|
قصيدة واقعية وصريحة و نابعة من ضمير انسان صادق غير مزيف ولا منافق..
|
هضربات قسرية هاشم صديق
تلقى ( خرابة ) ما تلقى ( الوطني ) تلقى ( الوطني ) ما تلقى ( خرابة ) تتلفت حاير تلقى ( الشعبي ) جادع أيدو ويقلب صلبو تقول لي روحك اريت ( الشعبي ) (ده ود التابا )
البلد اتلحست محل ما تقبل تلقى (النقة ) محل ما تعاين تلقى خرابة ومسطول في الشارع يهتف ويصرخ فكيتو الصادق فكو الموية فكيتو الصادق اعتقلو السوق ما عندو ( فرامل) او طايوق جاري عجاجو تقول كترابة ادونا رغيفة او تعريفة او خلونا نخش الغابة نصبح نحنا (نوير) او (دينكا) انتو تكونوا ديوش جلابة
فكيتو الصادق فكو ايدينا مما جيتو لعبتو و جطو و(بشبش) (جوكر ) في الكوتشينة محل ما تقبل تلقى حرامي محل ما تعاين تلقى اضينة حرقتو قمحنا شلتو سمحنا وجبتو الشينة اسلامكم كافر فضايح جملة بتملا دفاتر سويتو بلدنا مجاعة ومحنة
البلد اتلحست جنت وبركات سياسة نخاسة الثروة انبرشت دخلت وسكنت جيب الخاصة و الشعب تعيس يجري يناهد ما وصل الميس ماهية حول ما فاتت فول او ( عيش ) في كيس احلامنا بهية نصحى نلاقي عروس الثورة هي (بت ابليس)
الدنيا اتماصت جنت وطشت (الفن اتلجن) الوطن اتمحن لا فن لا كورة (فنان الثورة) صبح (ماسورة) والحرية قصية عصية ريحة شية لا تضوق لا تشوفها لاتحلف صادق شفت خروفها (حوار الوثبة) شمار في مرقة وعجين لي (كسرة) ما بعمل طرقة
فكيتو الصادق فكو حصارنا ادونا اذن لهتاف او مرقة كفاية كضب وغباش ولعب (الوثبة) وهم سيفا خشب (حصانها حمار) و وعودها شمار وغباشها الدرقة
مليون شاعر وما مرقت زفة مليون خطبة ولا خاطر رفّ جوادنا يبرطع وماشاف اللفة السلطة عقيمة ربع قرن وماجاتا (الدورة) الفين (جيفارا) ولا كبر شارع لا انفجرت حارة لا (هبت ثورة)
مليون (لبوة) رافعات كرعينن للمال و السلطة والليل متمحن في ((.........)) اسطى دعارة شطارة وعريانة (الضروة) سبحان الدايم شعار الدولة الدين و التقوى و(لباس ) الوالي ما غطى العورة
البلد اتلحست طشت و جنت محصولنا الرسمي الغنا و(الرّهّزي) وفي رمضان لو ترفع طوبة او تدخل فجأة حصير راكوبة تلقى مقنقن (ودفنان)
محصولنا الرسمي غنا رمضان (قناة كاكومة) (قناة كركوبة) (قناة كتلونا) (قناة مرضونا) غنا والحان بالكوم واطنان برامج تهرج و الكل تيمان
و(قناة برجوبة) (حاجة عجوبة) وضيف الحلقة دكتور(راكوبة) معاهو مغني (لؤي ود هوبة) دراما الشاشة مسيخة عوارة بعد ما مشينا وقلنا وصلنا رجعنا نترتر وقعدنا بركنا لافن لابصارة دراما غبية لا بتهبش هم لا بتروي قضية تورجق وتشخر تقول حنفية ياحليل المسرح و الحرية هموم الامة والثورية
تلقى (خرابة) ما تلقى (الوطني) تلقى (الوطني) ما تلقى (خرابة) تتلفت حاير تلقى (الشعبي) جادع ايدو ويقلب صلبو تقول لي روحك اريت (الشعبي) (ده ود التابا)
|
|
|
|
|
|
|
|
|