Quote: نتسال سويا عن دور الشرطة في اغلاق المطاعم بعد ان استكملت كل التصديقات ؟ وهل من حق اي سلطة اغلاق تلفزيون او اي جهاز في المحل يشاهده زوار المطعم واسرهم ؟
شيخ العوض
سلام وجمعة مباركة ،،،،، عارف يا شيخ العوض السودان دا في عهد الانقاذ بقى بلد هامل ولا يمكن تعرف تجيب حقك فيهو ولكن قبل الاسترسال لا بد من هذا السؤال: هل هذا التصرف هو تصرف فردي من فرد أو ضابط أم هو تصرف تسنده قوانين النظام العام؟ العساكر الصغار يا شيخ العوض في الوطن المسمى السودان بمارسوا في السلطة بصورة سافرة جداً وبدون الرجوع الى الضوابط والقوانين يعني ممكن عسكري صغير لا يسوى بصلة يقوم يديك كف ويكسرك دون أن يطرف له جفن لأنه متأكد من عدم محاسبته برضو ممكن عسكري صغير يفرتق ليكم حفله بدون أي سبب فقط لأنه يريد ذلك ونفسه الامارة بالسوء قد زيّنت له ذلك قبل كم سنة كنت راكب في الحافلة بتاعتنا ومعاي السواق في عسكري راكب ورفض دفع الاجرة عندما طالبه الكمساري بحق الركوب ظللت صامتاً اراقب الموقف وعندما احتد الكلام بين العسكري والكمساري قام العسكري ضرب الكمساري كف بدون أي سبب في اللحظة دي شواطين وعفاريت الدنيا كلها ركبتني وتدخلت وتشاجرت مع العسكري لحسن الحظ كان في دورية تفتيش بتاعت مرور في الطريق فيها ضابط وصول قلت للسواق وقف الحافلة ونزلنا تحت للتحدث مع الضابط قام الصول نادانا ورفضت الحضور اليه وقلت له : أنا عايز اتكلم مع الضابط كلامي ما عجبو وفجأة رفع يده وعايز يضربني كف في اللحظة ديك كان في يدي عصاية قلت ليهو لو أنت راجل مد يدك عشان تشوف البحصل ليك شنو فتوقف وواصلت انا حتى وصلت للضابط وحكيت له الحكاية قال لي : عايز تعفي حقك ولا لا؟ قلت ليهو: لا اجبر العسكري على دفع الاجرة وواصلنا سيرنا الشاهد يا شيخ العوض أن الفوضى والجهل بالحقوق منتشرة جدا بين الناس وأيضاً هناك الكثير من التفلتات من بعض الافراد والضباط في انتهاك القوانين وحقوق المواطن طبعاً لا استطيع الجزم بأنها سياسة ممنهجة للدولة وفي ذات الوقت لا أعفي الدولة من مسؤوليتها في منع مثل هذه التلفتات بل أذهب بعيداً في ان اقول أن الدولة تبارك احياناً مثل هذه الانتهاكات والتفلتات
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة