دعوة لمشاركة تجاربكم الشخصية مع مرض السرطان

Quote: بداية استسمحكم عذرا انا من الناس البتحب تسرد من غير تكلف او تعقيد وعاوزة احكي ليكم تجربتي بتلقائية واترك الحرية للكلمة تطلع بعفوية زيما هي عاوزة (قثدي طبعا الكلمة) ومعليش ما في زول يجي ينتقدني لو سمحتو لاني بحب ادلع الحروف بطريقتي والا يمكن انا لجناء... اولا نفسي افهم سبب العقدة العند الناس وانا اولهم طبعا... من مرض السرطان او حتى مجرد الاسم مع ان المرض دا احيانا بكون اهون بكتير من بعض الامراض المزمنة زي السكر المتاخر او الضغط وووو الخ............ انا كنت من الناس البتخاف من مجرد زكر اسم السرطان وفجأة بين ليلة وضحاها لقيت نفسي بطلة لفلم السرطان المرعب .. عن طريق الفحص المبكر قال لي الدكتور شاكين ان يكون في بداية سرطان بس ما متاكدين تيقنت في اللحظة ديك ان الله سبحانه وتعالى بينزل الابتلاء والصبر في نفس الميزان ونفس الوقت...واللحظة الانهار فيها الناس الكانت معاي لقيت نفسي بتشهد بكل رضا وهدوء وبقى همي الاكبر كيفية اخبار الوالدة وتقبلها للخبر المهم قلت للدكتور انا راضية بهدية ربنا ومستعدة لكل الفحوصات وايضا العلاجات في حال اثبتت التحاليل وجود المرض وفي نفس الوقت طلبت من الدكتور ما يوريني نتيجة التحاليل قلت ليه شوف انت عاوزني اعمل شنو وانا مستعدة ....سبحان الله جاني يقين اني حاتجاوز المحنة دي بجدارة ...اجتاحتني طاقة غير طبيعية واصلا انا معروف عني اني انسانة ########ة وبخاف من شكة الابرة وممكن ابكي يومين بسببها...بعد يومين اتصل علي الدكتور وقال لي محتاجين نعمل عملية بسيطة والحمدلله الامور طيبة جدا وقرر دخولي لغرفة العمليت بعد خمسة ايام من المقابلة...من المفارقات ان كان متواجد في الدوحة الوقت داك (2004) الشيخ الصامت في زيارة من السودان والصدفة خلته يكون ضمن الزوار...طلب يتكلم معاي ونصحني قال لي الموضوع بسيط وما محتاج جراحة ...عمل لي خلطة تتكون من ماء الزمزم و(القرض) الحناكيش يمتنعون والحلبة..قال لي تضعي منها لمدة اسبوع في المكان المقرر فيها العملية...واقري فيها اكبر كمية من الايات القرانية بالذات سورة البقرة...انا شخصيا كنت مقتنعة جدا بكلامه وكنت منحازة لعدم اجراء العملية بس الناس الحوالي اصرو على العملية قلت خلاث ارضي كل الاطراف ....بس كان يقيني الاكبر بان شفائي باذن الله حيكون بالقران وليس بسواه....تحديت المرض...وقررت القهره بعون الله....يوم العملية جمعت اهلي والدكتور وقلت ليه اسمع يا دكتور اجراء العملية بتوقيعي انا ...انا وبس اوع تجي تقول لي لقينا الحالة مستفحلة واخدنا توقيع ولي امرك....لقيت الموضوع بسيط كمل العملية,,,لقيت الموضوع مستفحل اقفل الجرح وجزاك الله خير وانا بعد كدا ان شاءالله حاقدر اعالج نفسي ..ضحك الدكتور وعلق ..اول مرة تلاقيني مريضة بالايمان والقوة دي ....رديت عليه قلت . دي بركات الابتلاء يا دكتور انا زاتي متفاجئة من روحي وما عارفة الطاقة دي من وين...طلع الدكتور من العملية وقال انهم اتفاجئو بان الور كش وبقة سنتي ونص بعدما كان 2 سم ونص في التحاليل ..رديت عليه ضاحكة ..لو خليتوني كملت اسبوع كان فتحتو ما لقيتو ولا ربع سم... المهم الحمدلله الوضع كان مطمئن جدا والدكتور خيرني بين علاجات تكميلية من عدمها...قلت ليه انا مستعدة لاي علاج تطلبوه مني وبالفعلا مريت بتجارب علاجية خفيفة جدا كنت انا بعتبرها مجرد روتين وكان يقيني الاكبر في القران والحالة المعنوية الي كان سببها بعد الله الاهل والاصدقاء...على فكرة بدون اي مبالغة انا حبيت فترة مرضي جدا جدا والله من غير اي مبالغة لاني اكتشفت مدى حب الناس وكمان التجربة شكلت مني انسانة مختلفة توتلي ...غيرت شخصيتي من الداخل والخارج بل غيرت مسار حياتي كليا...ولا للحظة ما تنمنيت اني ما مريت بالتجربة....الحمدلله والشكر لله خرجت من التجربة برصيد كبير جدا من الحب والاحبة...رصيد كبير جدا من الايمان والثقة بالله والنفس...وحقسقي مبسوطة جدا بالتجربة وبكل تفاصيلها...مرةها قبل حلوها لاني اتعلمت منها الكثييييروعن نفسي بقول بكل ثقة ان العلاج المعنوي النفسي شكل في شفائي اكثر من 70% ودا ما معناها طبعا تجاهل الجانب الطبي فالشكر والتقدير لكل الكادر الطبي الذين ساندوني ولا زالو .... التجربة ليها جوانب تانية كتيرة ربما تاخذ صفحات وصفحات...بس حنيت علىكم من بقبقة العيون في القراية .....يمكن ارجع ليم مرة تاني في حين ميسرة على قولة واحد في المنبر بس عايزة اقول ليكم مرض السرطان دا مرض ######## جدا...مجرد ان معنوياتك تكون مرتفعة وعندك ثقة بالله ويقين بالشفاء ممكن يهرب منك من غير ما يتلفت حتى اتمنى ربنا يبعد عنكم شر المرض ....اسفة على الاطالة وعلى السرد بدون تنسيق ...والى اللقاء في حلقة قادمة

(عدل بواسطة Osman Dongos on 05-08-2013, 04:31 PM)