يعني شنو معارضة المعارضة ؟؟

Quote: ستين الف مرة ذكر هنا انو المعارضة ما علي قلب رجل واحد ومعروف عن اي معارضة نظام في الغالب لا تحمل لونية واحدة اها الناس ديل إذا هم معارضين للنظام كما يدعوا خليهم يركبوا أي من الخطوط المعارضة بدل تفرغهم لمساككة المعارضين

أها انت قلت أي معارضة للنظام لا تحمل لونيــة واحدة صاح؟
الالوان التانيــة دي شنو .. هل هي الكضب والتلفيــق والتزويــر والبذاءة والإفتراء على الناس والا شنو؟
لانه هشام هباني و" كمييين " اسم هنا لا تمثل الا هذه اللونية ولا خط لهم الا هذا الخط الغارق في البذاءة والنبذ والكضب والتلفيق.. هل هذه لونية معتمدة للنضال؟
طبعاً حا يجي واحد يقول ليك انا قابلت فلان الفلاني الكضاب والمزوراتي والملفق وهو زول كويس جدا على المستوى الشخصي وزول ممتاز وصادق ولو عرفتو كان حبيتو..!
زي حبيبنا فرح ابو روضة يقول هباني انسان وطني وغيور وزول كويس بس عيبه بيشتم وينبذ .. طيب في زول سكوهو هنا او سألوهو وهو قاعد في حاله؟
في زول هنا سالوهو او سكوهو عشان هو اكال والا ما بيدفع شيرنق والا بينوم بالسفة؟

طيب قضايانا دي هل حا نخدمها بهذا الأسلوب؟
هل اذا قام هباني / وامثاله.. بالوقوف حراس على بوابة المعارضة واصبحو يصنفوا في الناس دا معارض ودا عميل ودا كوز ودا امنجي واقبض دا عنصري واخنق دا ذيل كيزان وهكذا..الخ
بيعتبر تصنيفهم دا هو المقياس .. ودي لونية معتبرة شرعاً للمعارضة؟

طيب اذا كنت بسعي لبديل للعصابة الحاكمة في السودان وقدامي النموذج الهباني ومن يشاكله وهو " يدعي " انه شرعي وعاوز يحكم ولم تعجبني هذه الاساليب الملتوية في محاربة العصابة
وقمت حاربته هو نفسه حتى لا يعتقد ان له الحق الشرعي في سلطة تمثل لونيته هذا هل اصبح مخطئاً ..؟
الا يُعتبر رفضي للكذب والتدليس والمآكلة باسم النضال والمعارضة والبذاءة باسم العمل المناضل أيضاً لونية من لونيات المعارضة؟
الا يحق لي " طالما انك قلت انه من المعروف ان معارضة النظام لا تحمل لونية واحدة .. الا يحق لي ان احمل اللونية التي اراها ..؟

ماهو النظام اساساً هل يُقرر ان احد يقوم بخدمة خطه بينما الاخر يسعي لإسقاطه..!
هل اسقط اشخاص من نظام معين لآتي بأشخاص آخرين يقودوا نفس النظام او نظام شبيه له..
يعني هل اغير الأشخاص وأبقي على النظام والا كيف؟

عموما هي استفسارات عامة يا حبيبنا سر الختم عباس .. خذ منها ما يعجبك ولياخذ ابوروضة ما يعجبه وكل القراء لهم اخذ ما يردونه..
فقط لتبقي انه قصة معارضة المعارضة دي مافي..
في شئ اسمه معارضة اشخاص كاذبون وبذيئون وملفقون وهم من يريدون ان يصوروا الأمر كان معارضتهم ومعارضة اساليبهم وافتراءاتهم والتصدي لهم هي معارضة للمعارضة
وبهذا يريدون ان يصوروا انفسهم كحراس لبوابة النضال والمعارضة يدخلون عبرها من يرضوا عنه ويخرجون من لا يرضوا عنه..
كان ليهم .. وهيهات.. لانه في تشاشات مفتوحة باسم النضال بيتعيش منها ناس على حساب ابو روضة المسكين دا ولازم تنقفل..

تحياتي