|
Re: ونسة دين (Re: كمال سالم)
|
Quote: في البورد دا اتونسنا وكتبنا في اي حاجة الا الدين اول ما تجي السيرة بتلقي البوست حتل والناس اعلنت مللها بتجنب مثل هذه البوستات |
أساسى ,, كل سنه وإنت طيب يأخ ورمضان كريم . طالما الموضوع ونسه فى الدين خلينا نتونس : عادة يوم الجمعه بعد فطور زمان المجيه داك بديها نومه لحدى قريب صلاة الجمعه كده أها يوم جمعه وأنا نائم جات بتى صحتنى قالت جاك ضيف ومنتظرك فى الصالون ,, صحيت وأنا زهجان لأنى قطعت النومه والصلاه لسه باقى ليها زى ساعه كده ,, دخلت الصالون ولقيت الضيف صاخبى ( على ) بعد السلام والمطايبه والونسه إستأذنت منو دقائق عشان أمشى أجهز للجمعه . وكانت المفأجأه حينما فأجأنى بعدة أسئله غريبه لأول مره أسمعها فى حياتى . ومن هنا تبدأ الونسه !! قال لى : ماشى تجهز لشنو ؟ قلت ليهو لصلاة الجمعه . قال لى : والجمعه دى الفرضها منو ؟ قلت ليهو الله طبعا . قال لى : الله قال شنو لما فرض الجمعه . قلت ليهو الله سبحانه وتعالى نزل سوره كامله عن الجمعه ,, وقال فيها ( يا أيها الذين آمنوا إذا نودى للصلاة من يوم الجمعه فأسعوا إلى ذكر الله وذروا البيع ذلكم خير لكم إن كنتم تعلمون ) . قال لى : ذروا البيع ,, ما ذروا الظهر ؟ قلت ليهو نعم ذروا البيع . قال لى : طيب الظهر ده ليه لغيتوه يوم الجمعه طالما إن صلاة الجمعه صلاه قائمه بذاتها . وطالما إن الله لم يأمركم بإلغائه . طبعا لم أستطع الإجابه ,, وكأنما أصابنى بكم . وعندما أحس بضعفى عاجلنى بضربه قاضيه أخرى وقال لى : الله قال شنو بعد ما تنتهوا من صلاة الجمعه ؟ قلت ليهو تكملة الآيه وهى ( فإذا قضيت الصلاة فأنتشروا فى الأرض وأبتغوا من فضل الله وأذكروا الله كثيرا ) . قال لى : وهسه إنتو لمن تنتهوا من الصلاه بتنتشروا فى الأرض وتذكروا الله ولا ببتمشوا تلعبوا الكتشينه ؟ وأردف قائلا الإنتشار ده فى الصباح الباكر يعنى مافى مخلوق فى الأرض بينتشر الساعه 2 ظهرا ,, فالطير والأنعام والإنسان كلهم بينتشروا فى الصباح الباكر ليبحثوا عن رزقهم . قلت له ماذا تقصد ؟! قال لى بكل برود إن هذا الموعد الذى تذهبون قيه لصلاة الجمعه غير صحيح فصلاة الجمعه موعدها بعد صلاة الفجر بساعه . هنا أنا تضايقت وبدأ صوتى يعلو وقلت له إختشى ياعلى ,, أتعنى إن كل أمة محمد هذه على خطأ ,, من أين أتيت بهذا الكلام يا على . قال لى الرسول صلى الله عليه وسلم كان يصليها بعد الفجر . قلت له طالما الرسول ( ص ) صلاها بعد الفجر فكيف إذا نحن نصليها فى الظهر ؟ قال لى ,, بعد 200 سنه من وفاة الرسول تولى أمر المسلمين أمراء فاسدين يسهرون الليل مع زرياب والموصلى وبدلا أن بصحوا مبكرا لصلاة الجمعه فإنهم ينامون حتى الساعه 12 ظهرا ولما كان خليفة المسلمين هو من يؤم المصلين فكان لزاما على الناس أن ينتظروه حتى يستيقظ . وهكذا صارت صلاتكم فى منتصف النهار . تعجبت كثيرا لهذا الكلام وكان آذان الجمعه قد أذن فطلبت منه أن نصلى ونعود لنكمل نقاشنا إلا أنه قال لى أذهب وأعصى ربك لوحدك فأنا قد أديت صلاتى فى موعدها , تركته وذهبت وأنا أفكر فى هذا الحديث الذى كنت قد سمعته لأول مره ,, والحديث طويل سأذهب إلى الصلاه وأعود لنكمل باقى الونسه . تحياتى .
|
|
|
|
|
|