بعد التحية.. سأنقل لكم هنا موضوعاً كنت قد كتبته ونشرته بموقع ملتقى التشكيليين السودانيين في عام 2010..ولكن الموقع توقف قبل أكتمال الموضوع.. وهو عبارة عن محاولة مني لإستعراض قصيدة مُسدار جزيرة عِبدِلّة للشاعر د.محمد بادي العكودابي ..ولأن القصيدة حافلة بلغة بيئة ليست ببعيدة من بيئتنا حيث جزيرة عبِدِلة تقع جغرافياً جنوب غرب شندي ، ولأن ما جاء في القصيدة من كلمات كثير منها نستخدمه او يستخدمه اهلنا في حياتهم اليومية.. ولا أطيل عليكم ..وقبل نقل ما كتبته.. يمكنكم مطالعة تسجيل قديم للشاعر د. محمد بادي تسجيل قديم له بتلفزيون السودان منشور على موقع اليوتيوب..وهي فرصة أولاً لسماع القصيدة من صاحبها ..وطريقة نطقه لبعض الكلمات.. وفي ظني أن في حالة أشعار ود بادي السمع (بيقطع الشك).. بلا شك أن مهمة تناول الشعر لتبيان ما يعنيه أو ما يقصده الشاعر..مهمة ليست ساهلة..وتحتاج لـ "عِدة شُغُل" .. خاصة إن كان شاعراً في قامة د.محمد ود بادي وإستخدامه لمفردة موغلة في بيئة البادية او الريف..بطريقة تحتمل معاني متعددة..!!! كما أن بعض الاحيان السياق الذي وردت فيه هو الذي يحكم معناها..
وعليه..هي محاولة..عشمي ان أصيب فيها.. كما أثق في أعضاء المنتدى هذا ومنهم -بلا شك- من هم أعلم مني بهذه السيرة.. إذن هي محاولة.. ولتكن من باب (ونِحنَا كمان طارِين الحِلََة)على حد قول ود بادي نفسه.. ---------------------- ------------------ ------------------ ------------------ ----------------------- تقول قصيدة ود بادي- كتابةً-:
أنا أخو البِتْ اللَكعَت قَرن الخُمرة النازَّة علي وِِردان الصبوة الراكزة الجِنيات الهازَّة ..صُدورُهُن لازَّة و رقّ النُص زي خيت الشَلَّة بالحيل آ جني هي والله
الجِنيات الحَزَمو الجِبَّة وعرَق الشتوي عليهم نايَا و صبَّ قول ما دِلَ .. رُجالاً حصدوا الحَبَّة عيشهُن هادو إنكال واتعبَّ ومِنُّو كتير في الواطا انكبَّ وباقِي مَصوبر واقِف قُبة الحَمُد آلاف .. الشُكُر آلاف العيش الرقَد أصناف ..أصناف الولد الكال..عزَّام ..حلاَّف...ضيَّاف الرِزِق الجانا مَدَلَة.. الحَلِق الجاف اِتبلَّة بالحيل آ جني هي والله
الوادي الجَانا مَترقَّن مدَّ جِناحو الطايِل شَرقاً وغرباً القِبلِي بُروقُو علي القلعات إتضربَّن الدُكُن البِعدَن قِربَن فوق صَنقور المَحَلَة الطالت كَبَّن قُول للمَحَلَة بِيوتِك خِربَن قُول ما دِلَة.. الحَلِق الجَاف إِتبلَّ بالحيل آ جني إيه والله
مُرحَاتنا شرابهِِن يوت ما غبَّن شبعانات في الشِقِل أب شوك..ما شبَّن الحُمَّل وِلدَن ..وربَّن حلماتِن تِقلََن.. جَرَّن.. فوق سيقانن كبَّن اللبن العاتِم في ضِرعاتِن جبَّن المَغسَة إن كان ضِرعاتِن خِربن.. القَرعَة آ وِليد .. السِعِن آ بنيَّة القِربَة كمان... كُبُوها الميَة المَغسة إن كان ضِرعاتِن خِربَن.. شُوفوا النِعمة السالت فوق قيزان الرملة ناس البندر لبن الشاي بالعُملة؟
سَمِح الخَمَج الفوق أسيادُو سَمِح العِز المِن أجدادُو الجِنيَات المَشُو ما عَادُو كان بالرِِد دَا أكّانوا اتنادُو غرَّب حامِد وشرَّق بَلَّة كانُوا بِحلبُو الضَرِع الدَلَّة كانُوا بِحضروا الخير القََدحُو مَعَلاّ الجِنيَات ما كفرت بي نِعِمة الله !! بالحيل آ جني إي والله
ذات في يوم والغيمة تَهتّف مَطراً نَقَّع فوق نُوَّار الطَلِح الفقَّّع رِيحة البَرَم إن جاتك .. عِطراً فايت خُمَر الفوق أردافَا مَجَدَّع شُفنا الوادي يقشقِش في دمعَات الليل والتِعِل الشايِل بدا يتفقَّع تَلَّب حامد فوق مخلُوفة أب زُور واِتربَّع طلَق الرَسَن أب زَمة وسوَّا خَبِيباً بدّع هـوّد في رُقَّّاب الصَيْ لاقوه تلاتة زِبيديَّة خالفِين سيقانُن فوق السِنكِيت ورُقَاب أَلبِل بيناتُن مَرخيّة مَحجُوبات بالخرَز الفَصلُو السومِيت كُل واحد درَقة وسيف وطبنجية وباقي جُرابُن مليَّان دلميت الجِنيَّات اِتقَبلُو وضاقُوا الحارَة وضاقُوا المُرة وكان حجَّازُن صقر الجَو حامد كان عارفين ..ضاقوه رُجال قبَّالكُن شُوفوا أرزاقكُن أخير من ضَو حامد عوَج الطُندُب آ وليدات عوَج الطُندُب نار القصَب الهَبلَت ما بِتعدلو شُوفُوا شُلُوخو مَطارِق رقدَن وكل تلاتة يمين سيَّاف إِتقبَلو حامد راضِع مُخ التُرُك البَزْبَز من ضرب أهلُو نِهار الركزوا تمام وإتعَدلُوا حَبوب القارِح ... ما دِلَة ولداً ما ختَّالِن زَلة شِنْ قولك فيهو عليك الله ؟ بالحيل آ جني هي والله
وينا مَراتع الدَرَت الباسِط دايماً ببكي عليهِن وين بنوت الحِلة البُكّر عصراً بَدري يسوَّن في شاهِيهِن بعد الليل ما يهوِّد ونحنا نهوِّد.. عاد أُماتِن ينادن ليهِن نمشي على القيزان نِتقادَم.. أقيس الختوة مع التاتاي ومَشيهِن والله البُعد الحاصِل ما نَسَّاني وحاتكُن في قَمراتنا بشُوفو وشِيهِن الا النَضِم أب غُنة اللهَج السُكر وين بَلقاهُو بنات الرِيل ..الدوب ليهِن الخوف آ ناس كان يبقى الشوق الحاصل بينا مِعَشعِش فيهِن مُقنَع سابِل وين بَلقاهو؟ وطرفاً ذابِل وين بلقاهو ؟ وعين بِتدَنقِر من واليهِن الوَجنات الشَعّن بقَّّـن ود العين النايِم زَرقَّن مُو زايغ ..رَسيَان ومَيقَّّن زولهِن كان خَدران ومَحَقَّّن ؟ من الشوفة عِرُوقو يطُقَّّن كان الدنيا بِصَح تِتخلىَّ ؟ كُنا بَركنَا مَعاهِن فوق رَملاة الحِلة إلا كمان بِنشُوفا مَذلَّة الجِنيات الغابَت..جابت إنتَ الجيب بس قايلُو قميص افرنجي وكرتونات كَرمِلَّة؟؟ لالا ..وحاتَك حاشَا وكلاَّ ديل يوم عادُوا إتلافوا الجاهِل بي حُقوق الله ديل كم لِحقُوا البِشهَق ضايِق وداوُوا العِلَّة الولد الجايب حقايب سفرو تُقََال تُقال من جِنِسِ كتاب ومجلة الحِكمة النَضِم إيَّاهُو الكان الحِكمة الولد إتوضا وصلّى عادة البلد الدَخلت فِيهُن سكنَت سَكنَت ..مَا بـتِتخلاّ نِحنا كمان طارين الحِلة ودُرنا الطَلَّة نشِيلا معاهم فرحة ومِيتَة حَلاة الموت كان في عِبدِلة حلاااة الموت كان في عِبدِلة
العنوان
الكاتب
Date
"مُسدار جزيرة عِـبدِلَّة" لود بادي..من باب "ونحنا كمان طارين الحلة"..!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
gessan
فيس بوك
تويتر
انستقرام
يوتيوب
بنتيريست