|
حـــتــى لا ننـســـى (1) الرحمة تات ..
|
ا الرحمة تات .. الرحمة اتية او تاتي .. الزول السمح ايمانو راسخ بانو سعادتو في اسعاد الاخرين ، وبدونهم لامعنى للحياة .. ما كل حلو بيتو والمعاه جيعان مالبس الرفيع والمعاه عريان مامون السجايا اليستودع النسوان ضباح الخلايا عشا الـضــيـفـــان كنا ، ومازلنا ، وسنكون في الأزل ، جنيات خير وحقانية وبنسد الفرقا مافي شئ بغيرنا ولا يبدلنا ، ناس خير وحق وجمال ومحبة ، كان عشنا رخى وتخى ، ولا كان عيشنا بقى فسدان وشرا . يانا نحن اولاد بلد وبنات سماحة ..والمابعرفك بجهلك ... يعيش الزول في مجتمعوا وهو مقتنع بافشاء السلام واطعام الطعام وصلة الارحام والصلاة والناس نيام وجود بالموجود وفي قمة الخلاف يصيح الزول بي صوت عال يا ناس باركوها وسامحوا ، السماح يا خلق ، اخره كوم تراب ، وماف شئ باقي غير الرحمن الرحيم وهو داير لينا الجنة والجنة عايزة الكلمة الطيبة ، الكلمة الطيبة مفتاح رياض الجنان ياخلق . بالروح المتسامحة بعديها الزول الطيب بي روح نقية وبسيطة وفي حسابو كل الناس اخوان ، من دون خلق الله نحن الوحيدين في العالم البنقول للأقارب ـ اخوانا ، اخوي ود خالتي اختي بت عمتي ، حتى الصديق امك لامن تسال منو تقول ليك : وين اخوك الليلة ؟ وتكون قاصدة صديقك ..والمابعرفك يجهلك .. الزول حياتو بسيطة بعيشها شاكر وحامد ومهما كان بصرف على اهلوا واهلوا ديل كل الناس تكافل ومحبة في الله ، في شان كده ما بتعرف غنيهم من فقيرهم وكلهم بصرفوا من غير حساب ولامن تخاف عليهم يكون الرد الصدقة بي عشرة امثالها .. العيش الرقد اصناف اصناف الولد الكان عزام حلاف ضياف الرزق الجانا مدلا الخلق الجاف اتبلا بالحيل جني اي والله رغم الظروف القاسية ورغم الهجرة والاغتراب والديجتال والثورة الرقمية وكل زول سماعة على اضان وعيونو مبحلقة في الوات ساب والرسائل النصية برغم كل زول بقى جزيرة ما ليها جسور مع التانيين نحن بنتوارث الأجمل وفينا جنيات اي والله بعيدوا عادات الاجداد وبحيوا امال الخير جوانا ..لسه رغم الظروف الطاحنة صواني الطعام مليانة ولا فيها صحن واحد بتطلع برة ونتقاسم اللقمة ، في الزمن العلينا نحن احوج مانكون للرحمة ـ تأتينا من اي حتة ومن اي زول لانو في الحكايات الشعبية بقت تصيبنا انيميا الفول والعدس .. اهلنا لامن ابتكروا الرحمتات كانوا بشوفوا بي قلوبهم قبال عيونهم وبي بصيرتهم قبال عقولهم حسوا ب حسس الناس من حولهم عملوا الرحمتات وزعوا الاكل من الضحى لي كل الناس ويبدوا من الجيران ويصلوا لحد الناس المتعففة والماعندهم الحبة بدون ما يشعر زول لاجمعية خيرية ولا منظمة طوعية ولا دوشة وخوتة طنقعة ماليها اساس.. اختاروا ليلة الخميس قبل الجمعة اليتيمة وبعضهم بوزعوا الرحمة يوم الجمعة الاخيرة وزي ماقلنا بتتوزع من الضحى على البيوت وفي المساء بطلعو الحارة ( الفتة ) لكل الاطفال الذين يجوبوا الشوارع وهم يحملون الصفايح وعلب الصلصة الصغيرة المليانة بالحصى الصغيركشاكيش لايوجد لها مثيل واغاني للحارة الحارة ما مرقت ست الدوكة مافترت تات تات ادونا تلات بلحات كانت امهاتنا يضعن امام باب البيت فانوس اشارة لوجود رحمتات وايضا مجموعة من القلل بها ماء باااارد وبلح وكان علينا ان ناكل الفتة وبعدها ندعو للذين رحلوا لي دار الخلود ونشرب الماء البارد ونحمل البلح في جيوبنا ونكسر القلل امام الباب وتنكسر الشرور وتذهب الاحزان بعيدا حسب فهم عقولنا الهشة .. ولاننا طفسين نذهب للبيوت التانية ونحن نغني ونمنى النفس بالتين الاحلى من البلح تين تين ادونا عشا الميتين تحضرني الان ذكرى سعيدة الي قلبي كان يجاورنا صبي (متنفش) وكنا نحسبه عبيط الحلة كان مشاتر نحن نغني اغاني الرحمتات وكان هو يردد وحده اشهر اغنية دكاكينية وقتها..بصوته العميق الاجش (( يارب ترخص الحريم // الخمسة بي مليم )) لكن لامن كبرنا عرفنا كم كان يستشرف المستقبل !!هههههي.. كان أهلنا الطيبون يقدمون البلح للأطفال في( كنتوش )اذا كانت الراحلة بنت ماتت في نفس العام واذا كان رجلا يقدمون البلح في ((قلل )) وكان الصبيان يصومون يوم الجمعة البتيمة ونحتفل بصيامهم في الرحمتات علينا ان نحتفل بها في كل عام .افرحني ان هناك كثير من القرى في بلادي مازالت تحافظ عليها وتسعد بها الكثير من اهلنا .. الرحمتات اصبحت طقسا ثقافيا حتى ولو تحسنت ظروف الناس المعيشية وقلت الحاجة يجب ان نحافظ عليها من الاندثار رمضان شهر خير وبركة وكل ايامه للخير والرحمة ولكن يوم نتذكر فيه بعضنا ونترحم على من فقدناهم ونتوصى بمن حولنا علينا ان نحافظ عليه به نحقق الكرم والتواصل والتعاضد واشاعة المحبة .. رسولنا الكريم اشرف الخلق وخاتم المرسلين قال : (( في كل كبد رطبة أجر )) ا الرحمة تات .. الرحمة اتية او تاتي ..
|
|
|
|
|
|
|
العنوان |
الكاتب |
Date |
حـــتــى لا ننـســـى (1) الرحمة تات .. | محمد سنى دفع الله | 07-25-14, 11:52 AM |
Re: حـــتــى لا ننـســـى (1) الرحمة تات .. | عمر عثمان عبد الوهاب | 07-25-14, 12:21 PM |
Re: حـــتــى لا ننـســـى (1) الرحمة تات .. | د. ياسر عبد القادر | 07-25-14, 12:33 PM |
Re: حـــتــى لا ننـســـى (1) الرحمة تات .. | محمد أبوالعزائم أبوالريش | 07-25-14, 12:47 PM |
Re: حـــتــى لا ننـســـى (1) الرحمة تات .. | عمر عثمان عبد الوهاب | 07-25-14, 01:02 PM |
Re: حـــتــى لا ننـســـى (1) الرحمة تات .. | ناصر احمد الامين | 07-25-14, 12:50 PM |
Re: حـــتــى لا ننـســـى (1) الرحمة تات .. | احلام وهبي | 07-25-14, 01:35 PM |
Re: حـــتــى لا ننـســـى (1) الرحمة تات .. | محمد سنى دفع الله | 07-25-14, 01:52 PM |
Re: حـــتــى لا ننـســـى (1) الرحمة تات .. | محمد سنى دفع الله | 07-25-14, 02:03 PM |
Re: حـــتــى لا ننـســـى (1) الرحمة تات .. | اسامه العريفي | 07-25-14, 01:57 PM |
Re: حـــتــى لا ننـســـى (1) الرحمة تات .. | عبدالعزيز عثمان | 07-25-14, 02:07 PM |
Re: حـــتــى لا ننـســـى (1) الرحمة تات .. | محمد سنى دفع الله | 07-25-14, 02:25 PM |
Re: حـــتــى لا ننـســـى (1) الرحمة تات .. | Osman Musa | 07-25-14, 04:11 PM |
Re: حـــتــى لا ننـســـى (1) الرحمة تات .. | محمد أبوالعزائم أبوالريش | 07-25-14, 07:35 PM |
Re: حـــتــى لا ننـســـى (1) الرحمة تات .. | محمد أبوالعزائم أبوالريش | 07-25-14, 07:39 PM |
Re: حـــتــى لا ننـســـى (1) الرحمة تات .. | علي عبدالوهاب عثمان | 07-25-14, 08:19 PM |
Re: حـــتــى لا ننـســـى (1) الرحمة تات .. | محمد سنى دفع الله | 07-26-14, 09:38 AM |
Re: حـــتــى لا ننـســـى (1) الرحمة تات .. | haroon diyab | 07-26-14, 10:19 AM |
Re: حـــتــى لا ننـســـى (1) الرحمة تات .. | haroon diyab | 07-26-14, 10:21 AM |
Re: حـــتــى لا ننـســـى (1) الرحمة تات .. | haroon diyab | 07-26-14, 10:23 AM |
Re: حـــتــى لا ننـســـى (1) الرحمة تات .. | haroon diyab | 07-26-14, 10:24 AM |
Re: حـــتــى لا ننـســـى (1) الرحمة تات .. | درديري كباشي | 07-26-14, 10:16 AM |
Re: حـــتــى لا ننـســـى (1) الرحمة تات .. | محمد سنى دفع الله | 07-27-14, 11:56 PM |
Re: حـــتــى لا ننـســـى (1) الرحمة تات .. | محمد سنى دفع الله | 07-28-14, 00:26 AM |
Re: حـــتــى لا ننـســـى (1) الرحمة تات .. | نادر الفضلى | 07-28-14, 10:18 AM |
Re: حـــتــى لا ننـســـى (1) الرحمة تات .. | حمد اسماعيل | 07-28-14, 11:22 AM |
Re: حـــتــى لا ننـســـى (1) الرحمة تات .. | محمد سنى دفع الله | 07-29-14, 10:30 AM |
Re: حـــتــى لا ننـســـى (1) الرحمة تات .. | محمد سنى دفع الله | 07-29-14, 10:39 AM |
|
|
|