|
|
 Re: اثيوبيا تستثمر 3.2 بليون دولار لشبكه قطارات جديده (Re: محمد عوض السيد)
|
المكرم / المعز
تحية وتقدير ,,,
Quote: ان اتكلم عن اثيوبيا حيث ان لدينا نفس الظروف الاقتصاديه ان لم نكن احسن منهم
لكن وظفوا القروق الصينيه في مشروع السد لتوليد طاقه كهربائيه
وشبكه قطارات كهربائيه مموله بنسسبه 75% بواسطه الصينين
هذا هو الفرق بيننا وبينهم
|
في بوست سابق تعرضنا للخطوط الجوية الإثيوبية
ياجماعة.. بالله نحن ماب نخجل!!
أتناولنا نمو ناقل الجيران الجوي ( الخطوط الجوية الإثيوبية )...
شبكة الطرق البرية العندهم والتي تم إنجازها فعلا
والتي تحت الإنشاء , فعلا بتدي مؤشر أنها بلد مجتهدة بصورة ما عادية
وفي بوستك كلام عن السكه حديد .... والكلام عن ربط إثيوبيا بجيبوتي ...
البتمثل الميناء الرئيسي للخطوط البحرية الإثيوبية
لما تعين للصورة ككل بتقدر للناس ديل أنهم فعلا ببذلوا مجهود مقدر في دعم بنيتهم التحتية
ونواقلهم الوطنية ....... حتحس فعلا أنو في مقارنه حتفرض نفسه باعتبار الناس ديل وضع
بلادهم الاقتصادي لو ماكان زي السودان هو أقل من حيث الموارد المتاحة .........
وعندهم نفس داء السودان المزمن في عدم استغلال الموارد الكامنه.... لكين متفوقين
عننا في أنو المتاح ليهم قاعدين يستخدموهوا بطريقة أفضل .......
لانو بالتأكيد لما تكون عندهم البنية التحتية الجيدة والنواقل الوطنية الفعالة
حتكون عندهم القدرة على جذب مزيد من الاستثمار وتفعيل قطاعتهم المنتجة الفي الاخر حيصلوا
بيها لهدفهم الاقتصادي المعلن _ رئيس وزرائهم الراحل مليس زيناوي في خطتوا الاقتصادية اللسه
جارى تنفيذه قال عوز إثيوبيا يكون بلد متوسط الدخل _ بمعني يصلوا لنوع من الانفراج الاقتصادي
البخليهم قادرين على تلبيه حاجاتهم الاساسية وبعد كده لسه المشوار طويل للرفاهية والازدهار ...
كلامه وتخطيطهم الواقعي ده بقول أنو الناس ديل ماشين
وحيحققوا أهدافهم ... خصوصا أنو الناس ديل كاقتصاد نامي عندهم مبادرات مميزة
زي تصدير الزهور وحاليا خاشين في انتاج الفطر ( المشروم ) ... يعني بشوفوا شنو
المحتاجوا العالم ولو عندهم مقدرة على انتاجوا ما بترددوا ... بمعني مع شح الموارد
الدنميكية والابتكار في الانتاج وخلق صادرات جديدة عندهم متوفر .....
في قطاع حيوي زي الخطوط البحرية في البلد الما بتطل على أى ساحل حتلاقاهوا بستحق
الإعجاب في نمو اسطولهم وفي لناقل بحري فاعل ومعهد بحري يخرج ضباط بحريين
وفنيين في جامعة بحر دار بدأ في 2010 م ...........
------------------------------------------------
*المتابعة لإقتصاد الجيران بتدينا الفهم الحقيقي للفرق بين الحكومات البتجتهد في التنمية والاخري
المهما أتوفرت ليها موارد لديها عجز مزمن في عمل تنمية حقيقية
تحياتي
|
|
 
|
|
|
|
|
| |
فيس بوك
تويتر
انستقرام
يوتيوب
بنتيريست