تملك شقة في الخرطوم بأرخص الأسعار - السكن التعاوني

Quote: الفكرة ناجحة جدا ومجربة لانها باختصار شديد تقسم اكبر واصعب مرحلتين علي اربعة شركاء وهي مرحلة شراء الارض ومرحلة التاسيس، التكلفة التقديرية للمباني في السودان هذه الايام مرحلة التاسيس حتي القريت بيم والردم حوالي 100 دولار للمتر المربع مرحلة الاعمدة والسقف حوالي 70 دولار للمتر المربع يعني لو مساحة المباني 200 متر مربع تكلفتها 20000 دولار مرحلة الهيكل حتي سقف الارضي حوالي 14000 دولار والدور الثاني مثله مضافا علي كل مرحلة حوالي 30بالمائة للمقاول والاشراف وينصح بتنفيذ اي مرحلة مما ذكر كاملة دون توقف وبعد ذلك تاتي مرحلة التشطيب ودي تختلف اختلاف كبير حسب رغبة كل شخص وقد تتراوح بين 150 الى 250 دولار لذلك ينصح بالشراكة حتي مرحلة المباني ويترك التشطيب الداخلي لكل حسب ميوله وامكاناته ودي طبعا كلها اسعار تقديرية لوضع تصور مبدئي يعني التاسيس والهيكل لدورين بمساحة بناء 200 متر مربع حوالي 48000 دولار مع المقاولات والاشراف حوالي 60000 دولار اذا اخذنا الارض حوالي 40000 دولار يصبح الاجمالي 100 الف دولار لاربعة شركاء 25000 دولار لكل وفي مدة حوالي ثلاثة اشهر يكون باقي التشطيب بس، ومحتاجين محامي فقط لموضوع عقود الشراكة فقط وبقية المراحل تسلم لمهندس بعقد واضح وغالبا يتم توزيع الشقق بالقرعة وتكون الارض والخدمات شراكة حسب نظام الشقق التمليك اتمني ان اكون قد افدت وعذرا علي الاطالة

Quote: اسه كان كتبت كلمة (زملاء) كان الله حا يحاسبك

لكن فرق يا ناصر بين الأخوان والزملاء هنا في زملاء ما عندهم أمل يرجعوا السودان ولا بفكروا فيه والسودان عندهم بس يفتحوا البورد ويقفلوه لكن ليهم سنين وحا تجيهم سنين ما يفكروا يقطعوا تذكرة يمشوا السودان ... ولو مشوا السودان زيهم وزي اي سائح .... وديل الفكرة دي عندهم هراء وكلام فاضي وضياع قروش بس
كلامي للأخوان الهمهم السودان وعارفين انه مصيرهم يرجعوا ويعيشوا حياتهم واولادهم معاهم ويندفنوا في ترابه ديل ياهم الأخوان الحا نرجع ليهم ونجاورهم ونخاويهم وناكل ونشرب معاهم ونقاسهم الافراح والاتراح
الزملاء ديل كلامهم هوائي ساي والبعرفوه عن السودان ياها الاخبار الناقصة والمشوهه والمبتورة والفجاجة بتاعت الفيس بوك البتكبوها شفع المغتربين الما عارفين كوعهم من بوعهم
يا ناصر كنت قايلك حا تتكلم عن الموضوع والفكرة لكن خليني ادخل بيك للوجع الجد جد
يا ناصر بي مشياتي للسودان اكتر حاجة كانت بتألمني مسألة الورثات والبيوت القديمة والمشاكل بين الأخوان والاهل والمحاكم والقضايا مرة اتوفت مره في حلتنا عملوا تلاته عازاءات الاخوات متقاطعين بسبب الورثة ومشاكلها كتير ما بقعد مع صديق يشكي ليك من ظلم اخوانه ومشاكل الورثة والمضايقات حاجة مؤلمة قدر ما عمل الأباء عشان يلموا الاولاد ونحتوا الصخر لبيت يأؤي الذرية بقى البيت سبب فراقهم وعذابهم وهمهم ومشاكلهم
بقت الورثات لعنة منعتهم يتقدموا ويعملوا بيوت كل واحد يفكر في الورثة وكلهم طمعانين فيها ومساكين فيها خلوا طموحهم وبقوا مركزين عليها لمن ضاعت عليهم الفرص لا قدموا لي خطط اسكانية لا سعوا يتملكوا ارض
تاني حاجه يا ناصر مشاكل المغتربين الحاصلة والما بقدروا يحكوها ويقولوها قبل ايام قابلت صديق قديم قعدنا نتونس سالته من صديقة قال لي بي كل حزن ياخ الزول دا في السجن استغربت واندهشت لانه الزول دا من اوائل الناس الكانوا هنا في الامارات وكان شغال في وظيفة في جهه حكومية معروفه حكي قال لي انه الزول دا انهيت خدماته للتوطين وانتقل اشتغل في شركة قطاع خاص بمرتب ضعيف جداً مع مصاريف السكن المدارس اصبح مديون ومطالب بي قروش كتيرة واسرته معاه طوالي سالته ليه الزول دا لمن انتهت خدماته ما ودى اولاده السودان ؟ قال لي ما عنده بيت
هسع يا ناصر في ناس كتار قاعدين في الغربة دي في اوضاع زي الزفت والطين ساكنين أسوأ سكن وعايشين كالمتشردين عشان ما عندهم بيوت في السودان زي حالة الزول الفي السجن دي بتلاقينا كتير خالس مأسي ما نقدر نحكي عنها واكيد انت لاقتك حالات زي دي كتير
يا ناصر قبل فترة لمن جابو اراضي الوادي الأخضر كنت مستغرب للناس الشفتهم ساكين اراضي الوادي الأخضر معقول الناس ديل بي مرتباتهم العالية ومراكزهم الكبيرة وسنين عملهم الطويلة دي يادوب فرحانين بي قطعة ارض في الوادي الأخضر اندهشت تلقى الواحد راكب برادو ولا كروزر موديل السنة وما عنده ارض او بيت في السودان وفرحان بي قطعة ارض في الوادي الأخضر
يا ناصر خلاس بعد دا السوى بيت في السودان من المغتربين سوا والماسوى ياهو زي الفكرة دي بتباصر ليه ما يركب هنا
خلاس الخليج دا ببح وصل مرحلة التشبع وشغالين توطين في اولادهم وبشوفوا مصلحة مواطنيهم وبعد دا الوافدين ليهم الفتافيت والما بنتبه ويلحق باقي الفرصة حا يلقى نفسه ضايع ساي
يا ناصر بيت الايجار ما حا يمشي معانا السودان ولا حا يبقى حقنا حا يرجع لي اسيادة ونحنا مصيرنا نرجع وقدر ما تسكن فيه وتطول ايامك فيه ما حا تلقى فيه الراحة والطمانينة الحا تلقاها في حقك وملكك وفي بلدك حتى لو عشه وحتى لو عندك بكرة اسعى لغيرة نقاطة تساعدك في تلقبات الزمن وتكفيك شر الحاجة وتبقى مستقبل لي اولادك تكفيهم شر الفرقة والخصام البتعمله الورثات
حتى لو الأنقاذ والكيزان ديل علقنا عليهم أي فشل فشلنا في أننا نعمل بيت ما حا نقدر نعلقه فيهم ولا حا تجي حكومة توزع لينا بيوت ولا شقق خلي المناضلين ديل يكملوا قروشهم ايجار ساونات وصالات ولافتات وندوات يلقبوا لينا الحكومة دي ويجونا نأجر ليهم شقق
والداير يعمل للبلد يعمر ليه بيت لنفسه فيهاهسع بس يكفي عشان ما يجي يبقى عاله عليها بعدين

ما عارفين الشيوعيين ما بفكروا افكار زي دي لييه مش اشتراكيين وبتاعين وهمات زي دي هسع كان فتح البوست دا شيوعي كان دعموه واتمني دعمهم للفكرة دي بس ما يشاركونا لأنه جيرتهم كعبة
الله يقطعهم

Quote: فكرة ممتازة - وانا متبرع بالتصميم المعماري للمبنى !

شكراً يا أيمن والله حا تكون خدمت البلد وعملت حاجه ايجابية جد وخدمت ناس كتار بدعمك للفكرة دي


المحترم مصعب

شكراً على المعلومات المهمة الأوردتها والبتدعم الفكرة وزي ما قلت البناء الجماعي دا بوفر كتير جداً من التكاليف الزول الببني براه حا يدفع تكاليف كتيرة في حالة البناء الجماعي حا تتقسم على المجموعة وتقل التكلفة والميزات التانية برضه تقل مدة البناء يعني الزول الببني براه داير سنين عشان يصل لي مرحلة الهيكل دي اما الجماعي فشهور معدودة بالاضافة لأنه الحقوق بتكون محفوظة بي حقوق معروفة وملكيات موثقة
الفكرة لحدي الأن مرحلة الهيكل بعد داك اي زول حر في التشطيب على كيفه إن شاء الله يخت كرتون هو حر في ملكة لانه خبطتين بتكونن حارات يعني ممكن واحد يكون عنده قطعة ارض وما قادر يبني وعاوز بيت ممكن يبيع قطعة الارض دي ويخش في الهيكل دا ويقفل شويه شويه بي راحه بعد داك ممكن تكون الثقة والتراحم بين الناس يكون فيهم المتسير بين الجيران يساعد الباقين او يتبرع بي تشطيبات مطلوبة للبناية كبياض او حديقة او بلاط اوي اي شيئ او ممكن تكون مساهمة بين الشركاء

شكراً ليك كون قريب ما اوردته مهم خالص وبدعم الفكرة كويس


عبدالوهاب المليك

Quote: سبق أن طرح الأخ الدكتور غلام الدين عثمان الأمين العام للصندوق القومي للاسكان هذه الفكرة على جالية جدة .. وذلك في العام 2010م وذكر أن الأخوة المغتربين تعودوا على السكن في الشقق .. وقد لا يمانعوا أن يسكنوا في شقة في السودان أيضاً .. وفي ظل الغلاء الذي يسود سوق العقار فإنه يتمنى أن يفكر الأخوة المغتربين في البناء الجماعي كل خمسة أو عشرة أشخاص يشتروا قطعة أرض ويبنوا عليها وإذا كان هناك رغبة من الأخوة المغتربين ، فهم في الصندوق القومي للاسكان سوف يدعمون هذا التوجه .. وسيتم التمويل من البنك العقاري بشروط تمويلية ميسرة .. وحوافز تشجيعية من الصندوق القومي للاسكان .. هذا التوجه لا زال قائماً ..

رغم عدم ثقتي في الحكومة وصناديق الاسكان وناس الاراضي وعندي فكرة انهم حرامية بس يمصوا قروش الناس عشان يدفسوا خزينة الدولة بالرسوم وهم عندهم فكرة عن المغتربين سيئة اننا ابقار حلوب كل ما يتزنقوا يجوا يحلبونا لكن برضه شايف عندهم حاجات كويسة زي مشاريع الاسكان الشعبي وشفت ناس اتحصلوا على بيوت شعبية رغم انها في مناطق نائية وبعيدة لكن فرحانين انهم حققوا حلم حياتهم بأقتناء بيت ومجتهدين بكل جد لسداد الاقساط حتى لا يفقدوا حلهمهم مع الاسف كل البنوك عندها نفس الفكرة وما عندها اي مسؤولية اجتماعية ويهمها الارباح البنك القعاري قد يكون مختلف ما في مشكلة نجتهد في الفكرة لو لقيناها ممتازة ممكن نعرضها على الصندوق والبنك العقاري نشوف حا يساعدونا في شنو لو لقيناهم جادين في مساعدتنا تمام ونكون مستفيدين ورباحنين غير كدا يفتح الله وبي ضراعنا بنعمل العاوزنه

Quote: Mu Sab Musab انا لي علاقه بالقنون قويه (زبون محاكم وبرفع قضايا في الايجار وبحضر قضايا تانيه وبقرا الكودات) . وعلاقه بالهندسه دبلوم 3 سنوات وخبره 7 سنوات. وعلاقه بالاداره ماجستير اداره . اها يا الاخو زي دي بسموها شركة مساهمه عامه وممكن تكون بي عقد وممكن تكون بذره لشركه كبيره جدا اذا الاخوه الكيزان خلوك .والغالب تنسرق من المتعافي وزول ممكن ينتفع بي افكار تجيه من الوزاره ومن الوزاره والولايه تقول لي مشروع زي ده.؟.؟.؟. ادوني الشغل ده مستعد اعمل واصيغ العقود لشركة المساهمه العامه صياغة قاون ولوائح شركة المساهمه العامه الاشراف علي التنفيذ وعمل الدراسات الهندسيه والتكاليفيه للمباني

حبابك يازول وشكراً على عرضك ودعمك

ياخ طظ المتعافي والكيزان ديل بسرقوا الفارات والبتساهل في حقة ... والله لو عاوزين نقلع حق المتعافي عيني عينك حقارة وحمرة عين بنشيله لكن حق الناس ما بنفع