ماشين الدهب .. موضوع حيرني !!!!!!!

Quote: الأخ معتز القريش تحياتي ولله البحير ما حكاية ماشين الذهب البحير جد كلامك ده ياخي مالو لو المواطنين مشوا الدهب ونقبوه ولقوه واستفادوا منه ، الذهب ده حق زول ما حق ربنا .. الحكومة ما عندها أي حق في الدهب ولا من حقها تخصص أرضنا للشركات الأجنبية سواء الفرنسية أو الصينية أو المصرية.. ولا من حقها تحرم المواطنين اللقو الدهب من التعدين بطريقة عشوائية .. ولا من حقها تحرم الناس من إدخال أجهزة كشف الذهب.. وليه جهاز كشف الدهب التمنو ما تامي ألفين دولار يبقى ب 22 الف دولار الحكومة لو بتفهم .. تخلي الناس ينقبوا ودي أصعب مرحلة في التعدين .. ولما الناس يشقوا ويعرفوا محل الدهب وين ويتكالبوا على مناطق الدهب ، تجي هي بكل ذكاء توفر خدمات سريعة للناس ديل .. وتشتري هي الدهب منهم زي ما عملت حكومة الولايات المتحدة الأمريكية .. وتكون كل الأطراف ربحانة.. بالله عليك مش كدة أفضل بدل ما تدي أرضنا للفرنسيين أو الصينيين أو نجيب سويرس .. ويشيلوا الدهب ونقعد نحنا ملوص.. الدهب المخزنو البنك المركزي في أمريكا ومالك بيهو العالم ما كله من التعدين العشوائي بتاع الأمريكان .. ناس دقشوا البراري والوديان والجبال وطلعوا الدهب والحكومة الشاطرة كانت من وراهم تشتري منهم الدهب بسعر مجزي جدا .. والحكومة بتطبع القروش .. يعني الحكومة بتشتري الدهب بتمن طباعة الورق .. شفت الشطارة دي كيف؟؟ حكومتنا ممكن تعمل كدة .. هي ياخي بدون دهب بتطبع في القروش بدون حسيب او رقيب .. ما بالك لو بقت في تغطية دهب حقيقية .. وحكومتنا بدل تعمل مصنع للدهب عشان تصبه في سبائك .. أفضل ليها تصمم مدن صغيرة للمنقبين عن الذهب توفر ليهم مياة للشرب وخدمات توطين مؤقتة وعلاج وتوفر ليهم طعام .. وترشدهم عن أفضل الطرق والوسائل لاستخلاص الذهب بدل الوسائل الكارثية بتاعة الزئبق دي..يأخي دي رحمة ربنا ساقها للعباد تجي أنت تقول الحكومة .. والذهب حق الحكومة الدهب ده حق أي إنسان تعب وشقى لحدي ما لقاه.. مع مودتي و خالص تقديري