عليكم الله .. ندى القلعة دي بتنسمع كيف؟؟

Quote: عزيز كيفك يا زول طبعاً قصة الفن، والغناء بتحتاج لمعايير بتاعة استماع، أها البخت المعايير دي (الجمهور) يعنى الببقي أي فنان فنان أو مغني مغني، هو الجمهور البيستمع ليهو، ما دام عندك جمهور معناتها إنت زول فنان ومطرب وغنّاي (حسب المعيار الجماهيري. وهناك التعريفات الأكاديمية و(الطبقية) آي الطبقية الواحدة دي، وهي أن طبيقة محددة من المجتمع تضع معاييرها لمال ينبغي أن يكون عليه (الغناء)، زي التعريفات البنسمعها (غناء راقي) مقابل (غناء هابط)، والقصة دي تقسيم طبقي مرتبط بالطبقة الإجتماعية. طبعاً المعايير (النقدية) بتكون عندها مقاييس لما هو سائد، يعني بكون عندها (ستاندر) بتقيس عليه، الموسيقى والكلمات وغيرها والصوت. وبالتالي بيتم تصنيف الغناء وغيره. هسع الكلام بتاعك دا عن ندى حتلقى في ناس متفقة معاك فيه، وفي ناس مختلفة. أنا شخصياً الغناء بالنسبة لي طرب، وبالتالي أي أغنية تطربني بتعجبني وممكن اسمعها، وزي ما قلت قبل كدا في بوسٍ ما، أغنياتي المفضلة بينها (هام ذاك النهر يستلهم حسنا) واللابس البمبي، وحمادة دا لحنان بلو بلو، وإنت ماشي وين كدا لورا لبلال موسى وشال النوار، وحب الناس للخالدي، وكل اغاني النور وخصوصاً (يا وداد مليون سنة). يعنى أنا بعجبني كتير من الغناء(عاليه وواطيه حسب وجهة نظرك المحكومة بموقعك الاجتماعي). وكإجابة سريعة البقى ندى القلعة فنانة هو جمهورها الذي يستمع لها ويساعدها على الحياة من خلال طلبه المتزايد عليها مما جعلها من اكثر المغنيين عائداً. بالطبع مع تمام احترام وجهة نظرك (حسب مقاييسك أكاديميةٍ كانت أم عرفية) في أن ندى لا علاقة لها بالغناء، ولا صوت ولا معرفة بالإداء (على الأقل كما تعرّفه أنت وفقاً لمعاييرك)