|
Re: رحيل باولينو متيب (Re: قاسم المهداوى)
|
خالص التعازي لكافة آمة دولة جنوب السودان في رحيل احد القادة المشهوريين . له الرحمة و المغفرة .
ـــــــــــــــــــــــــــــــــــــــــــ أخي جوزيف اذكر أن للقائد باولينو قريب يدعي آيليا يعمل متطوع معنا في احدى منظمات المجتمع المدني بالخرطوم و كان يسكن الكلاكلة و نشأة بيني و ايليا صداقة قوية جداً و مميزة و لم اذره في البيت و لم يزورني ايضاً و لم اكن اعرف صلته بالقائد باولينو و في احدى المرات ارسلتني المنظمة لعمل خارج الخرطوم استغرق اسبوع عدت بعدها و جدت ايليا غير موجود بالمكتب فسالت عنه فعلمت انه اجرى عملية جراحية وحرج للاستشفاء بالمنزل فسالت:- اها زرتوهو؟ كانت الاجابة :- لا !!! خرجت من المكتب ساخط و حانق اتصلت على ايليا و طلبت منه وصف المنزل فوصفه و توجهته الي الكلاكلة (الزمن داك باولينو موقف الخرطوم على فد كراع) و صلت شارع البيت استرعي انتباهي عربتين جيش و احده في راس الشارع و الاخرى في نهايتو و عدد من العساكر في الشارع و العربتين مربوطة فيهم اي و احده سلاح كبير المهم لما دخلته الشارع في عسكري منهم (لابسين جيش):- ماشي وين؟ رددت:- زيارة لواحد صاحبي ساكن في الشارع دا و عامل عملية! سالي:- ساكن في ياتو بيت ؟ رددت عليه حسب الوصف فقال لي :- اسمو منو؟ قلت:- ايليا! قال :- و بتعرفو من وين؟ رددت :- زميلي في الشغل! تقدم معي العسكري و وصلنا الباب و ضربنناهو فتح عسكري تاااني الساعه ديك بالجد انا كنت محتار و قلته قطع شك اتورطه في ورطه بس لاني كنت متاكد بسلامة موقفي ما كنت خايف شديد تحدث العسكري مع الرجل الاخر :- الزول دا قال زميل ايليا و جايهو زيارة .. الراجل التاني عاين لي سريع بقوة و قال :- اتفضل دخلته قام قال لي :- بس اقعد في الكرسي دا دقيقة و احده و دخل جوه و جاء راجع قال لي اتفضل دخلته و هو معاي دخلني لحدي ما لقيت ايليا راقد الساعه ديك اطمنته تمام و بادرته ايليا:- يازووول دا شنو دا انت ساكن جوة معسكر؟ قام ضحك شديد قال :- ياخ تقول شنو؟ قلته ليهو :- بالجد القصة دي شنو؟ قال:- انا ساكن مع خالي و خالي عسكري ... قلته ليهو :- يازول خالك دا لا عسكري لا حاجة دا اكتر من عسكري !!! في اللحظة دي بالضبط دخل باولينو متيب و قال :- مرحب بيك و زيارة طيبة سلم علي شديد (لحدي اللحظة ديك ما عرفتو) قام سال ايليا:- كيف هسي ؟ ايليا رده:- تمام ! بالينو:- اهو صاحبك جاءك زيارة يلا ابقى قوي و قوم عشان ترجع الشغل ! و سالني:- الزول دا كيف معاكم ؟ رديت:- لو كان كعب ما كان بزورو ... ضحك و قال:- خلاص يلا انا امشي و لو عايزين حاجة اطلبو. و خرج و بعد خرج عرفته انه القائد باولينو متيب الخوفه القبيييل ديك رجعت لي شوية و سريع راحت . الحكاية دي بقيت ماسكه لاخوي ايليا كل مرة اقول ليهو :- ياخ زرتك زيارة ساااي قربته اضيع فيها .
ربنا يرحم القائد باولينو و تحياتي لاخي ايليا اين ما كان .
|
|
|
|
|
|
|
العنوان |
الكاتب |
Date |
رحيل باولينو متيب | Zakaria Joseph | 08-22-12, 06:30 PM |
Re: رحيل باولينو متيب | Mahmoud Mustafa Mahmoud | 08-22-12, 06:43 PM |
Re: رحيل باولينو متيب | Zakaria Joseph | 08-22-12, 06:44 PM |
Re: رحيل باولينو متيب | Zakaria Joseph | 08-22-12, 06:45 PM |
Re: رحيل باولينو متيب | قاسم المهداوى | 08-22-12, 06:52 PM |
Re: رحيل باولينو متيب | سفيان بشير نابرى | 08-22-12, 09:46 PM |
Re: رحيل باولينو متيب | GeerTor Tong | 08-23-12, 00:31 AM |
Re: رحيل باولينو متيب | Zakaria Joseph | 08-23-12, 04:48 PM |
Re: رحيل باولينو متيب | Zakaria Joseph | 08-23-12, 04:49 PM |
Re: رحيل باولينو متيب | حاتم محمد | 08-23-12, 05:52 PM |
|
|
|