إعترافات أصلع : بلا تيسير عووضه بلا طحنيه !!!!

Quote: وما تتخيل كم كانت دهشتي عظيمة واحباطي اعظم عندما قابلت طلحة تنظير للمرة الأولى و اكتشفت أن لاصلعة له ولا كرش حتى سالتو إنت قاعد تنظّر كيف يازول وأنت تفتقد الأدوات اللازمة لذلك ولولا إنو لقب تنظير سار عليه و خال لسحبته عنه بلا تردد

.. والله الكلام الفوق دا ما يكتبو زول إلا يكون عندو صلعة .. الأخ مع ناس أمين ديل في الجمعية دي ..؟ طيب داسيها مالك ..؟ ..
يا أمين ..
أول ما انتهيت من قراية البوست حقك دا .. اتحسست راسي طوالي .. .. ياخ كتابتك عميقة ومعبره بتدل على انك متصالح مع (شعــورك) .. التحية للطحنية ولي تيسير عووضة .. التي رمت حجرا في بركة السكون وفتحت الباب على مصراعيه لمناقشة هذه القضية الحساسة..
من ناحية أخرى ..
والله انا متضامن معاكم شديد .. لانو قبل كدا جاتني صلعة مؤقته .. (سعلبه) .. تلاتة شهور انا شايف ليك الدنيا دي مسيخــه خلاص .. اي زول اللقاهو حالق يا بيسرح في شعرو .. بخط تحتو مية خط .. قطعت علاقاتي مع اي زول بيعمل (قطعية) .. الهنود والفلبينيين ديل بشتبك ليك معاهم بدون اي سبب
المهم
طلعت من التجربة دي بي فهم جميل وفلسفة عميقة .. إنو الصلعة دي حاجة اصلو ما كويسة
ولذلك ..
ما تشبكنا متصالح مع نفسي .. والعلماء وتقوم تصنف لينا أنواع الصلع كمان .. يازول الصلعة دي تجي للعدو عديل كدا ..
والله يا امين الواحد كان يتمنى إنو يقول كلام غير دا .. لكن دي النجيضة حقتي .. والموضوع دا ما بجامل فوقو لاني جربتو .. وشفت الفرق بين إنك ما يكون عندك شعر .. وبين عندك شعر تتحكم فوقو وتسرح بي الطريقة البتعجبك ..