شيوعين جدة أكرم وأنبل من كيزان جدة

Quote: والله الموضوع مغري جدا بالتنظير خلونا نخت طوبتنا هنا ما دام ربنا هون اي سوداني علي الاطلاق تمسكو علي المستوي الفردي والشخصي بتلقي فيهو السمات العامة بنسب متفاوتة البتميزنا كسودانين , كسودانين هناك خصل اساسية يتربي عليها الشخص ان كان في بيته الصغير او من خلال اسرته الكبيرة او من خلال حلته وفريقه او من خلال شارع الله اكبر لا محالة تجد ان هذه الخصل اصبحت جزئا اصيلا من شخصيته , هذه الخصل في عنوانها الكبير هي الكرم والشهامة وزول الحارة واخو الاخوان ,,,الخ عشان كدا لو مسكتو اي زول في البورد دا من طرف بتطلعوا فيهو ما كتب اعلاه واكتر اذن مافي جديد في هذا الشكر وهو قد ينطبق اصلا علي جميع المشاركين في هذا البوست وسواهم من العضوية وغيرها حتي الكيزان المتفقين الناس في هذا المكان علي بغضهم اذا استهدفتهم كافراد ستجد ان فيهم اخو الاخوان والكريم والشهم وكل الصفات دي عشان كدا تلقي اي واحد منكم عنده قريبه او معرفته او صاحبه كوز لو اتكلم معاك عنه يقول ليك والله الزول دا زول كويس او زول اخرة او زول صادق لكن بس مشيهو مع الجماعة ديل هو الحاجة الكعبة فيهو يبقي خلونا نتفق علي العناوين الرئيسية البتميزنا كافراد يمثلون الشعب السوداني , لكن ممكن ننظر للموضوع بزاوية تانية , عادي جدا انك تلقي سوداني في موقف يطمانك انه الدنيا بخير يقيف معاك في الحارة تلقاهو زول كريم جدا وشهم جدا واخو اخوان والفي يده ما حقو يكرمك لمن تقول كفي ويتسدر لقضاء اغراضك ويعمل اي حاجة متوقعة وغير متوقعة منه لكن نفس هذا الزول لو دخلت بيته ممكن تلقاهو بجلد مرته , او تلقاهو في بيته جلدة لمن غلط , او تلقاهو مطلع زيت ابو اهل اولاده , و ممكن تلقاهو مقاطع اخوهو وابوهو في حاجة ########ة جدا لاعوام وسنوات , وممكن عادي تلقاهو في البيت او الاسرة زول اضينة ساكت , وممكن يطلع زول بتاع فتن وكلامات وجياب قوالة ,,الخ " وهنا انا ما قاصد انه اي من الصفات دي في اخونا معاوية من قريب او بعيد , بس استدليت بالكلام دا لاصل لنقطة تانية انه الزول بيعرف عن الاخر بقدر ما الاخر دايرك تشوفه بياتو طريقة عشان كدا المسائل الشخصية دي ما مقياس ابدن للخروج بتقيم للشخصية , وفي الحالات الزي دي الاولي انه يتكلم عن الشخص زول عايش معاهو او لازمه لفترة طويلة ومرت بينهم مواقف كتيرة زي صديق عمره او زوجته او اخوهو او ابوهو او ود حلتهم ,,الخ من الناس القراب والبيقدروا يقروا ليك شخصية الزول كويس ويتكلموا عنه بفهم ودي اصلا ما مطلوبة في منبر حوار عام يتناقش فيه الناس عن مواضيع عامة وشئون سياسية واجتماعية وغيره المقياس في مثل هذه المنابر الحوارية المفتوحة للحوار في نظري ثلاثة اشياء رئيسية , اول حاجة الصدق مع النفس والاخرين في الكتابة , الحاجة التانية امكانية الشخص لايصال وجهة نظره واضحة , الحاجة التالتة فصل الخاص عن العام والابتعاد عن شخصنة الحوار وهو عنوان عريض يمكن تفسيره في نقاط عدة لكن دا ما وقته الان المهم " ما زي بتاعة طبارك المستهلكة النية ديك لانه دي وراها خلاصة الكلام البيهم الناس هنا شنو عن معاوية عبيد الصايم ككاتب في المنبر وزول نصب نفسه للكشف الفساد الحكومي " وهو امر ممتاز جدا انا اقف كليا معه " وايضا افترض في نفسه الكفاءة للعمل علي تغير الوضع الذي يراه مايلا شانه في ذلك شان الكثيرين هنا , البهمنا كعضوية انه معاوية يكون اولا دقيق في معلوماته البنشرها , واثق في معلوماته و مصادره لان الفساد يطال افراد واسر فان كان تقولا فان الكثيرين سيتضررون ليس لهم ذنب اصلا لذا المصداقية هنا مهمة جدا ومفصلية , الحاجة التانية البتهمنا كعضوية في معاوية البعد عن شخصنة الحاجات بل والابتعاد عن تصفية الخلافات الشخصية والابتعاد كليا عن الزج بالشخوص المختلفين معه في النيل من ذواتهم واسرهم , عشان كدا بتبقي مسئولية معاوية الشخصية تجاه هذا الامر كبيرة جدا لانه بيقود خط حساس جدا يجد الدعم والتشجيع من الكثيرين الذين يثقون فيه وفي ما ياتي به لاتفاقهم معه علي نفس الخط والرؤية لما نجي لكتابات معاوية في الفترة السابقة وتناوله للشئون الخاصة والعامة ومحاربته للفساد الحكومي بنلقاهو وقع في عدة مطبات واحيانا حفر كبيرة , معاوية ككاتب في المنبر يسجل حضورا يوميا كبيرا جدا وهو مقرؤ بنسبة كبيرة من العضوية ومن المتصفحين لحساسية الملفات التي يثيرها ويفتحها , عشان كدا البعض دائما يطالبه بصحة معلوماته ودقة مصادره و تبيان ذلك للقراء عشان المواضيع المطروقة من قبله مدعاة لانها تكون محض اقاويل وونسة صالونات عشان كدا مطالبة البعض له بالدقة والتوثق من المعلومة وايضاح المصادر امر مشروع جدا , نجد ان معاوية ينجح احيانا فيه ويفشل في احيان اخر كثيرة , ةزي ما سبقت القول انه موضوعات الفساد دي بتجر وراها بيوت واسر فموضوعها حساس جدا , عشان كدا الناس هنا بتركز علي اخطاء معاوية وهفواته اكتر ما بتركز علي نجاحاته وممكن اشرح ليه الناس بتركز علي الهفوات بمثل بسيط وهو افترض انك سايق عربية في مدينة كبيرة ومشيت ليك عشرة مشاوير بالعربية ملتزم بقوانين المرور وهو امر جيد جدا لكن في اخر النهار لامر طاري استعجلت وقطعت ليك اشارة وشافك بوليس الحركة ووقفك واداك غرامة , بالتاكيد ما حتقول ليهو انت ما عاينت لسواقتي طوال النهار وانا ملتزم بقوانين المرور طوال عشرة ساعات وجيت وقفت لي في قطعة اشارة واحدة- اتمني ان يكون المثال واضح كفاية الحاجة التانية بالنسبة للمسائل الشخصية التي يخوض فيها معاوية بنلقاهو بيخوض في اتهامات شخصية حتي النخاع وبضراوة شديدة وكانه في نهاية الامر سيستلم ميدالية " لتشويه السمعة " ودا الامر البيختلفوا مع معاوية فيه اعداد مقدرة من العضوية والبعض يلاحقه كظله لانه الشأن الخاص زي ما قلنا حساس جدا ومعاوية في هذا الامر يجانبه التصبر والتريث والتوثق وهو نفسه اي معاوية يضرب بكل الاخلاق الحميدة التي ذكرت عن شخصيته من الكثيرين اعلاه عرض الحائط ويتحول الي مصاص دماء لا هدف له الا تدمير الشخص المختلف معه حقا او باطلا وهو الانتصار للذات وهو العيب الكبير الذي يشوب ما يهمنا من شخصية معاوية المنبرية والذي يدفعه للكتابة بدوافع غير مبررة وفي اشياء حساسة ومؤذية لذا بجانب الدعم اللا محدود من اصدقاء ومحبي معاوية الذي يجده منهم يجب ان يجد منهم انفسهم بعض النصح والارشاد والتصويب لانه الكمال لله وحده ومعاوية قابل للخطأ اكثر منه قابلية للصواب بحكم انه ينقل من مصادر قد لا تتوفر لديه مقابلتها الا تلفونيا و ما شابه وحتي ان توفرت لديه هذه الشخصيات كفاحا فانه لا يستطيع استبطان دواخلها ومعرفة دوافعها هذا بالنسبة للشان العام وبالنسبة للشن الخاص علي الجميع مناصحته في الابتعاد عنه قدر الامكان والتركيز علي ما افترض في نفسه الكفاءة فيه وله . المهم " المرة دي زي حقت طبارك "