هل نحن في حوجة لكتاب اسود جديد ؟

Quote: انا وكت ايدتا الكتاب دا قلتا انا بعتبر الاحصائيات دي صحيحة وهي فعلا صحيحة والبقول ما صحيحة يجي يطرحا ويجيب الارقام الصحيحة يا دون فلورو.. شنو البعملني عنصري!!!!!؟؟...

أنا حا أوريك شنو البيعملك عنصري ...

أولاً انا ما عارف انت غلاتك بتاع الإحصاءات صحيحة ولاّ ما صحيحة دا جايبو من وين ... الإحصاءات الوردت في الكتاب الأسود (الجزئين) صحيحة طبعًا ... مشكلتها مشكلة منهجية ... انت لأنو ما بتعرف منهجية يعني شنو راسك داش ... (ودوشة راسك دي من عوامل عنصريتك لأنو الجهل ركيزة أساسية للعنصرية لكن حا نتعامل مع جهلك باعتبار انو عامل مساعد ما سبب عنصريتك الأساسي)

مشكلة الكتاب الأسود المنهجية انو كان انتقائي في الحقب التاريخية وأنواع الوظائف وطريقة تحليل الإحصاءات ... يعني انا لو عملت إحصاءات لى نسبة التعليم بالقبيلة وعدد وفيات الأطفال دون سن 18 سنة وبالمرة متوسط وزنهم وشوية لف ودوران في منهجية الإحصائيات بوصل لى نتايج مختلفة ... لاكين الما بدورك في الضلمة بحدر ليك ... وعين الرضا عن كل عيب كليلة ولكن عين السخط تبدى المعايبا ... والعنصرية ليست إحصاءات ... العنصرية هي "السخط" و "عدم الدورة" المذكورات ... لأنو العنصرية موقف إستباقي غير مبني على حكم راشد ... وملكة الحكم الراشد هي نقيض "العنصرية" ... وهي ملكة لم يفتقدها الوسط تمامًا كما تدّعي ... ولكن الوعي بالعنصرية وعي جمعي يشمل المتميّزين المنتفعين من النظام العنصري والمقهورين عنصريًا على حد السواء ... وأيّ من الطرفين لا يعي العنصرية يكون شريك في استمرار الممارسة العنصرية ... الفرق أن ضحية العنصرية يحس بالمظلمة سواء كان يعي العنصرية أو لا يعيها ... ما شفت ليك شافع مندهش لقساوة التعامل معاهو لأنو ما عندو تصوّر للمنظومة العنصرية الدخل فيها ... بعد داك يبدا يتطوّع ويدخل في دور تدريب نفسو على عدم المبالاة ... دي بتحصل كل يوم وفي كل ركن من أركان العالم دا ... انا قاعد اشوفها في ولدي في امريكا دي ... لاكين ما بربيهو على انو عندو حق مفروض يمشي يقلعو بالعداء والكراهية للآخر ... يطلع ليّ متخلف زي ناس العدل والزغاواة لو أنا ربيتو على الكراهية ... الكراهية لا تولد سوى الكراهية ولا ترد حق مسلوب أبدًا ...

وعي الضحية بالعنصرية لا يكفي لمواجهة العنصرية مالم يشمل هذا الوعي مفاتيح الحل وهي أن وعي العنصري بالعنصرية هو ما يغيّر مردودها ... مارتن لوثر كينج نجح في حركة الحقوق المدنية لأنه استهدف وعي البيض بتفكيك مردود الأفعال التي كانوا يعتبرونها من ضروب المعتاد اليومي ... كأن توظف شقيقك دون اعتبار للكفاءة لأنك على الأقل تعرفه وتستطيع توقع ردود افعاله في العمل أو تحمله على محمل حسن النية إن أخفق ... العنصري لا يحسب أن سلوك كهذا يضيّع فرصة كسب عيش شريف لكفاءة من المجموعة الأخرى ...

دعني أحكي لك قصة عن "المجموعة الأخرى" ... نحن نسكن في الثورة في منطقة متاخمة لأطراف شمال أمدرمان حيث يسكن عدد لا بأس به من النازحين من الحروب والفقر والتهميش الذي يضرب أصقاع السودان ... وكل نهار يدخل الثورة مجموعة من الأطفال سيرًا على الأقدام بحثًا عن أي مصدر رزق ... انا جايي من برة لقيت تلاتة اولاد نوبة بيتسكعوا في ضللة رقيقة في الهجيرة يبدو أنو يومهم كان سيء ومافيهو ما يشجعهم على اللعب أو يشتروا طعمية من دكان أو يرجعوا البيت أو أي حاجة غير وقفة الشارع وحدهم ... المهم قلت ليهم اغرفوا البلاعة بى جنيه ونص ... ودخلت خليتهم الله ورقبتهم في الشارع ... لقيت ود اخوي في الحوش قلت ليهو في ولد جاييني في الشارع امشي شوفو ... ود اخوي مرق راسو تاوق يمين شمال مافي غير اولاد النوبة التلاتة بيغرفوا في البلاعة ... جا داخل قال ليّ "مافي زول" ... قلت ليهو الله بسألك ... قال ليّ والله مافي زول في الشارع ... سقتو من ايدو قلت ليهو ورحكاكا ... فتحنا الباب قلت ليهو انت عاينت وين؟ ... قال شوف براك من راس الشارع لغاية الميدان مافي أي زول ... تخيّل ... الاولاد واقفين جنبو واحد بيغرف واتنين قاعدين ود اخوي ما شافهم زاتو ... لأنو وعيو الإجتماعي خلاهو يمرن بصرو على انو يمسح شفع النوبة من المنظر القدام عينو ... وبيعمل المسألة دي بى منتهى البراءة يوم واحد ما شارك في اجتماعات المندوب السامي البريطاني لتخطيط سياسات المناطق المقفولة ... قلت ليهو حرام عليك ... تلاتة زول قدامك تقول لي مافي ولا زول؟ ... قعد يضحك بى خجل وقال لي يا عمو انا ما قايلك بتقصد ديل انا قايلك بتقصد ولد صاحبك ... قلت ليو الولد الفي النص دا صاحبي أها رايك شنو؟ ... انسحب مني انسحاب تكتيكي لاكين من اليوم داك بقى بيعاين ليّ بى عين اكتشاف حاجة مهمة كانت فايتة عليهو ...

حوادث زي الحكيتها ليك دي في منها آلاف ... الطلبة الدينكاوي القال داير موية والابو رسل الولد الولد جا قال لى ابوهو "نديهو موية بالكوز بتاعنا؟" والسؤال قدام الطلبة القاعد راجي الموية ... اتخيّل ... المهم انها بتغيّر في الوعي وبتأثر في الأفراد لاكين ما حل ... الحل في وسائل التواصل الجمعي زي المؤسسات التعليمية ... سودانيزاونلاين دي - كتّر خير بكري - منارة بتاعة وعي واستنارة قاعدين نحرص انو نحكي فيها قصص شخصية زي دي ونحاور امثالك بغرض نشر الوعي ما استطعنا ... نرجع لى البيعملك عنصري ...

البيعملك عنصري فهمك للتطور التاريخي الخاتينا في مأزق العنصرية الحالي على أساس انو وصلنا ليهو باستعلاء المنتمين لثقافة الوسط ... المتنمين لثقافة الوسط لا يخلون من استعلاء ولكن استعلاءهم كان تماشيًا مع الواقع العنصري وليس استعلاءهم هو سبب العنصرية الأساسي ... سبب العنصرية الأساسي هو مصالح الانجليز الإقتصادية ... يريدون قطن وصمغ عربي وذهب ومعادن ويتعاملون مع السودان ككتلة جغرافية دون تمييز بين شايقي وشلكاوي ... سعداء الحظ هم من ينتمون على الشريط النيلي لأنه يسهل وضع شبكة سكك حديدية تدير المنطقة كلها وتصدّر خيرات البلاد بأقل تكلفة ... فالشريط النيلي يدعمه خط الوابورات للجنوب وليس هنالك كثير عناء معماري لبناء خطوط شبكة القطارات في أراضي سهلية ممتدة ... وعوامل كهذه جعلت أهل الشريط النيلي أهل حظوة دون أن يمارسوا أي استعلاء أو تكون لهم أي يد في الإختيار ... وما لم تفهم هذه الحقيقة فإنك لن تفهم خطأ المنهجية التي قامت عليها انتقائية الإحصاءات الواردة في الكتاب الأسود ... ولن تفهم سر فشل كل المجموعات التي ادّعت العروبة لمكمايكل في أن توفر له وثيقة واحدة معتمدة تدل على أصولهم السامية (فهذا السمو والنبل أتاهم على حين غرة) ....

البيبقيك عنصري تاني انك - لعدم إدراكك لبنية ودوافع العنصرية - ليس لديك حلول عملية ناجعة لمواجهة الممارسة العنصرية التي سببت عدم التوازن الإقتصادي والإجتماعي في السودان ... فحلولك التي تطرحها مثل (تفكيك "الأدوات الثقافية" وحرمان الوسط من قواعده التي يستند إليها لجره لرحط الشنو كدا ما تعرف) هذه حلول ليست عملية ولا يمكن وضعها في آلية عمل واضحة كالدستور أو الإنتخابات أو الفدرالية أو التعليم أو أي شيء ... اللهم إلاّ ناس العدل والزغاواة يجوا يحتلوا الإذاعة بى دبابة عنوةً واقتدارا ... في الحالة دي حا يتعاملوا مع قناة "الشروق" البتبث من دبي كيف؟ الله اعلم ...

والبيبقيك عنصري هو تناولك وفهمك وطرحك المبني على "عين السخط" التي لا تبدي لك إلاّ "المعايبا" ...





... المهم ....