الدكتور احمد القرشي/ على قناة النيل الازرق غدا الساعة الحادية عشرة ونصف مساءا ( عن شعر الحقيبة)

Quote: بسم الله الرحمن الرحيم السلام عليك أخي العزيز / دكتور أحمد القرشي والله أنت تستحق قناة بحالها مش بس ساعة واحدة فقد أمتعتنا غاية المتعة بحديثك الطيب مع اللكنة الكردفانية المحببة لناس بارا واللِبيِّض الطيبين و الحقيبة الممزوجة بالدوبيت والله أنا بشاهد وبتخيلك فوق عنافي أصهب ومشاقق بالبطانة ، بس والله ناس قناة النيل الأزرق ( خربوا جِلدًا يبقى سُقَا) والسُقا : هو قربة كبيرة من جلد العجل تسع كمية كبيرة جدًا من الماء وهذا المثل يضرب لمن يملك شيئًا لا يعرف قيمته ولا يقدره حق قدره، ودا ذكرني بواحد لقى ليهو زمبارة عند واحد مابعرف يستعملها ، مسكها وعاين ليها وقال : والله دي كان لقاها خالي العاقب ( مع العلم أن خاله العاقب مات ليهو عشرين سنة ) يعني ياريت الزمبارة دي كان لقاها زولاً بعرف لها * ثم إنهم بقت عليهم حكاية حمد ود دكين في ملحمة ريا وإبن عمها طه، الزول قال داير ريا قالوا ليه شوف أي واحدة غير ريا قال لهم : البقول راسه موجعه بربطولوا كراعه ؟ يعني أنت طلبت أغنية بادي الناس ديل ماراجعوا تسجيلاتهم الظاهر وكمان لو ما ماتوا ما شقوا المقابر؟ لا كتبوا عنوان الموضوع على الشاشة ولا إسم المتحدث على الرغم من ذلك أنت غطيت وسديت الثغرات بحديثك الممتع وحضورك القوي الواثق وهندامك الراقي فتقبل مني جزيل الشكر والتهاني والشكر للأخ إبن النهر الجاف الأستاذ الطيب شيقوق ونعتبرها عيدية جميلة مقدمًا . الزبير الطيب الشيخ الزبير