يا كبر نورت البوست واديتو رونق وشكل مختلف باندياحك المكرب ده. أوهو عرفنا انك مكرب كل حاجة كويس مش القانون وبس، مجاهد فنان دي ما دايرة كلام تب، وغناها برؤية مختلفة طبعاً يعني حاول يضع فيها بصمتو وده المميز في أداء مجاهد من الناحية النظرية، بالنسبة لي أنا عصام غناها كما يجب أن تًغنى، والبعجبني في عصام ده انو بيحس بالغنى ويغنيهو، pure بدون زيادة ولا نقصان، خاصة غنا العمالقة زي وردي ومحمد مرغني ديل، شوفو برضو غنى الوصية بتاعت وردي كيف طبعا الأداء المميز ده بالنسبة لعصام ومجاهد نابع من انهم بالاضافة للموهبة قارين الشغلة دي وقعدوا ليها أ ب ت ث وده اأنا بحبو وبنفتقدو في بلدنا السودان، فنان جديد ما بعرف اسمو، مرة في قناة النيل الأزرق مسك ليك أغنية(حرمان) لحسن عطية جابها الواطة، الأغنية دي بالاضافة للحن العبقري تتميز بقوة الكلمات، يعني لمن يقلب (يزحم قلبي حبك) ويبقيها (يرحم قلبي حبك) في المقطع ده {ازداد بي شجوني .. يجفو النوم عيوني ويزحم قلبي حبك} تاني عليك الله الأغنية دي فضل فيها شنو؟ أها يا صاحب (كتر خيرك للمرور) بقن عندك بوستين غنا مطلوب فيهم، ده وبتاع الرقي البي هناك، بالمناسبة أخوك حاتل فيهو بالشباك خالين الشغلة للمعلمين الكبار وقاعدين نستمع:) الغنا السمح ده يا كبر والارث الضخم للغناء السوداني من الحقيبة وانت جاي من الاشراقات القليلة الفضلت في البلد الراحت دي، وحقوا لناس تتلمى حولها وتوطد علاقاتها بيها عشان شوييية من اللحمة الوطنية والتماسك الضيعوهو الكيزان ديل يبقى، عشان نحن بقينا زي لحم الرأس وماشين لواقع صعب، تلقى في البيت الواحد أخوان أشقاء واحد بلجيكي والتاني ايطالي والتالت اميركي والبنت بريطانية وواحد قاعد في الخليج ميطي لا لامي هنا لا هناك.
وبرضو بنقول معاك و ما احلا البكا تحت الحيط يا كبر..!!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة