|
|
 ود بادي
|
ود بادى
أنا أخو البت اللكعت قرن الخمرة النازة
على وردان الصبوة الراكزة
الجنيات الهازة .. صدورن لازة ورقّ النص زي خيت الشلة
بالحيل آ جني إيه والله
الجنيات الحزمو الجبة
وعرق الشتوي عليهم نايا و صب
قول ما دل .. رجالا حصدوا الحبة
عيشهن هادو انكال واتعبّ
ومنو كتير في الواطا انكبّ
وباقي مصوبر واقف قبة
الحمد آلاف .. الشكر آلاف
الحمد آلاف الشكر آلاف
العيش الرقد أصناف أصناف
الولد الكال.. عزام .. حلاف...ضياف
الرزق الجانا مدلة.. الحلق الجاف اتبلة
بالحيل آ جني إيه والله
الوادي الجانا مترقن
مدّ جناحو الطايل شرقا وغربا
القبلي بروقو على القلعات يضّربن
الدكن البعدن قربن
فوق صنقور المحلة الطالت كبن
قول للمحلة بيوتك خربن
قول ما دلة.. الحلف الجاف اتبلّ
بالحيل آ جني إيه والله
مرحاتنا شرابهن يوت ماغبن
شبعانات في الشقل أب شوك ما شبن
الحمل ولدن وربن
حلماتن تقلن.. جرّن.. فوق سيقانن كبن
اللبن العاتم في ضرعاتن جبّن
المغصة إن كان ضرعاتن خربن
القرعة آ وليد .. السعن آ بنية
القربة كمان... كبوها المية
المغصة إن كان ضرعاتن خربن
شوفو النعمة السالت فوق قيزان الرملة
ناس البندر لبن الشاي بالعملة
سمح الخمج الفوق أسيادو
سمح العز المن أجدادو
الجنيات المشو ما عادو
كان بالردة أكان اتنادو
غرب حامد وشرق بلة
كانوا بحلبو الضرع الدلة
كانوا بحضرو الخير القدحو معلا
الجنيات ما كفرت بنعمة الله
بالحيل آ جني إيه والله
ذات في يوم والغيمة تهتّف مطرا نقّع
فوق نوار الطلح الفقع
ريحة البرد إن جاتك عطرا فايت خمر الفوق أردافا مجضع
شفنا الوادي يقشقش في دمعات الليل
والتعل الشايل بدا يتفقع
تلب حامد فوق مخلوفة أب زور واتربع
طلق الرسن أب زمة وسوّا خبيبا بدّع
هوّد في رقّاب الصي
لا قوه ثلاثة زبيدية
خالفين سيقانن فوق السنكيت ورقاب ألبل بيناتن مرخية
محجوبات بالخرز الفصلو السوميت
كل واحد درقة وسيف وطبنجية وباقي جرابن مليان دلميت
الجنيات اتقبلو وضاقو الحارة وضاقو المرة
وكان حجازن صقر الجو
حامد كان عارفين ضاقوه رجال قبالكن
شوفو أرزاقكم أخير من ضو
حامد عوج الطندب آ وليدات
عوج الطندب نار القصب الهبلت ما بتعدلو
شوفو شلوخو تلاتة مطارق رقدن
وكل تلاتة يمين سياف اتقبلو
حبوب القارح ... ما دلة
ولدا ما ختالن زلة
شن قولك فيهو عليك الله
بالحيل آ جني إيه والله
وينا مراتع الدرت الباسط دايما ببكي عليهن
وين بنوت الحلة البكّر عصرا بدري يسون في شاهيهن
بعد الليل ما يهّود ونحن نهّود.. عاد أماتن ينادن ليهن
نمشي على القيزان نتقادم.. أقيس الخطوة مع التاتاي ومشيهن
والله البعد الحاصل ما نساني
وحاتكن في قمراتنا بشوفو وشيهن
الا النضم أب غنة اللهج السكر وين بلقاهو
بنات الريل الدوب ليهن
الخوف يا ناس كان يبقى الشوق الحاصل بينا معشعش فيهن
مقنع سابل وين بلقاهو
طرفا ذابل وين بلقاهو
وعين بتدنقر من واليهن
الوجنات الشعّن بقّن
ود العين النايم زرقن
مو زايغ رسيان وميقّن
زولن كان خدران ومحقّن
من الشوفة عروقو يطقّن
كان الدنيا بصح تتخلا
كن بركن معاهن فوق رملاة الحلة
الا كمان بنشوفا مذلة
الجنيات الغابت جابت
إنت الجيب بس قايلو قميص افرنجي وكرتونات كرملّة
لا لا وحاتك حاشا وكلا
ديل يوم عادوا اتلافو الجاهل بحقوق الله
ديل كم لحقو البشهق ضايق وداوو العلة
الولد الجايس حقايب سفرو تقال.. تقال من جنس كتاب ومجلة
الحكمة النضم إياهو الكان.. الحكمة الولد اتوضا وصلّ
عادة البلد الدخلت فيهم سكنت .. سكنت ماب تتخلا
نحن كما طارين الحلة ودرنا الطلة
نشيلا معاهم فرح وميتة
حلاة الموت كان في عبدلة
كابي المقنع الجرجار علي موية الوجه يا حوا كابيه
وزازي الدمعة منك بي طريف التوب احزمي حشاك واكربيه
خيراً ولىّ مو مدخور ، رزق الليلة داب الليلة والباكر تشابي وما بتجيبيه
ويا حوا الوكت مرواح وزمنك راح امسكي ضرع شويهاتك احلبيه
ليش ماك حامدة ليشن جاحدة والرزق العليك هطال شربتي التاني فوق بكريه
محمود الغني ومشكور ، غيارك فردة من نسج الكمالي وتاني توب جاراته بنغالي
ومحمود الغني ومشكور ، وعاجك فضة من دق ود تبيد الغالي
ومحمود الغني ومشكور ، نارك موقدة ماعونك ملان مو خالي
ومحمود الغني ومشكور ، وابو زينوبة ناهض فيها ما هو الخملة عنقالي
ومحمود الغني ومشكور ، وأحمد قلتي نور عينيك مختّر فوق بطان الحلة خوجالي
عصاية الصبينة المكسية بي جلد الندف والخامة سرهيتة
وسرج المرقة سناري ومسمّر فوق سراة الباني سنكيتا
وجزلانا مجنزر وطيه رزماً من بطون الطينة مبحوتة
ولازم الفنجرة اتبشَقت سبع خمسات تصل حاكت حجول المارقة من بيتا
ومتلفح كساوي الساكوبيس صوبان وظهرة تقيلة تبرق سنو سوميتة
جيد ياجيت ، وجيدلك حوا بي جنس الجنا القاري
وجيدلك حوا بالولد البعوم الشبكة سداري
متلك حقو لاتنضامي لا تنلامي لا تتضاري
وانت ولدت للبلد البيجيب راس العشاري
عدلك هادو في كُـم الرجال أحمد ، يمين مقنع ولايا
وفي دارة البنات زينوبة فرقت منهن فرقة كتيفها من الفداية
عصاري الوردة فوق المشرع اب مسكا دفق شرق الترايا
بنات الحلة كان عقدن تياب المرقة فوق روسن وقايا
وسون قدلة الوز الرطن صباحي شاقات اب شراية
تبين زينوبة حين تتوقى شعراً كاب بعد ما انساب على الخد المرايا
عصاري الفزعة والفازعات يجن بكر تنايا
نار الهجعة نار الوجعة نار الفزعة لا حطب التكايا
ويات من تبقى حازمة التوب على النص القناية
تبين زينوبا حين تتحزم الخصل الشرابهن صندل الناس الغنايا
شن معنى الكسوف يا حوا والحزن البيجيب ليك الشماتة
وكنزك في الكنوز زينوبة وأحمد كل يوم زايدين قراطين فوق تلاتة
نجوم السعد فوق حجرك تباسم وانت شارفة ترمي في ودع البخاتة
شتول الفرحة تتفتح قبال تتمد ليك الليد وما لاقية التفاتة
اقطعي الزند البقودك من فلاة الخير علي بلد الدراهم
واقلبي الطوف إن كسح بك من جروف الخير علي جزر المراهم
ياديار حوا المراقدك في رويس عبدلة وينك
يا المشاوير المشيتك . يا المشارع السالكة وينك
بالي فيكي إلا درب العيشة باعد بيني بينك
يا لبينة المغربية النازلة من أطراف سعينك
يا السرابة الحبلى كل الناس تعاين لي جنينك
يا السبايك الساوي شيلك ولا طويرة الجنة تسكر من مدينك
يا السواقي النايحة زيك زي حنان اماتنا في حرقة حنينك
يا بنية طرية طامرة كنوزا بي طرف الطريحة
يا نسيمة رشة باردة تجيني ساعة اشيلك موية الصفيحة
يا مليحة .. يا العقيد النام موسد راسه حبات السبيحة
يا صباح الرحمة يا الروح البتلفى حوارها تمرق من ضريحها
يا حزيمات القمح منشرة في زمن الحصاد قبل السراديب
يا رياح الشتوي هابة على مساجين المشال بالفرحة والفرج القريب
يا نزيل قمر التمام الحشو في شيلتو السناجك والارابيب
يا ولد .. نقرات تقيك الفي الحصاد عاقباها بعد المسرة نقرات الدليب
|
|
 
|
|
|
|
|
| العنوان |
الكاتب |
Date |
| ود بادي | Elawad Eltayeb | 01-15-05, 07:18 AM |
| Re: ود بادي | ود الشيخ | 01-15-05, 07:37 AM |
| Re: ود بادي | osly2 | 01-15-05, 07:47 AM |
| Re: ود بادي | Elawad Eltayeb | 01-15-05, 09:59 AM |
| Re: ود بادي | أسامة معاوية الطيب | 01-15-05, 10:43 AM |
| Re: ود بادي | luai | 01-15-05, 11:11 AM |
| Re: ود بادي | المسافر | 01-15-05, 02:41 PM |
| Re: ود بادي | Dr. Moiz Bakhiet | 01-15-05, 02:50 PM |
| Re: ود بادي | المسافر | 01-15-05, 03:18 PM |
| Re: ود بادي | luai | 01-15-05, 03:38 PM |
 Re: ود بادي | Summanism | 01-15-05, 03:37 PM |
| Re: ود بادي | زول ساكت | 01-15-05, 10:51 PM |
| Re: ود بادي | luai | 01-16-05, 10:30 AM |
| Re: ود بادي | Summanism | 01-16-05, 05:45 PM |
| Re: ود بادي | gessan | 01-16-05, 01:27 AM |
| Re: ود بادي | aboalkonfod | 01-16-05, 04:05 AM |
| Re: ود بادي | أحمد الشايقي | 01-16-05, 04:05 AM |
| Re: ود بادي | osly2 | 01-16-05, 08:08 AM |
| Re: ود بادي | Elawad Eltayeb | 01-16-05, 09:19 AM |
| Re: ود بادي | ولياب | 01-16-05, 09:23 AM |
| Re: ود بادي | aboalkonfod | 01-16-05, 10:13 PM |
 Re: ود بادي | Yasir Elsharif | 01-18-05, 02:17 AM |
| Re: ود بادي | Elawad Eltayeb | 01-18-05, 09:13 AM |
| Re: ود بادي | على اسماعيل | 01-18-05, 10:16 AM |
| Re: ود بادي | ود الشيخ | 01-18-05, 09:50 AM |
| Re: ود بادي | luai | 01-26-05, 04:43 PM |
| Re: ود بادي | munswor almophtah | 01-27-05, 03:38 PM |
| Re: ود بادي | saifkeli | 01-31-05, 07:05 AM |
| Re: ود بادي | saifkeli | 02-02-05, 09:59 AM |
| Re: ود بادي | برهان تاج الدين | 02-02-05, 04:03 PM |
| Re: ود بادي | صديق الموج | 02-06-05, 07:36 AM |
| Re: ود بادي | Elawad Eltayeb | 02-06-05, 07:58 AM |
| هام جدا | برهان تاج الدين | 02-06-05, 03:14 PM |
 Re: هام جدا | Summanism | 02-11-05, 07:07 AM |
| Re: ود بادي | الزوول | 02-11-05, 10:23 AM |
| Re: ود بادي | برهان تاج الدين | 02-11-05, 03:36 PM |
| Re: ود بادي | Elawad Eltayeb | 02-28-05, 09:23 AM |
| Re: ود بادي | saifkeli | 03-01-05, 00:24 AM |
| Re: ود بادي | Elawad Eltayeb | 03-01-05, 01:49 AM |
| Re: ود بادي | luai | 05-05-05, 03:45 PM |
|
| |
Elawad Eltayeb
فيس بوك
تويتر
انستقرام
يوتيوب
بنتيريست