|
Re: حكاية الشجرة الالمانية ... وحكاية السودان الباعوهوا ... (Re: يحي قباني)
|
حكاية ما زالت عالقة في الذهن ...
صديق عزيز ابتعثته شركة قنجاري عام 1984 لفرانكفورت للتدريب علي صيانة مكائن لفرم اللحوم و خلافه ...
وكعادة الاجانب لابد من ان يحكوا عن تاريخهم و اصل الاشياء ... ( البيهم و العليهم )
اها اخدوا صديقي في رحلة الي مكان المصنع القديم و اللي بنت عليهو الشركة عمارة ضخمة جدا ...
لفت نظره نصب تذكاري امام المدخل ... والكلام بالالماني ...سألهم صاحبنا الحاصل شنو ؟؟
قالوا ليهو ...لما قررنا ننقل المصنع من هنا لانو المنطقة اصبحت تجارية و غالية وقلنا احسن نستثمر الارض في اقامة عمارة كبيرة تضم كل اقسام الشركة
و نستفيد من ايجارات الطوابق المتعددة ...
لما قدموا الطلب لبلدية فرانكفورت البلدية عاينت المكان و قالت ليهم الشجرة الفلانية دى تعتبر تاريخيىه... و موروث قديم ...يعني ( HERITAGE )
عشان نديكم التصريح للبناء لازم الشجرة دي تتنقل الي مكان اخر ... والنقل ما عشوائي ...
اتكونت لجنة فنية وحددوا عمق الحفر و درسوا نوعية الجذور و كيفية الحفاظ عليها ... و تم نقل الشجرة الي مكان آخر ...
وفوق ذلك كله امرتهم البلدية بزراعة 50 شجرة اخري في اماكن متعدده كلفتهم العملية حوالي المليون مارك وقتها ...
مش كده وبس ... امرتهم بانشاء نصب تذكاري ... في مقر المبني الجديد ...يحكي قصة الشجره و تاريخها و كيفية نقلها و وين مكانها الجديد !!!!!!!!! ...
_________________________________________________________________________________________________ حكومتنا باعت جنينة الحيوانات زمااااان للقذافي ....
كان غالبهم يعوضوها ضمن الصفقة بجنينة في اي مكان تاني ...
يعني اطفال لسودان ...لا شافو ( ككو ) ...لا اكّلو ( الزرافة ) القش ... لا رجوا ( القرنتية ) لما تمد راسها بره الموية ....
حتي حصة الرسم في المدرسة ...لو دايرين يرسمو أسد ...ما يقدروا يتخيلوهو كيفن ؟؟؟ __________________________________________________________________________________________________ بس ارجع اقول .... انحنا زاتتنا باعونا ... و لا عملوا لينا نصب تذكاري ...
ولا حتي شاهد قبر ...
|
|
|
|
|
|
|
|
|