هل (تخجل) .. ان تعرض (نفسك) على طبيب (نفسي) ..؟

Quote: قبل الامتحانات تقريبا بي حوالي 3 شهور مشيت براي تنقش تنقش لي عيادة طبيب نفسي في شارع الدكاترة امدرمان عملت حجز و رجعت البيت سوقتها من يدها قلت ليها ماشين السوق و تنقش تنقش برضو طواااالي دخلتها لعيادة الدكتور

Quote: لكن صراحة نصحها نصائح مفيدة جدا" و شجعها و أداها طرق للمذاكرة وأهتم جدا" بالموضوع و الحمدلله إمتحنت و نجحت و فلحت .

.. اها شوفي حاجات بسيطة جدا بتخلق فروقات كبيرة ..
بالنسبة لي موضوع الامتحانات ..
لما كنا ممتحنين شهادة .. نحن كلنا الدفعة بتاعتنا كنا قاريين كويس بالاضافة لي كدا .. عندنا كمية ضخمة من الاسبوتينات الكانت ما بتخرش مية .. اضف لذلك .. كل واحد فينا خاشي ليهو بي ( بخـرة ) لا ترى بالعين المجردة لكن مبالغة
تعرفي يا هبـة .. جابو لينا ورقة امتحان تمسكيها تقريها مية مرة ما تفهمي اي حاجة فيها زي الكانها مكتوبة باللغة الصينية .. والله من شدة ما اتربشنا الواحد ما عرف المكان البكتب فوقو اسمو بي وووين ..؟
الاسبوتنات كلها طلعت اي كلام
البخرات طلعت ما بتأكل عيش ..
كل القريناهو خلال اسنة فيما يتعلق بالمادة .. نسفتو لينا اسئلة الامتحان المكتوبة اللي ما عرفناها قاصدين بيها شنـو ..؟
عارفة لمدة عشرين دقيقة ماف زول كان قادر يتمالك نفسو .. اي زول داخل غرفة الاجتماعات كان عرقان وشعر بي هبوط حاد وفي رغبـة اكيدة انو يرمي الورقة دي ويقلع ملابسو ويجري في الشارع ..
واحد من اصحابنا ما بستحضر اسمو .. ياخ دا فجأة قام خلق فوضى .. عجيبة .. وهو على ما اعتقد ان وكان عندو مشاكل نفسية .. لانو ما كان منتظم معانا لي فترة طويلة .. الزول دا ضرب الكراسي القدامي .. ورشه ليهو كلام عجيب عن امهات كل من عمل في وزارة التربية في السنوات التي سبقت فترة الامتحانات وتحديدا حدد الفترة بي دقة
رفع الكرسي وتوجه نحو الباب .. واقسم بكل الكتب السماوية أنو البقرب ليهو بيشرب من دمو .. وسرعان ما تحول صديقي إلى كائن عجيب بي عيون عجيبه بشعر عجيب .. ولون بشرة مختلف .
اهـا .. بعداك تحول الفصل لي فيلم هندي .. ولو لا تدخل استاذ المادة الذي كان بمثابة صديقنا الأكبر اكتر مما هو استاذنا ربنا يرحمو ويغفر ليهو .. لكان دخلنا وزارة التربية وقتها في حتة ضيقة جدا ..
المهم هدانا وصديقي اياه جابو ليهو قزازة بيبسي .. وانا ذاتي القدامك دا طلبت لي قزازة بيبسي وابشرك جابوها لي .. والله لو ما جابوها لي كان اكون بكورك ليهم لحدت الآن بعداك الكنترول فكة المراغبة واكتشفنا انو البخرات العندنا معظمه ضربت بس كانت رواشة مننا وحالة نفسيه انتابتنا جراء رهبة الامتحان ..

Quote: عذرا" للاطالة لكن البوست مقام ونسة و بوح ولا شنو

يا هبة البوست دا تحديدا معمول من أجل ان نفضفض مع بعض .. مبزول لكل الاخوان .. دا بوست نفسيات .. ومتاكد تماما ونساتنا الجميلة دي بتطلع بينا لي حلول للكثير من المشاكل الما قادرين نعرضه
اظهري .. وبوحي وتونسي .. وقشة ما تعتر ليك