و يا يحي ، سؤال غبي و عابر يااااااخ ، انت وين من استاذنا عبد الكريم قباني؟.. باقي ، يوم زرت السودان ، بعد طلطاشر سنة في نوفمبر 2012، قام استاذي و صديقي عبد الرحمن بليا (فنان تشكيلي من الدلنج ، و ترعرع في حي كوبر ، اي و الله نفس الحي القام فيهو عمك واحد اسمو عمر البشير.!!!) ، اهداني برنامج توثيقي عن تجربته الفنية ، و كان الراوي فيهو استاذنا عبد الكريم...!!!! المهم ، على قول تبارك ، سناير الغفلة ، يا يحي ، مرقونا في اطرقا عراض ياااااااخ..!!!! تكون بتسمع في ابراهيم عوض ..ليل نهار...و لمن تخش المنبر.. تلقى الموضوع بقى ابيض و اسود (ما عارف العالم دي بتقطع الألوان دي من وين بالظبط)...و يطلع عمك الفنان الذري ابراهيم عوض .. فنان جلابي ساكت ، من حي العرب امدرمان ، و عشان انتا مهمش من الدلنج و كده.. لو قمت اعلنت انك بتسمع للزول ده.. تبقى انت ذنجي كاره لذاتو ، و رمادي ، و خاتف لونين..و الذي منو!!!!.. شفت يا يحي ، نحن ضعنا قدر شنو يا عم...!!!
زمان يا يحي ، لمن كنت طالب في كلية القانون جامعة الخرتوم.. عملت حركة كده..و قلت الود لازم يطلع حاجة كده مختلفة ، و كنت وقتها.. السكرتير الثقافي لجمعية طلاب و طالبات كلية القانون بجامعة الخرتوم.. اها قلت ياخي الواحد يطلع من طورو.. و يعمل حاجة لم تحدث من قبل...اها في الأسبوع الثقافي... حلفت باليمين اجيب ليهم فنان من مدني اسمو (فتــــــاح السقيد)...و الناس تشيل و تسال: ياخي انتا راعي بقر غرابي ساكت.. شن عرفك بي ناس مدني يا اااخ؟!!!! في نفس الأسبوع ، يا يحي ، غنا فتاح ( لأنو على السقيد حلف بالتقطعوا ما يغني لينا في اسبوعنا الثقافي..!!!)...و غنا فنان الفنانين السودانين ،و النخبة ذاتا ، و اسمو عمك العاقب محمد الحسن..!!!!..و جبنا ناس الهيلاهوب بقيادة شاب صغنوني كده اسمو طارق اللمين..!!! (و اهلنا قالوا ، كضاب الما عندو شهيد ، و انا شهيدي على الكلام ده عضو البورد زميلي و صديقي الظريف عثمان دغيس ، و الرجل فنان بمعنى الكلمة .. غايتو دغيس ده ، يا يحي ، عندي ، لا يقل شأوا من الموصلي و احمد باص و الفاتح حسين في ذات نفسو..!!!!)...
في يوم من الأيام ، يا يحي ، فتحت بوست تنبيه ، لناس سودانيز اونلاين.. عشان تنتبه لناس الأصول... لأنو اكتشفت ان غنية (العزيزة ن بتاعة سعد الدين ابراهيم)..ناس كتير فاكراها بتاعة الطيب مدثر...ده اذا ما مرق فيك زول و طلعك جاهل ساكت.. انو الغنية بتاعة محمود عبد العزيز...و اهديت البوست.. لصديقتي الجميلة ..دكتور اشراقة مصطفى حامد..و قريبي المستهبل.. علاء منصور (تمبس)...و ده كلو مش مهم.. لكن المهم... اكتشفت انو بعد سنتين قاموا ناس قنوات التلفزيون السودانية.. انتبهوا ليك للفنان فتحي حسين..و نفضوا الغبار عنو.. الراجل ظهر في اخر هندام..و من عجب انو بعض من اغنياتو كان بيرددها فنان عظيم اسمو الهادي حامد (و الغريبة ناس البورد..واحد فيهم يقول ليك محمود عبد العزيز اتاثر بالهادي حامد...!!!.. صحيح حيدر بورتسودان (دي ليك يا يحي) ردد غنا الهادي حامد ، و محمود عبد العزيز ردد غنا الهادي حامد..و الهادي حامد ردد غنا فتحي حسين.. اها منو المؤثر في التاني؟.. الأصل عندي فتحي).. شرحو...!!! ياناس القنوات السودانية.. ناس مدني سمحين تب و مافيهم كلام..و عمر جعفر فنان اسكت ساكت خليهو... لكن..! هل هناك امكانية تفتشو فنان مدني الأول فتـــــــاح السقيد؟.. ياخي ان شاء الله نقول ليهو كيفك يا زول و عساك طيب يا زول يا فنان..!!! و لو سمعنا صوت مذيعة اذاعة ود مدني الأستاذة (الشــّفة)...سلنقى الرب و نحن راضون.. و الله صحي..!!!! و الى صديقاتي .. أي و الله صديقاتي عديييل كده .. المتناثرات في سموات الذاكرة ارواحا شفيفه ، و اجسادا في جغرافيا المكان: في هولندا.. في لندن.. في سنار.. في الدلنج..ليكن كل المحبة.. و انا واالله سعيد للغاية.. بس ياريتكن كلكن سعيدات زي سعادتي دي..!! و زي ما قالت فيكن واحدة ، لمن قلت ليها قاعد اسمع ابراهيم عوض ، و قالت لي دي ردة ذوق ما بعدها ردة.. ح اقول ليها و اقول ليكن كلكن..: ما باصرح يوم باسمو.. ما بقول للناس ده مين اخشى انو يجيبوا سيرتو..ويحكوا عنو في حكي حين ما بوري الناس حكايتو ، و حياتو في كلمتين.. بعت العمر عشان حياتو ، و باقي العمر على دين..!!! ما بقدر ابوح ، انا ما قادر اصرح..!!!!
و قريباتي..ياني ياني نفس الزول الزمان.. الإتقاسم معاكن نبضات دراما سعد الدين ابراهيم..و غنيات عبد العال السيد ( من زمن ناس يا زهرة السوسن).. و كنت سعيد لمن و يوم سمعت عبد الله محمد في سنة 2011 بيغني
لأ.. ما بنقدر نغير في الأيام سجية محسوبات علينا ، مرة و هنية..!!!
عيييييييك ...! نبضة السكة ، خطوة مهما طال طريقا.. مهما الشك تجمع ، من حول الحقيقة..!
و برضو ، الريدة الأكيدة ، تفصل هي هي..!
و جمال القوز يشيل و يقول ليك اندياح؟.. اندياح شنو يااااخ؟ ده نزيف بالباب العديل..!!! و يحي قباني و بابكر قدور.. ماعافي ليكم دنيا و اخرة... و ان شاء الله في كل خطوة يعتر ليكم جمال ملفوف في ورقة محبة.. يطلع عينكم ذاتو..!!!!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست