|
|
 عيب يادكتور فاروق كدودة....لا يا فاروق الشرع
|
هذا ما اوردته جريدة الصحافة21 ابريل
شيوعى واضح جدا
د. فاروق كدودة : ايوه أنا شيوعى وعندى عمارتين شنو المشكلة ؟
الترابى مكار ونقد مفروض يتنحى والصادق المهدى ما بنفع رئيس جمهورية تانى !!
توقفت بنا عربة الصحافة امام بيت فخم وجدناه ينتظرنا فى مدخل الشارع يرتدى جلابية بيضاء وينتعل سفنجة وفى
يده بقية سجارة رماها ومد يده بالمصافحة وابتسامة مريحة كذلك .. دخلنا فاذا البيت الفخم قصر يجمع الى الفخامة اناقة ... سألنا هو : انا قلت ليكم عازمكم شنو ؟ فأجابت صباح: شاى وذهب لأحضاره وهمست لى صباح : حيعملوا براهو .. كانت صباح قد امدتنى بكثير من المعلومات حول ضيفى وساهمت كثيرا هى فى ان تكون هذه الونسة امامكم الآن ..تحدثنا قبل ان ادير جهاز التسجيل عن الجو وانفلونزا الطيور وبدأت معه بسؤال بايخ:
*الحقيقة وانا جاى وفى ذهنى انك احد منسوبى الحزب الشيوعى وواحد من قياداته ودة حزب المفروض انه مهتم بالفقراء فاذا بى امام قصر وانت شغال فى مؤسسة تعليمية الطالب فيها بيقرأ بالملايين وانت بتصرف برضو ملايين ... مش لى حق اشعر بتناقض فى حالتك دى؟
0( بعد لحظات صمت):انا عمرى ستين سنة وانا ما داير اقول انو انا زول ذكى وكدة لكن لا ينقصنى التفكير السوى ولازم اكون اختزنت تجربة وشوية معارف وعلاقات تخلينى احلحل مشاكل اساسية ومشكلة السكن (الضل) مشكل اساسى .. وفى الحقيقة دة ما البيت الوحيد عندى عمارة صغيرة فى العمارات
* عملتها كيف ؟؟؟
0مشيت لى صاحبى مهندس قلت ليهو داير اعمل لى عمارة وانا ما عندى قروش قول لى بتكلفنى كم لغاية ما تدينى المفتاح قال 13 مليون جنيه ونص فى الوقت داك
* الوقت داك كان سنة كم؟
* 0أظن سنة 92 ..
* * أها ؟
* 0عندى صديقى فى بنك قلت ليهو انا داير 13 مليون ونص
* *براك كدة ؟
* 0 اصلو انا عندى صديقى مليونير الله يرحمه هسة .. قال لى ياخى شيل من البنك انا القدامك دة مديون للبنك سبعمية مليون شفتنى هسة مهموم او ما قادر انوم لا ما فى مشكلة اتوكل وشيل ولو ما قدرت تدفع ابقى انا مديون للبنك سبعمية وتلاطاشر مليون جنيه
* *يعنى بسط ليك المسألة تماما ؟
* 0لا وكمان ممكن يتحمل ديونى ( يضحك) فعلا يازول اخدت البتاعة دى وعملت العمارة الصغيرة وبى كدة وفرنا قروش ايجار عيادة الدكتورة زوجتى ورجعت ال13 مليون وغيرها وساعدتنا فى بناء البيت القلت عليه قصر دة وبالمناسبة هو ما مكلف
* *وانقطعت عن البنوك بعد التجربة دى ؟؟
* لا بالعكس لأنو بقت عندى تجربة وطالما دفعت الملايين ديك قلت خلاص ندور فى الموضوع دة وفعلا مشيت لى بنك تانى قلت ليهم أدونى مائة مليون ...
* *وأدوك طوالى ؟
* 0شوف البنوك عندها مشكلة فى تصريف سلعتها البتبيعها وهى القروش ودى سلعة راكدة وبى نسبة ربح 1%
* * وشلت المية ؟
* 0 وما وقفت خشيت فى ميات لدرجة انى الآن ما عارف شلت كم مائة مليون
* *وما عليك مشاكل ؟
* 0 لا يعنى امكن الآن مديون أقل من خمسين مليون وما عندى قلق .. تعرف الجماعة ديل بسمونى الزبون الجيد لأنى بسدد طوالى وهم قصدهم انى الزبون الجبان لأنو الجماعة الما بسددوا ديل ما بخافوا
* *لكن ما عندك مشاكل ؟
* 0 ابدا اصلو انا عندى بنتين فقط
* *ممكن نعرفهم ؟
* 0 الكبيرة غادة دكتورة فى هندسة الكمبيوتر والتانية ساندرا فى خامسة طب مشهورة كدة
* * ما عندهن علاقة بالحزب الشيوعى
* 0 لا
* *ما حاولت تجندهن ويبقن شيوعيات ؟
* 0 والله انا اتحت الجو عندى مكتبة فوق ممكن تشوفوها فيها كل الدراسات الاسلامية والشيوعية والروائية وكل الأنواع
* *لو واحدة منهن بقت كوزة ؟
* 0طبعا هذا لا يسعدنى لكن بخليها
* * ويسعدك انها تكون شيوعية بعد عمرك الطويل فى هذا الحزب ؟
* 0 (صمت لحظة وشرب قليلا من الماء)والله يسعدنى انها تبقى شيوعية حديثة انحنا شيوعيين قدام و
* *قصدك ناس القوى الحديثة ؟
* 0 لا اقصد شيوعية حديثة يعنى ما متزمتة
* * وكم نسبة ديل فى الحزب عندكم ؟
* 0 والله الشباب وقت شفتهم فى الندوات لقيت نسبتهم كبيرة
* * وهل افكارهم مختلفة ولابرضو زيكم ؟
* لا ما اظنهم مخرفين زينا ... مثلا ابن اخى متدين جدا وبزورنى دائما ويبدو انو كان فى سؤال شاغلو كتير .. ومرة اتشجع وسألنى
* * السؤال شنو ؟
* 0 قال لى يا عمو انت ما بتصلى مالك ؟
* *سؤال واضح هل كانت الاجابة صعبة ؟
* 0 لا ما صعبة ولا حاجة قلت ليهو انت وقت عييت منو الجاك ووداك المستشفى من اعمامك الكتار ومين الراح بورسودان وجاب ابوك للعلاج هنا ومين البقيف مع اهلك اذا دايرين تبرع او مدرسة او جامع قال لى بجوك انت قلت ليهو حصل انا كذبت او قطعت ليك فى زول اذن لغاية هسة انا الاسلام عندى هذا النوع من السلوك
* * كيف يعنى ؟
* 0 يعنى رضا الوالدين والأهل والاقرباء وعدم ايذاء الآخرين وربنا يقدرنى على الطقوس الباقية
* *تقصد الصلاة والصوم والحج والزكاة وال
* 0 ايوة والولد ارتاح جدا انو عمو ما بنكر الاساسيات لكن زى كتيرين جدا من المسلمين هنا وفى العالم الاسلامى مابقوم بكل الشعائر
* * معليش يادكتور اننا نتدخل فى موضوع بينك وبين ربك لكن انت الشجحعتنا؟
* 0(يهز رأسه موافقا )
* *انت مقتنع تماما انك مقصر كمسلم فى الصلاة والصوم وكدة ؟
* 0 بما انو البلد فيها شريعة فأنا ما حأقدر أرد على سؤالك التجريمى دة والأيام دى فى اتهامات زندقة وغيرها وخلينا نكتفى بالقول ربنا يقدرنى على بقية الشعائر
* * ممكن تساهم فى بناء مسجد ؟
* 0 لو كان دة الخيار الوحيد
* * ما فاهم ؟
* 0 يعنى لو قدموا لى لدعم جامع ومدرسة حأدعم المدرسة أصلو الجوامع كتيرة
* * ...................؟
* 0 تعرف للأسف بعض الناس الببنوا المساجد دى بعملوها علشان يتحصلوا على تسهيلات فى مواد البناء وانا بعرف واحد بنا مسجد هنا فى ........... الحقيقة عمل أوضة صغيرة مصلى وفوقها طوابق شقق سكنية ودى ما نية صادقة للمسجد الناس دايرين يبنوا بيوت ساكت
* * طالما نحنا فى محطة البيوت خلينا نسألك هل ابدا حسيت بحرج وانت معارض وساكن فى ذات الوقت فى بيت حكومة ؟
* 0 الناس ما بعرفوا انو البيت الكنت فيه فى حى المطار هو لزوجتى دكتورة اسماء السنى اخصائية الأمراض الصدرية والقرار انها مفروض تكون فى منطقة قريب من مستشفى الشعب عشان تنقذ من يعانى ...وهو الحقيقة ما بيت فاروق كدودة انما انا قاعد معاها
* * لكن ما عندك مشكلة تسكن فى بيت حكومة ؟؟
* 0 أقاطعها يعنى ؟ ليه ياخى ما الحكومة ممكن تشيل منى ضرائب وهى تدينى مرتب
* * انا سمعت انو البيت زاتو كان جنب مكاتب جهاز الأمن ؟
* 0 الحقيقة نحنا كنا ساكنين قبلهم بعد 89 هم اللى جو سكنوا جنبنا
* * عندك علاقات واسعة جدا ويبدو لى عبارة اختلاف الرأى لا يفسد للود قضية تنطبق عليك ؟
* 0 ايوة انا لاتفسد علاقتى مع اللى عندهم رأى من الذين اختلف معهم وطبعا فى كتير من البختلف معهم ما عندهم رأى
* * مثلا ؟
* 0 ممكن تفسد علاقتى مع رجل امن مثلا لكن ما تفسد علاقتى مع دكتور الترابى مثلا ممكن ازوره ويزورنى
* * وعمليا عملت دى ؟
* 0 ايوة وعزمته هنا فى بيتى دة وجانى وقعد فى حتتك دى
* * ونستك معاه كانت فى السياسة بس ؟
* 0 لا انا عزمته بمناسبة افتتاح هذا البيت وعزمت معاه نقد والصادق المهدى و
* * نقد ما اعترض على الترابى ؟
* 0ما كان مبسوط
* * ما صرح ليك بى ضيقو من عزومتك للترابى ؟
* ايوة صرح لكن هو عرف انو الناس التانيين عارفين انو هو جاى.. يعنى مشت كدة
* * اتقابلوا عادى واتونسوا عادى ؟
* 0 ايوة طبعا لو انت فى حفل عام زى دة عادى جدا تفقد كرسيك لو قمت منه وصادف انو الترابى ونقد الاتنين فقدوا كراسيهم فأضطروا قعدوا فى السلم برة وقعدوا جنب بعض وفى صحفى نوبى صورهم جنب بعض وللأسف ما رسل لى الصور وما ظهرت
* * لكن لا الترابى لا الصادق ما سألوك عن المدعوين ؟
* 0 لا انا قلت ليهم عندى مناسبة افتتاح بيت وعازم خواجات وهو فى الحقيقة انا داير اورى الخواجات وبالذات السفراء انو دة السودان
* * شنو البعجبك فى نقد ؟
* 0 صبرو وذكاءه
* * والما بعجبك فيه ؟
* 0( صمت وتفكير )مرات يضيق بالآخر الذى لا يستوعب الأفكار بسرعة .... ما هو مرات فى ناس بتحتاج انك تشرح ليهم النكته ونقد ناس زى ديل ما بستحملهم
* * قلت بعجبك صبرو ... هل هو صبر على الحزب أم على ناس الحزب أم الظروف ؟
* 0 والله طبعا هو صبر على الحزب 16 سنة تحت الأرض وفى المدة دى قطعا ظهرت ليهو مشاكل عائلية مثلا وفاة أخته وكان نصف الحضور أمن قايلنو حيجى ونحنا شايفنهم
* * كنتوا بتلاقووهو تحت الأرض ؟
* 0 ايوة عادى
* * ومالذى يعجبك فى الترابى ؟
* 0 الترابى ذكى وقارئ لكنه اعتقد مكار نقد ذكى لكنه ما مكار
* * كيف مكار ؟
* 0 الترابى فى سبيل مصلحة حزبه مستعد يقتل
* * مكر الترابى دة هو الخلى حزبو الآن أغلبية و يحكم كل هذه السنوات ؟
* 0 الترابى ما اغلبية انا زاتى كنت بتخيلو كدة لكن انتخابات الجامعات وضحت انو ما اغلبية ولا حاجة
* * يا دكتور الآن كذا جامعة اتحاد طلابها فى يد الاسلاميين ؟
* 0 ديل ناس المؤتمر الوطنى
* * انا بقصد ليك الاسلاميين عامة ؟
* لا كان كدة معليش لكن انا بتكلم عن الترابى فى الشعبى وأظنه الآن براجع فى حساباتو تعرف انو الجماعة ديل صاغو سياسة جديدة للتعليم العالى مثلا ان يعطو 7% لأبناء الشهداء والمقاتلين وكدة ومن الباب دة يدخل ابناء الحركة الاسلامية ودة بخليهم اغلبية
* * معقولة يا دكتور ال7% دى تدى الأغلبية للحركة الاسلامية قصاد ال93% الباقية ؟
* 0 المنافسات فى كليات كتيرة فى درجة واحدة ... تحت مسميات كتيرة وظفوها لصالح ناسهم.. مثلا صندوق دعم الطلاب وانا كلفت طلبتى يعملوا بحوث عنه وقالوا انو بدعم الطلبة الاسلاميين بس
* * انت يا دكتور بتعتمد على بحوث الطلبة ؟
* 0 دى احصاءات عملوها واثبتوها
* * طيب معناها اكتر من60% من طلبة السودان كيزان لأنى اطلعت على احصاءات تبين عدد الطلبة البدعمهم الصندوق
* 0 التخريب اللى حصل يحتاج لمراجعة كبيرة وانا دعوت لهذا كثيرا وبالمناسبة دة بنعكس على الخريجين.. انحناوقت اتخرجنا احسن من حملة دكتوراه الآن
* * خلينى أحول ليك الاتهام بما انك استاذ جامعى مش ممكن تكونوا انتو كأساتذة سبب فى التدهور دة مقارنة بأساتذة زمان ؟
* 0 الاساتذة برضو تعبانين ويقال فى بعض الآحصاءات انه 73% من حملة الشهادات العليا خارج البلاد وحل محلهم مئات الخريجين بماجستير من جامعة امدرمان الاسلامية وماليزيا والهند وغيرها
* * ايجابيات الانقاذ شنو ؟
* 0 طبعا نحنا ناس احياء وحتى المجنون عندو حاجات كويسة بعملها ..اول حاجة انو الشعب السودانى بقى بميز بين الناس كويس والايجابية التانية تضاءلت نسبة مستقبل الحركة الاسلامية وانا افتكر لوقامت انتخابات الحركة الاسلامية فرصها حتكون ضئيلة جدا
* * اقاطعك واذكرك اننا بنتكلم الآن عن الايجابيات
* 0 ايوة ما دى من الايجابيات الدين وزجه فى الدولة مشكلة الدين سلوكيات والدولة قهر
* * الدولة قهر حتى ولو كان الحاكم الحزب الشيوعى ؟
* 0 ايوة نعم الحزب الشيوعى وقت حكم روسيا كفر عدد كبير جدا من الروس بهذا الحكم لأنه بقى حزب واحد قاهر ولذلك اعتقد انو الحزب الشيوعى السودانى بعد مؤتمره الخامس حيكون واضح انو لن يسعى للسلطة بفرده انا بتصور كدة او دة رأى حيكون كدة لو حضرت المؤتمر
* * نحنا ما زلنا فى محطة الترابى ... الآن افكاره وآراءه الجريئة عاملة ليهو مشاكل كيف تقرأ هذه الآراء ؟
* 0 طبعا هو يريد ان يتميز يعنى دلوقت الحركة الفكرية فى السودان راكدة فالترابى ما عندو طريقة غير انو يخالف بعض المسلمات او ما كانت مسلمات لكنه بما انو رجل ذكى يعرف انو قضايا ذى امامة المرأة وزواج المرأة المسلمة من غير المسلمين قضايا ساخنة وحيلقى آيات يبرر بيها افكاره وفى هذا الركود لازم يقول حاجة عشان يتميز
* * ممكن تقيف ضد الحملة الضدو يعنى ضد الدايرين يكفروه ويتهموه بالزندقة ؟
* 0 لا شأن لى بها دة خلاف عائلى
* * نأتى للصادق المهدى ... مشكلته شنو سيد صادق ؟
* 0 ( صمت ثم ضحكة خفيفة) دة سؤال مشكلة ... الصادق ايضا مشغول بالتحديث وهو عارف انه لا يمكن ان يحكم حزبه بالطريقة الحديثة لأنه حزب تقليدى لازم يكون فيه امام وكدة يعنى .. وانا شايف انه الصادق ارهق نفسو فى الفترة الأخيرة بطرح نفسو كمفكر اسلامى بينما هوة قائد سياسى وهنا يصطدم بالسياسة والدين ائمة الانصار مختلفين من عبدالرحمن المهدى لغاية الصادق لذلك ربط العمل السياسى بالعمل الدينى فيه مخاطر كبيرة لذلك الصادق الآن مضطرب والا كيف تفسر لى رحلته مؤخرا الى مالى ليصلى صلاة المولد استجابة لدعوة القذافى ونحنا عارفين ليس هناك صلاة مولد مشيتو لمالى عرضتو لاساءات حكى عنها هو فى ندوته الاخيرة
* * يصلح يحكم السودان تانى ؟
* 0 السودان يحتاج الى حكم بطريقة جديدة والصادق المهدى زعيم حزب تقليدى وممعن فى التقليدية والسودان يحتاج الى عقلية جديدة وهو ليس من الطبقات او الفئات الاجتماعية المطروحة لحكم السودان الجديد
* * من ترشحه ليحكم السودان الجديد هذا ؟
* 0 يضحك) دة السبب الخلى جعفر نميرى16 سنة رغم انو جعفر نميرى هو بنصفه انو سفاح وغيرها الا انه الحكم الشمولى بطرح طوالى سؤال ماهو البديل ولذلك الآن يقولون من هو البديل للبشير رغم انه المقابر مليئة بأناس كانوا يظنوا انهم لا يمكن الاستغناء عنهم لذلك دة سؤال بعطل الحركة البديل يأتى نتيجة حراك سياسى الظروف بتطرح الناس المناسبين
* * انت قادر تحكم السودان ؟
* 0 جدا وافتكر انو ما اتيحت لى فرصة اعمل حاجات كتيرة لكن ممكن احكم السودان
* * رغم انك الآن فى حزبك برة اللجنة المركزية ؟
* 0 الاحزاب ما كدة بالذات الحزب الشيوعى آآآآآآ يعنى امكن انا ما عايز لجنة مركزية
* * عرضوا عليك ورفضت ؟
* ايوة امكن ياخى انا ماعايز
* * ما لو انت عندك ثقة فى انك تحكم بلد من باب اولى تكون عندك رغبة تحكم حزبك ؟
* انا بحكم حزبى او بساهم فى حكم حزبى وانتو عارفين كصحفيين انى واحد من البشكلوا الراى العام
* *انت شيوعى متمرد حتى على الحزب ؟
* 0( يتناول كوب الماء مرة أخرى وانتهز الفرصة واصب لنفسى كوب شاى تانى )ما متمرد بالمعنى دة لكن انا مؤمن انو حواء والدة ومافى شخص واحد هو البفكر وخلاص والحزب والحركة بتمشى بمجموع الأفكار وانو على الناس يعبروا عن افكارهم متى ما اتيح ليهم وبالكيفية التى تتاح لهم انا ما باخد اذن عشان اصرح وما جانى اعتراض على تصريحاتى دى حتى الآن
* * ومافى شيوعى شكك فى علاقتك مع صلاح قوش مدير جهاز الأمن والمخابرات ؟
* 0 لا مافى زول قال كدة لكن صلاح قوش من رجال الأمن المقتدرين ... ناس الأمن يجب ان تكون عندهم القدرة انهم يكونوا ظريفين ... فى المرات القليلة القابلتو فيها كان صلاح رجل ظريف
* * لكن قالوا علاقتك بيهو حميمة لدرجة انك اتوسطت لزميلك عشان يتعالج برة ؟
* 0 ايوة هذا هو الظرف الأنا بقصدو وانت قاصد علاج زميلنا محمد محجوب قلت لصلاح بالتلفون ياصلاح محمد محجوب مندوب الحزب الشيوعى فى سكرتارية التجمع أطرش ومعظم الاجتماعات فى السجانة وعشان اعضاء التجمع فى الاجتماع يسمعوه الكلام بكوركو وبى كدة ممكن يا صلاح تسمع تفاصيل الاجتماع وانت فى مكتيك ياخى رغم دة خلى الراجل دة يسافر للعلاج فى لندن
* * ووافق ؟
* 0 قال لى بضمانتك وانو ما يحضر اى ندوة فى لندن قلت ليه بضمانتى وفعلا سافر ودي الظرافة والجانب الانسانى
* *البشير ماقابلتو ؟
* 0 لا الا فى اجتماعات عامة ورسل معاى رسالة لنقد بالمكرفون فى بيت الضيافة وقلت ليه تصل
* * وصلتها لنقد ؟
* 0 نقد بكون سمعها لكن انا ما وصلتها
* * عملت قبل كدة تصريح انو الفوق للستين يتنحى عن العمل العام ؟
* ايوة انا قلت يتنحوا عن القيادة ويكونوا مرجعية فى مجلس شورى لكن القيادة لا مفروض يتيحوا الفرصة للشباب
* * التصريح دة لو كنت رئيس جمهورية بتطلعوا ؟
* 0 لا رئيس الجمهورية ممكن يكون تخطى الستين وممكن يكون فى الثمانين
* * لو قام مؤتمر الحزب تطالب بتبديل نقد ؟
* 0 وتبديل آخرين وامكن دة راى نقد زاتو
* * الآخرين هم الحريصين على وجود نقد فى هذا المنصب ؟
* 0 ما دى مشكلة الأحزاب الشيوعية فى المناطق المتخلفة تلقى الر جل الاول من المهد الى اللحد بريجنيف كان شبه ميت وكيم ايل سونغ لكن فى اوربا الغربية لدورتين فقط ويتنحى وهو فى الستين
* *اى الاحزاب العندو مستقبل فى السودان؟
* 0 الحزب الشيوعى
* * رغم انو الآن صوتو خافت ؟
* صوتو خافت لانو ما عندوش مكرفون
* *الحركة الشعبية ؟
* رغم ترحيب الناس بيها فى بداية وصولها لكن حصل تراجع عنها والليلة فى الجرايد قالوا حينزلوا الانتخابات مع المؤتمر الوطنى ومن الممكن تكتسح الانتخابات ودة يبقى خذلان للشعب السودانى
* *حتى لو جو بالاغلبية ؟
* 0 بالاغلبية والقروش والتزوير من الممكن ان تتحول الحركة لحزب سياسى كاسح رغم وفاة قرنق لأنه الأحزاب السودانية دى ما ملهمة
* * بما فيها الشيوعى ؟
* 0 بما فيها الشيوعى والا قولى يا ابنى بالله كيف تتوسط امريكا الآن بين الحركات المسلحة فى دارفور من اجل اصلاح العلاقة بيناتهم حتى هذه المسألةالأحزاب ما قادرة تعملها دى انا بعتبرها فضيحة .. وعدم كفاءة وعدم جدارة للقوى السياسية
* * تنتقد الأحزاب بشدة ؟
* 0 ياخى القوى المعارضة دى كلها تقول الحل هو المؤتمر الجامع حل لكل المشاكل .. طيب لماذا لا تعقد هذه الأحزاب المؤتمر الجامع دة ... ضرورى اذن من الحكومة ؟ وانعقد كتير آخر مرة قبل كم اسبوع فى تنزانيا وغيره وتقررت فى المؤتمرات اشياء كتيرة المهم ليس من المستحيل عقد هذا المؤتمر هنا وخلو الحكومة توقفه
* * المشكلة فى الأحزاب وليس الحكومة هنا؟
* نعم الحركة السياسية فقيرة هنا فى افقار فكرى وثقافى وكله
* *خلينا نجى لفاروق كدودة شخصيا ... انت حلفاوى الجنسية والميلاد؟
* 0 ايوة انا اتولدت فى عبرى قبل ستين سنة
* * مراحلك الدراسية ؟
* مرحلة الأساس فى عبرى والوسطى فى حلفا القديمة والثانوى فى الأبيض خور طقت ثم جامعة الخرطوم ثم موسكو
* * قريت اقتصاد ؟
* لا فى جامعة الخرطوم قريت قانون
* * ومن وين ليك الاقتصاد ؟
* 0 اصلو انا اترفدت فى جامعة الخرطوم من سنة تانية لأنى كنت رئيس اتحاد طلاب الوقت داك وكنت مشاغب
* *سنة كم ؟
* 61و62 م
* *ومنها لموسكو ؟
* ايوة بس بعد اختفاء بسيط لأن قرارفصلى من الجامعة كان مقرون باعتقالى فاختفيت
* *منو الجندك للحزب الشيوعى ؟
* 0 تتصور مافى زول جندنى انا جيت لقيت نفسى فى المرحلة الثانوية معترض على نظام ادارة الداخلية والأكل وجدت نفسى مع مؤتمر الطلاب ورابطة الطلبة الشيوعيين
* *زوجتك برضو من حلفا ؟
* لا زوجتى اسماء السنى من الخندق وامها من الحلنقة ودة خليط عجيب
* * بتاكل قراصة ؟
* دة بيت ما فيهو قراصة ولا لقيمات دة بيت بتاع مارتديلا وحاجات زى دى
* * واهلك ما بحسو بالغربة معاك هنا ؟
* 0 وقت يجو هنا نتيجة للغة نعم لكنهم ما بأملوا اننا نعمل ليهم قراصة
* * بتحب وردى أكيد ؟
* 0 اكيد وعلى المستوى الشخصى صاحبى واحبه كفنان بالذات فى الغنا بالرطانة ووردى دة كشخص كدة راجل والله
* * غيرو بتسمع منو ؟
* 0 كابلى وفيروز وبالذات فى اذاعة لندن بالليل فيروز بتخليك حاجة تانية
* * بتقرأ كل الصحف السودانية ؟
* 0 والله استطيع ان اتحمل من 6 الى 8 صحف يوميا
* *بمن تبدأ ؟
* بقرأ أعمدة زى أصداء محجوب محمد صالح ووراق كتير لكن عثمان ميرغنى شايفو خفت شوية انا ما عارفو مالو
* *بمناسبة وراق حزنت وقت انشق مع الخاتم عدلان منكم ؟
* 0 والله حزنت لوراق وما للخاتم
* * ليه لم تحزن على الخاتم ؟
* 0 لأنى كنت عارف طموحاته كنت عارف انو كذب على الحزب وقت قال ماشى لزوجته فى بريطانيا الخاتم الله يرحمه عندو طموحات شخصية وعشان كدة اختلف هو ووراق وانا أكن لوراق احترام كبير حتى الان رغم اختلافى معه
* *نختتم بسؤال عن مؤتمركم الذى طال انتظاره ؟
* والله صحى طول جدا وانا افتكر قيادة الحزب تلام على هذا التأخير وانا كنت اعتقد ان المؤتمر يجب ان يقوم بأى شكل والحزب لا تنقصه الأفكار ونحنا ناس شطار
* *ما دام انتو شطار شنو المانعكم تعقدوا مؤتمركم ؟
* 0 يمكن لأنه مناط به مهام كبيرة جدا نتيجة للأحداث الحصلت فى العالم وفى السودان وامكن الاعداد ليه بحتاج لقدرات وافكار اكتر
* * ما قدر شطارتكم الكنت بتحكى عنها الآن؟
* 0نعم بشطارتنا ونحن لها لكن امكن بنحتاج لمال .. انت عارف حكاية انو الحزب دة بقولوا عنو اكبر حزب شيوعى فى العالم التالت وفى افريقيا وفى العالم العربى
* *ودى ما حقيقة ؟
* 0 ايوة دة اعلام ساكت دة حزب عادى جدا وانا بفتكر انو دى حركة من الجهات البتحرض علينا المخابرات الأمريكية والبريطانية وتقول ليهم خلو بالكم دة حزب خطير
* * تقييمك انت للحزب ؟
* 0 حزب سودانى عادى وحزب صغير كمان
©2004 Alsahafa.info. All rights reserved.
Best viewed with Internet Explorer 4.0, Netscape 4.0 or above with a resolution of 800 X 600 .
|
|
 
|
|
|
|
|
| العنوان |
الكاتب |
Date |
| عيب يادكتور فاروق كدودة....لا يا فاروق الشرع | عبدالوهاب همت | 04-21-06, 04:55 AM |
| Re: عيب يادكتور فاروق كدودة....لا يا فاروق الشرع | معتز تروتسكى | 04-21-06, 05:48 AM |
| Re: عيب يادكتور فاروق كدودة....لا يا فاروق الشرع | nadus2000 | 04-21-06, 06:17 AM |
| Re: عيب يادكتور فاروق كدودة....لا يا فاروق الشرع | دفع الله خطاب | 04-23-06, 08:51 AM |
| Re: عيب يادكتور فاروق كدودة....لا يا فاروق الشرع | banadieha | 04-24-06, 02:19 AM |
| Re: عيب يادكتور فاروق كدودة....لا يا فاروق الشرع | banadieha | 04-24-06, 02:06 AM |
| Re: عيب يادكتور فاروق كدودة....لا يا فاروق الشرع | عفاف ابوكشوه | 04-21-06, 06:10 AM |
| Re: عيب يادكتور فاروق كدودة....لا يا فاروق الشرع | معتز تروتسكى | 04-21-06, 06:31 AM |
| Re: عيب يادكتور فاروق كدودة....لا يا فاروق الشرع | nadus2000 | 04-23-06, 07:52 AM |
| Re: عيب يادكتور فاروق كدودة....لا يا فاروق الشرع | Basheer abusalif | 04-23-06, 08:39 AM |
| Re: عيب يادكتور فاروق كدودة....لا يا فاروق الشرع | معتز تروتسكى | 04-23-06, 10:56 AM |
 Re: عيب يادكتور فاروق كدودة....لا يا فاروق الشرع | Amin Elsayed | 04-23-06, 12:18 PM |
| Re: عيب يادكتور فاروق كدودة....لا يا فاروق الشرع | بهاء بكري | 04-23-06, 04:26 PM |
| Re: عيب يادكتور فاروق كدودة....لا يا فاروق الشرع | Amjad ibrahim | 04-23-06, 05:07 PM |
| Re: عيب يادكتور فاروق كدودة....لا يا فاروق الشرع | hatim | 04-24-06, 02:44 AM |
| Re: عيب يادكتور فاروق كدودة....لا يا فاروق الشرع | عفاف ابوكشوه | 04-24-06, 03:03 AM |
| Re: عيب يادكتور فاروق كدودة....لا يا فاروق الشرع | nadus2000 | 04-24-06, 04:05 AM |
| Re: عيب يادكتور فاروق كدودة....لا يا فاروق الشرع | معتز تروتسكى | 04-24-06, 04:08 AM |
| Re: عيب يادكتور فاروق كدودة....لا يا فاروق الشرع | nadus2000 | 04-24-06, 04:17 AM |
| Re: عيب يادكتور فاروق كدودة....لا يا فاروق الشرع | banadieha | 04-24-06, 04:33 AM |
| Re: عيب يادكتور فاروق كدودة....لا يا فاروق الشرع | charles deng | 04-24-06, 08:38 AM |
| Re: عيب يادكتور فاروق كدودة....لا يا فاروق الشرع | Mohamed Elgadi | 04-24-06, 10:00 AM |
| Re: عيب يادكتور فاروق كدودة....لا يا فاروق الشرع | Deng | 04-24-06, 08:48 AM |
| Re: عيب يادكتور فاروق كدودة....لا يا فاروق الشرع | سماح سيد ادريس | 04-24-06, 11:16 AM |
| Re: عيب يادكتور فاروق كدودة....لا يا فاروق الشرع | عمر ادريس محمد | 04-24-06, 02:37 PM |
| Re: عيب يادكتور فاروق كدودة....لا يا فاروق الشرع | بهاء بكري | 04-24-06, 04:34 PM |
| Re: عيب يادكتور فاروق كدودة....لا يا فاروق الشرع | banadieha | 04-25-06, 01:28 AM |
| Re: عيب يادكتور فاروق كدودة....لا يا فاروق الشرع | بهاء بكري | 04-25-06, 03:17 PM |
| Re: عيب يادكتور فاروق كدودة....لا يا فاروق الشرع | banadieha | 04-26-06, 00:41 AM |
| Re: عيب يادكتور فاروق كدودة....لا يا فاروق الشرع | banadieha | 04-26-06, 00:41 AM |
| Re: عيب يادكتور فاروق كدودة....لا يا فاروق الشرع | Waly Eldin Elfakey | 04-26-06, 04:33 AM |
| Re: عيب يادكتور فاروق كدودة....لا يا فاروق الشرع | charles deng | 04-26-06, 06:55 AM |
| Re: عيب يادكتور فاروق كدودة....لا يا فاروق الشرع | Amjad ibrahim | 04-28-06, 03:51 AM |
| Re: عيب يادكتور فاروق كدودة....لا يا فاروق الشرع | banadieha | 04-29-06, 11:12 AM |
| Re: عيب يادكتور فاروق كدودة....لا يا فاروق الشرع | بهاء بكري | 04-28-06, 05:52 AM |
| Re: عيب يادكتور فاروق كدودة....لا يا فاروق الشرع | Amjad ibrahim | 04-29-06, 09:23 AM |
| Re: عيب يادكتور فاروق كدودة....لا يا فاروق الشرع | Bashasha | 04-29-06, 10:59 AM |
| Re: عيب يادكتور فاروق كدودة....لا يا فاروق الشرع | Muhib | 04-29-06, 12:50 PM |
| Re: عيب يادكتور فاروق كدودة....لا يا فاروق الشرع | بهاء بكري | 04-30-06, 07:10 AM |
| Re: عيب يادكتور فاروق كدودة....لا يا فاروق الشرع | عفاف ابوكشوه | 04-30-06, 04:32 PM |
| Re: عيب يادكتور فاروق كدودة....لا يا فاروق الشرع | Bashasha | 04-30-06, 05:55 PM |
| Re: عيب يادكتور فاروق كدودة....لا يا فاروق الشرع | عفاف ابوكشوه | 05-01-06, 06:55 AM |
| Re: عيب يادكتور فاروق كدودة....لا يا فاروق الشرع | Bashasha | 05-01-06, 10:26 AM |
| Re: عيب يادكتور فاروق كدودة....لا يا فاروق الشرع | عبدالوهاب همت | 05-05-06, 02:12 PM |
| Re: عيب يادكتور فاروق كدودة....لا يا فاروق الشرع | Amjad ibrahim | 05-07-06, 09:05 AM |
| Re: عيب يادكتور فاروق كدودة....لا يا فاروق الشرع | بهاء بكري | 06-04-06, 05:06 AM |
| Re: عيب يادكتور فاروق كدودة....لا يا فاروق الشرع | Amjad ibrahim | 06-04-06, 08:59 AM |
| Re: عيب يادكتور فاروق كدودة....لا يا فاروق الشرع | banadieha | 06-04-06, 09:41 AM |
|
| |
عبدالوهاب همت
فيس بوك
تويتر
انستقرام
يوتيوب
بنتيريست