هل (تخجل) .. ان تعرض (نفسك) على طبيب (نفسي) ..؟

Quote: جفاف غريب في البشرة وزهج مستمر، وتحفز للشكل بصورة مزعجة، وعدم نوم .. ياخ لو في زول قال لي السلام عليكم براجع نفسي قبلما أرد عليهو، لأنو الرد يمكن ما يكون وعليكم السلام..

Quote: يا جماعة أنا كويس محولني للزول ده ليه؟؟ طبعاً كان برفقتنا (حكومتنا الرشيدة)

محولنك للزول دا ليييه ..؟
طبعا الوكت داك بتكون فكرته في اخوك عماد وح يدق جرسك كيف ..؟ وح يحكي للجماعة والله عندي اخوي مسكين ركب الظلط وكدا .. ااي . ااي .. انا ناقش التوهمات دي .. ياخ انا بنازع في الفكرة بتاعت الطبيب دي يمكن ستة واللا سبعة سنة .. اول حاجة كنت ملاوز ليك منها .. الجماعة في البيت .. الأخوان .. ديل طبعا ما بيريحوك عاقل كنت ام مجنون .. طبعا لحدت الان ماف واحد فيهم نقش موضوع الدكتور دا .. كان نقشوهو صدقني .. بقومو حسع باقي اليوم دا .. بشغلوها لي .. انت اخير حكومتكم الرشيدة .. لكن ان عندي شفوت .. مما مرقته من السودان خاتتنها لي .. كلما اجي اجازة بيعملوا لي فحص دقيق جدا .. لو دقسته في اي حاجة حتى ولو كانت صغيرة .. برنامجي بكون بايظ جدا .. لكن اخوك (تنج) طبعا
عارف اليوم الوحيد الدقسته فوقو .. كان في اجازة قبل كم سنة .. وانا ماشي المطار الصباح بدري نحن الليل كلو مدورين كشاتين .. ويست مسخن اربعة جوه وعشرين قاعدين بره ... اقل واحد فيهم حرفنه بيكون عارفك شايل شنو في ايدك من كروت .. صاحبنا الكبير ابوي الله يرحمو ويغفر ليهو .. كان قاعد بره العشرة بتاعتو الجاية .. العشرة الكنا جوه .. انا واخوي الصغير احسن زول بتاع (كربنـه) في الدنيا لاعبين ضد اخوي الكبير احسن زول ممكن تدورو وما بحب الطقطقه اصلو .. معاهو حريف من اولاد الحلة .. في اول توزيعه شيلناهو ليك الاسثنـا.. تعرف انا عملته شنو ..؟
فتحت الباب قمته جاري جيت داخل ليهم البيت بالحيطة .. ابوي الله يرحمة دخل جوه جاب (الطرمبـة) عزف جلالات عسكرية .. طبعا اخوي دا قلب الطربيزة شتت الكشتينة .. عمل عمائل فظيعه .. عارف مش مفترض انا (اعرش ) علي كدا واسافر بي اخر مشروع كربنـه ..؟
لي شلاقتي .. دقسته .. نزلو ناس ابوي العشرة الجديدة .. انت قايل اللبسوها ليهو منـو ..؟ ما انا القدامك دا ذاتي ..؟ وكتبوني ليك باقي الليل داك تعهد .. واقرارات ووقعته على الدفتر .. تخيل من كم سنة كلما اجي اجازة بطلعو لي الدفتر بي توقيعاتو وكمبيالاتو ..

Quote: عندك توتر عصبي حاد، ونصحني بالابتعاد عن الضغوط وأي حاجة ممكن توترني

بالمناسبة يا صلاح .. نحن كل لحظة كسودانيين معرضين للبرنامج بتاع التوتر دا .. ياخ قبل كدا وقبل عشرة سنوات شعري دا من غير سبب (اتحته) بقى عبارة عن صلعة عجيبة جدا ما كل الشعر .. بي جهات محددة ( اتجقم) لي ( جقم جقم ) شبكوني ليك .. خرا حمام .. على بول جمل .. علي لبخه حلبة .. يا زول ما نفع .. والوكت داك اخوك بتاع جنصصه ووجاهات .. بعدين التخريمات الفي الراس دي ادتني ليك في حناني .. عملت لي نفسيات عجيبة .. امشي اي دكتور يطلع وهمي جدا ويشيل كنجالاتي .. آخر حاجة وقعته لي في مصري فقري جدا بتاع جلدية ... ياخ دا متعني ليك متعة قالي كلمتين حسيت ليك اني خنفسته .. بعداك رجمني ليك حقن في راسي زي حقنت المسدس الزمان ديك .. انا وصلت البيت ملبوش وما فاهم حاجة تصدق بعد اسبوع واحد انا شعري بدا يقوم بي طريقة عجيبة جدا والاسبوع التاني خنفسته .. واتضح انو المسالة دي اسمها الثعلبة ... لكن الطرريقة الاتعامل بيها معاي من ناحية نفسية ريحتني تماما .. عارف دا انا ختيت ليهو كيس ف التربيزة مليان حبوب .. مية نوع ومليان مراهم وحتى الحلبة بتاعتي جبتها ليهو وجبت ليهو سامبل من خرا الحمام الجلطو ليك .. تتخيل عمل شنو؟؟ خم ليك الحاجات دي كلها وكشحة ليك في الجردل بتاع الزبالة الجمبو بي طريقة عاطفية جدا .. قالي تعرف يا علاء انا متخصص في الحركة دي .. واكتر ناس بيجوني سودانيين بقيت فاتح العيادة دي علشان خاطر عيونكم .. قالي السبب الاساسي الضغط النفسية القاعدين تتعرضوا ليها اكتر من اي شعوب تانية ..
تخيل بعد الاسبوعين ديل وبعدما خنفسته بقيت اشوف ليك الدنيا دي بي منظور عجيب خلاص .. صادف انو لاقيت ليك واحد سوداني شاب بلاي راسو بقى عامل زي تربيزة اللحام .. فراغات وفجوات وحبوب .. الزول دا صاري ليك وشو بي طريقة عجيبة قرفان من اي حاجة في الدنيا .. متحفز لي اي مشكلة تخيل نزلت من العربية وجريت ليك عليهو .. قلت ليهو والله ما تقول ولا كلمة .. حسع دي تمشي معاي وفي عربيتي دي .. واسبوعين بس انا ببقيت خمفس ..
تصدق انو الزول دا جاني بعد اسبوعين هو معاو الحكومة حقتو .. ياخ ديل قربو يعملو لي حفلة عيد ميلاد
الرسالة يا صلاح في الموضوع دا .. ربما يكون هناك كلمة واحدة من الطبيب المعالج .. او عقار طبي يكون قدام عينك وبي ارخص الاتمان بينما تكون صرف وقتك ومالك وهو في متناول يدك .. بس اهم حاجة انك تصل الطبيب المعالج .. والطبيب النفسي لا ينفصل من الطبيب العادي .