اعتذار حار لي بت حلتي مني عوض خوجلي!

Quote: العزيزة مني، لو سمحتي عليكي الله، نقطة نظام: واضح انك فاهمة الانا عملتو غلط. بمعني، مفهوم الاعتذار، لدي شصي يختلف فيما بدا، اختلاف جذري عن مفهومو لديك. علي كده خليني اوضح ليكي وللقارئ، انا جاي من وين، وبالتالي حيكون من السهل معرفة انا ماشي وين! اها يا ستي الاعتذار والكلام ده موجود في الارشيف، بالنسبة لي، هو في الاساس اعتذار لي حاجاتي انا لي روحي في المقام الاول، ثم بعد داك للذي تضرر من سلوكنا. بمعني، زي كل زول اخوكي حاكماه قيم ومثل محددة، بحاول يلتزم بيها ما امكن ذلك! اها لما في لحظة معينة افشل، الزويل الاسمو الضمير ده، جواي، ما بريح ولابجامل تب، او ببقي لي في التولا لاني اخلّيت في لحظة بعينها بي مبدأ معين من مبادئي او مثلي الحاكمة لسلوكي! عشان كده هو البقول لي، هوووووي يا كمال انتا غلطا هنا، مع فلان، لازمك اعتذار فوري! اذن لحدي الثانية الانا بضع فيها نقطة في السطر الاخير او قبل ما ادوس post الاعتذار ده، حقي انا، لي حاجاتي انا! ثم بعد داك للزول ولا الزويلة المقدم ليهو الاعتذار! بالفهم ده، هذا الاجراء غير مشروط بالمرة بالنسبة لي او المفترض يكون كده! بمعني لايهم كثير الزول المقدم ليهو الاعتذار يقبل او يرفض هذا الاجراء من جانبي! لانو ما حاسحبو او اغير رايي لو مني خوجلي مثلا رفضت تقبلو! ابدا سيظل هذا الاجراء قائم، بغض النظر! لذا استغربت شديد من تساؤلاتك، تشكيكك، والاغرب الشروط اعلاه، فوق للمطالبة ان اغير قناعتي وماشابه! اها ده كلو عشان تقبلي اعتذاري الاصلا ما مشروط؟ اذن اكيد انتي فاهمة تصرفي ده غلط، لانو منطلقاتك ومعاييرك في الحتة دي مختلفة، وده من حقك طبعا! فقط ما تحكمي علي تصرفات الاخرين انطلاقا من قناعتك انتي يا شقيقة! اتمني تفهمي كلامي ده بالصورة الانا قاصدة او ما تمشي بعيد! نعم من حقك ترفضي او تقبلي الاعتذار، ولكن فقط تذكري انو بالنسبة للطرف الاخر وبذات القدر، هو ممكن يكون منطلق من ارضية مختلفة تماما كاللتي اوضحتها. اذن لو انتي شاكة في هل بشاشا غير خطابو ام لا بالنسبة لي فهذا لاعلاقة له باعتذار بشاشا، لانو غير مشروط. بخلاف كده مرحب بي تقيمك لي خطاب بشاشا الجديد المعلن عنه منذ سبتمر 2011، وارحب بشدة بي تقييمك ولكن بعيد عن الخطوة الانا اتخذتها، والمتصلة باعتذاري لشخصك! اما قسوتي في الماضي عليكي وعلي كل خصوميي الفكريين، فوضحنا ان هذا كان تكتيك محدد واسلوب ابتدعناه بغرض تحقيق اهداف بعينها، انطلاقا من فهم محدد. يعني كان شغل مدروس او مش قساوة طبع! اذن اسلوب الصعق الكهربي والوخذ بالابر الكوشية، كان مجرد اداة استخدمناه في زمن بعينو، لاحراز نتائج بعينها، في ساحة للصراع الفكري، وهذا يثبت انو ما كان في شئ شخصي في الاسلوب ده اطلاقا، والغالبية الساحقة من القراء والزملاء تفهمو وتقبلو كلامنا ده وتفسيرنا هذا لذاك الاسلوب. ده بخلاف اني كررت ليكي انتي لاتختلفي عن اخواتي في البيت من حيث طريقة التفكير، وبالتالي فما تاخدي الموضوع بي صورة شخصية! اتمني اكون قدرتا اوصل ليكي الجواي، او بي كده تكوني عرفتي انا جاي من وين في حتة اعتذاري ليكي، وبالتالي ماشي وين. معزتي.