السحركة ..

Quote: ذكرتني موقف زماااااان حصل قدامي في واحدة من حافلات الصحافة لمن ركبت الحافلة كانت تقريبا لسة فاضية فا اخترت واحدة من الكراسي السينقل البتكون في نفس خط الباب وقعدت في انتظار الحافلة لحدي ما تشحن .. المهم يا زول جا واحد شفت كدا وقعد في كنبة شكرا هنااااااك في أقصى الركن وبعد شوية قعدت جمبو بت .. بعد شوية الحافلة شحنت واتحركنا .. أنا كنت قاعد بي زاوية بتسمح لي أشوف كل الركاب بما فيهم ناس كنبة شكرا الوراي مباشرة .. وحسيت ليك بي عمك الشفت دا ماااااا قاعد ساي شكلو كدا بهبش وبحاول يدخل يدو والبت شكلها ما متجاوبة معاهو .. لمن وصلنا شارع محمد نجيب البت شكلها اتضايقت شديييييييد قامت قطعت ليك في الشاب دا كف .. طرررراااااخ .. والحافلة الوقت داك صانة صنة شديدة جدا .. ومع صوت الكف الناس كلها اتلفتت ورا عشان تشوف الحاصل شنو .. بما فيهم السواق بقى يعاين بالمراية .. فجأتن .. قام الولد على حيلو وبقى يكورك في البت المسكينة .. بنات قليلات أدب .. ما محترمات بي أعلى صوتو ... البت إتحرجت إحراج مبالغ فيهو والناس الفي الحافلة كللللهم أفتكروا إنو الولد هو الأدى البت كف .. البت عيونا غرغرت وبقت تشيل في نفسَها بي صوت عالي وما عرفت تعمل شنو .. طقطقت للكمساري ونزلت من الحافلة دون أن نتبس ببنت شفة