للعضو عزيز بخصوص طه سليمان مع الود

Quote: الأعـزاء عبد الحفيظ، وعبد العـزيز.. أو حفيظ، وعزيز.. وعلى فكرة فأصدق أصدقائي إسمو عبدالحفيظ ونناديه حفيظ علاوة على الإسم السري الخاص بالشلة !.. بداية طبعاً من نافلة القول ذكر ما تناوله الأصدقاء عن جميل تحاوركما والنقاش الراقي والإحترام الكبير المتبادل والذي يذكر الكتيرين بسنوات البورد الأولى الخ.. في الحقيقة لم أتابع بقية البوستات التي تناقش نفس الموضوع لكن في البداية أرجـو أن أؤكد ما ذكره الصديق عزيز عن طه كفنان جيد وذو إمكانيات فنية (ومادية؟) عالية وبمقدرته الكبيرة في ترديد أعمال الكبار عثمان حسين والجابري وكابلي الخ، وتكلمنا كتير عنه السنة الفات في بوست (أغاني وأغاني) وعزيز متابع ومشارك في ذلك البوست.. أما الكلام عن ترشح طه للرئاسة في البداية أقول إنو كلامي دا، وربما كلامنا كلنا بعتبرو مجرد (ونسة) لأنو زي ما قال عزيز فطه لم يعلن عن نيته تلك بشكل رسمي وأنا بصراحة لا أثق في ما تكتبه الجرايد السودانية التي أصبحت تعمد كلها تقريباً للإثارة لجذب القارئ أو بالأحرى المشتري، ولم تعد الإثارة والعناوين الجاذبة والكاذبة حكراً على الصحف الإجتماعية والرياضية زي ما كان زمان. والحاجة التانية البتخليني آخد الموضوع كونسة هو ما أشار له الأخ سيف النصر في بوست سابق بمعنى: هي وينا الإنتخابات؟ ونحن هنا كمن يضع العربة أمام الحصان كما يقال أو نضع الراكب تحت الحمار زي ما قال أحمد مطر!.. عشان كدة حتى عندما سألتني صديقة عن راي في موضوع ترشح طه قلت ليها: ماهو رئيسنا برضو شغال رقيص وغنا وهجيج، لكن في نفس الوقت شغال قتل ونهب وحرق وجرايم حرب الخ، عشان كدة أحسن لينا رئيس يكون شغال هجيج بس!.. عشان كدة بقول خاصة للناس الضربو مثل بالرئيس ريغان الممثل درجة عاشرة بقول ليهم إنو السودان ما أمريكا.. وبالمناسبة يستفزني ما يقوله ناس الحكومة وأنصارهم كل ما أعيتهم الحجة يقولوا ليك: ما أمريكا برضو كدة الخ... فأمريكا مافيها حروب في كل جهات البلد ولا ملايين النازحين، ولا ملايين الطلبة الما لاقين تعليم ولا أكل في قلب العاصمة، لا فقط في الأقاليم النائية.. ولا ملايين الفقراء الما قادرين يحصلوا على علاج لا بقروشهم (وهم أصلاً ما عندهم!) ولا من وزارة الصحة المسؤولة أصلاً عن علاجهم ولا ملايين الخريجين العاطلين ناهيك عن الملايين الآخرين من غير حملة الشهادات العليا الخ الخ..وللدقة نعم أمريكا وأي دولة في العالم فيها عطالة خاصة مع الأزمة الإقتصادية العالمية لكن الدول المحترمة تعمل بجد لمساعدة عاطليها و لتحفيز الإقتصاد حتى يحصلوا على عمل مناسب .كما أن النسب لا تتجاوز العشرة في المية في غالبية الدول... فإدارة الدول دي فن قائم بذاته في إعتقادي وفي الدول المتحضرة بنتبهوا للطلبة العندهم مواهب قيادية وبأهلوهم لتولي المناصب العليا.. في فرنسا مثلا معروف أن الرئيس الحالي قابل صديقته السابقة والمرشحة السابقة للرئاسة رويال في مدرسة خاصة بتأهيل الطلبة الموهوبين للقيادة.. ومجرد كون فنان ناجح (كفنان) لا تجعل منه سياسي ناجح، حتى لو عرف بإهتمامات سياسية أو بأغانية الثورية والوطنية مثل الراحل العظيم وردي الذي شارك في المظاهرات ودخل السجون والمعتقلات وعاش في المنفى الخ، لكن دا لا يعني بالضرورة أن وردي كان ح يكون سياسي أو رئيس ناجح ناهيك عن شخص زي ما ذكر الأخ عبد الحفيظ لم يعرف بإهتماماته السياسية مثل الفنان طه سليمان.. ميزة الفنان المغني أو غيرو إنو هو ممكن ينجح كشخصية محبوبة ووصوله لسدة الحكم سيكون دافع لمحبيه الكثر للعمل بإخلاص وجدية وهمة عالية رغم أن هناك تجارب أيضاً في دول أخرى لمحاولات لفنانين أو شخصيات عامة شهيرة حاولت خوض غمار السياسة ولم تنجح في الوصول أو حتى لم ينجحوا عندما تولوا مناصب وزارية وقد تقدمت الإشارة لمحاولة الفنان السنغالي الشهير يوسو ندور في الوصول للرئاسة .. وفي هايتي رفضت سلطة الإنتخابات حتى طلب الترشح للفنان الشهير Wyclef Jean رغم دوره في العمل الخيري خاصة في كارثة الزلزال على ما أظن.. أنا أظن أن التخصص والإحترافية مهم رغم إنو الحاجة دي ما عندنا كتير كسودانين بصفة عامة.. وزي ما قلت فوردي ذات نفسو أخد مكانته المستحقة وشهرته بسبب فنه من ألحان وأداء وصوت وإختيار للكلمات الخ وليس بسبب مواقفه أو آرائه السياسية لا بل ولا حتى آرائه الفنية.. وطه سليمان وغيره ينطبق عليهم الشئ ذاته رغم أن هناك سياسيين شهيرين من الأطباء مثلاً أو المهندسين، لكن ديل هم في الحقيقة (سياسيين) إمتهوا الطب أو الهندسة الخ.. وعليه أعتقد أن طه لو إستمر في أداء رسالته كفنان وتجويد أدائه وتطويره كما يفعل الآن فهو أفضل له ولنا كجمهور حتى لا نفقد طه الفنان ونخسر طه السياسي!.. وفي النهاية وعزيز عايش في هولندا ومتابع للشأن السياسي سواء هنا أو في الديمقراطيات الغربية عموماً فالفوز في الإنتخابات هو لمن يقنع الناخبين ببرنامجه السياسي وعشان كدة في الغرب بتلقى الناس غالباً قسمين أو حزبين كبيرين (مش كم وسبعين حزب زينا!) يسار ويمين، عمال ومحافظين أو ديل بقولوا نزيد الضرائب وديل عايزين ينقصوها الخ؛ أو زي الرئيس أوباما وبرنامجو للرعاية الصحية والجمهوريين ال ضده لأن الفقراء هم المستفيدين.. الخ الخ .. لأنو زي ما قلت فوق ما عندهم ماشكل كبيرة زينا.. ونفس الناس البفوّزوا حزب معين هم نفهم البسقّطوه في الإنتخابات الجاية وبصوتوا لحزب آخر إذا لم يحقق الحزب وعوده الإنتخابية أو كان دون مستوى طموحهم كناخبين الخ.. عموماً آسف لأن كلامي ما مرتب لكن بكرر بس داير أتونس معاكم شوية والدنيا سبت وصاحي بدري :).. ولكم الود جميعاً..