّه القرين:- خطوطي الحمرا حاسب ليها ما تتخطا انا ود كيفي سرجك فوقي ما بِنْخطا شرطي معاكا لا تهدّدني لا تنشطا وحذارك تاني فوق ضيل النمر تتوطا حنفي:- بحرك موجو اصبح ما بعوّم بطَّه وفي الباقيلي جمّام الينابيع قطّا راجع الخلفي مالك والسنين منشطَّه لامن ليك اقزام الشعر تتخطاَّ القرين:- جيب ايدك رهان يا زول نسيبت النطَّا سهم من شارد النم لا علا ولا وطَّا اوكت ما اشدّو وتر القوس معاي ينمطَّي جهّز لي دفاترك وقول سطر ما انطَّا وله ايضا مسدار القمرية ومسدار أم سماح ومسدار العركة وله شعر دارجي رصين جدا وكذلك الشاعر ابراهيم الدلال صاحب المربوعة التي ذكرها شخصكم في بوست ود اب صالح وأيضا يقول شيخنا الدلال : قوقي ياقمرية فوق فرعَن تلولي الريح وزي ماصحتي من ألم الفراق بنصيح ذكرتينا لي مثلا بقولو صحيح من المستحيل مجروح يداوي جريح صداف البقوقي دباسك مدَّة طويلة من وارفك ظلالك وناسك تعَّالك هدج وزرق السِّحاب إتماسك وحتَّات تاني ساري المُدجنات الباسك والشاعر علي وددياب ومن مربوعاته الجميله حوراه مع جملو : ى الحاله العــَلــَى ماك دارى فى الباقيلك ماك عارفنى جنيت من قعدت بشكيلك طالب اللطنــَب المســَّـخ عليكا مقيلك تعال نتغلطو فى الدير يبقى هيلى وهيلك ********************* إنت خاف جنيت قعدتَ تناجل اصبـُر يا صبى البهديلى مو حق راجل قصيبة المرنع التيرابها بمشى فرادل ليك بدنيها كان شفقان عليها بواجــِل ْ والكثيرين ببوادي الغرب ومن بعدهم حمل الراية الشاعر الرائع عبدالله ودإدريس وعبدالله شاعر فصيح جدا وزول وهيط ، بقول: أُم حرسن مِحارب توقة الطلاَّلي بلا ابكي وإنودِر منَّها إنضلاَّلي ما بتجيبها واسطة وسمسرة ودلاَّلي ويات مِن رامي صوتو مِدرِّعا الملاَّلِي حظِّي إن لفحت جيمي ودنيت شنحيبي جلخت بي البادية لي حدود دولة إدريس ديبي أخت ايَّام مع ناسن عليهُن هيبي تُقَّابة الوقود برموها قبل الغيبي نعم شباب شعراء ، ورائعين جدا وموهوبين ولهم إضافات جميلة في الدوبيت، كنت أريد الإسهاب أكثر، ولكنني مفزور وأيْنُقِي ظوالع