بعد كدا الواحد جاتو قروش كتيرة ..

Quote: دونتاى!!..يأخ أنا هسع قايلك قريت فى الكمبونى وخاتيك فى اللستة العايز أرفعها لبكرى بتاعت (منبر أولاد قلبها) تقوم تجيبها مصرجة.. المنبر كلوا بقى ولد أبا وسعون ورواكيب وتمر وزرائب وجروف..تقول برنامج (صور شعبية)

يا حاتم قلنا ليك ياخ نحن شغالين ليكم بي نص طاقتنا وقليل من الثروة .. متواضعين شديد .. حسع امسك معظم الراسمالية الحايمة في البلد دي الواحد تمسك الوالي فيهم يقوليك من فداسي .. والارباب فيهم يقوليك من شندي وراشين كنجالات عجيبة في المحترفين الاجانب يعني بقت علي انا المسكين دا ..؟
بعدين يا حاتم انا في رحلة بحثي عن شجرة العائلة اكتشفت انو عندي حبوبتي اسمـه ( سريتي ) اها سريتي دي يا هداك الله من اسماء الشناقيط وما اي شناقيط الشناقيط القنادلة جدا وعندهم بهايم في ضهر بيتم وتحت تحت كدا ذاتو ملاقيه في الناحية التانية في الاصول الاسبانية
يعني يا حاتم حسع دي كان ما الواحد متواضع ليكم زي الوكت دا كان بكون بكتب مع (ميسي وانيستا وبيدرو) في بورد واحد
ولو بتدي حريف زي جدنا الكجونكة دا .. حسع دي كان يكون عندو ضيعـة في تل الزعتــر يا شارع في ملقــا مسجل بي اسمو اهو قاعدين نضرب معاكم في ملاح النعيميـة والباميـة الكاويك

بعدين شان اوريك انو دونتاي دي واحدة من المقاطعات واراضي اقطاعية خاصة بالنبلاء والاقطاعيين اديك الميزة دي .. عن دونتاي
حيث يقال ان الاصل في كلمـة دونتاي هو الكلمـة الانقليزيـة don't tie وهي ترجمتها الاقرب للحرفيـة .. لا تربط
وحسب روايات اهلنا في المنطقـة ان الاسم تحول وتحور من تلك المفردة .. امسك مثلا عندك (البرتغال ) كانت في الاساس اسمها البرتقالة .. ثم صارت برتغالة ثم اخيرا البرتقال
والمفردة اطلقت على المنطقـة فترة حملات الدفتردار الانتقاميـة حيث بعدما حرقنا ليكم الباشا ونحن ناس مساكين ساكت ما عندنا صواريخ ارض ارض ولا كروز ولا راجمات قام اهلنا بالنزوح بالمراكب على النيل واستقروا بعيدا على ضفاف النيل في تلك القريـة الوادعـة .. وعندما استمرت الحملات كانت مبنية على الحرق والقتل بدون سابق معرفـة .. ولما نزل تلكم النفر في تلك المنطقـة بنية قتل اهلها .. وقفو على مشارف القريـة وعندها لم يجدوا إلا دخان النيران وبقية البهايم يعني بي صورة اوضح كان في شغل ميتافيزيغي عجيب جدا وشغل باراسايكولوجي ... الجماعة ديل عارفين انو في ناس لكن ما شايفنهم .. كانو جميعهم invisible ... فالقايد قاليهم عبارته الشهيرة don't tie يعني لا ترسي في هذا المكان وما تربط البارجـة خلينا نشوف غيرم فعادوا بادراجهم واتخارجوا .. اها الميزة دي بتلقاها في العديد من قرى القرآن في السودان يعني بي صورة اوضح .. ما تدخل الحلة إلا يدوك الفاتحـة تجي تلقاها فاااضية من البني ادميين غير الدخان والنيران وكم راكوبـة ..
اها يا حاتم بعد الرحلة التاريخية دي حقو .. تجي تتبرك فيني يعني سلطـة وثروة ..