غدا محكمة رضوان عضو المنبر بتهمة العماله من سيحضر منكم؟!

Quote: Saturday, July 7, 2012 4:02 PM استاذة تراجي سلام عليكم بخصوص الشباب كان في شغل في الحاج يوسف يوم الثلاث وقبل يبدأ تم اعتقال رضوان من سوق 6 بالحاج يوسف و3 من الشباب الكانوا معاهو واتحركت نفس القوة الى منزل الاسرة وداهمت المنزل واعتقلوا والده يعقوب واخيه سفيان وتم تفتيش البيت وسرقة كل ممتلكات وهي عبارة عن 3 شنط ما زول عارف الكان بداخلها شنو الا رضوان لكن المهم الشنط اصبحت فارغة حتى الملابس وشالوا قروش بتخص ناس البيت وفتشوا البيت بطريقة وحشية ومذلة وارعبوا الاطفال وضربوا بعضهم وبعد مشوا ودواهم قسم مربع 5 بالحاج يوسف رجعوا داهموا البيت للمرة التانية في خلال ساعة واعتقلوا وداد درويش و نمارق. وما كان معروف مكانهم الا اليوم التاني اتضح انهم كانوا في حراسة المباحث الجنائية ولما مشينا رفضوا لينا نقابلهم وقالوا قيد التحري والتحقيق ومن ثم يرحلوهم قسم الشرطة ولكن اتفاجأنا اليوم التاني ودوهم المحكمة من دون ما يدوهم فرصة يطلبوا محامي ولقينا فرصة اتكلمنا مع واحد منهم بمعاونة ربانيه تمكنا من رؤيتهم وقلنا ليهم تطلبوا تاجيل المحكمة وتطالبوا بي محامي اتجلت المحكمة الى الاحد 8/7 وفي عدد من المحاميين حيكونوا حضور وممنوع مقابلتهم الى اللحظة انا جيت من هناك الان. اما رضوان اليوم الاول كان معاهم في حراسة المباحث لكن التحقيق معاهوا تم بواسطة الامن وكان بجوا يسوقوهو في الليل ويجيبوهو الصباح ومرات طيلة فترات النهار بيكون مع ناس الامن وما ودوهو المحكمة مع باقي الشباب وامبارح تم نقلو الى رئاسة الامن جوار القيادة العامة ومشينا صباح اليوم الى رئاسة الامن في الاول قالوا ما معاهم وبعد جوطة اقروا انو معاهم لكن مافي طريقة للمقابلة الا بعد اسبوعين من تاريخ الاعتقال حسب قانون جهاز الامن وكل القالوهوا لينا انو نجيب ليهو ملابس وما في اي زول يجي يسال منو تاني الا بعد 15 يوم. في اليوم التالي للاعتقال تم نشر الخبر في عدد 3صحف تابعة للنظام (يقول الخبر :تمكنت القوات الامنية من احباط محاولة تخريبية بالحاج يوسف وتم توقيف 9 من المتورطين وفتاتان؟....)واليوم الخبر معدل باضافة وضبطت بحوزتهم متفجرات وممنشورات . ويقود هذه العملية شاب سوداني متزوج من امريكية وله علاقة بالحركات المسلحة وكانت القوة الامنية تترصد حركته حتى وصوله الخرطوم مرورا بجوبا.....وكلام فارغ كتير. القصد منو خلق راي عام تمهيدا للمحاكمة... ملاحظة رضوان كان متابع شديد وكل تحركاته كانت مرصودة بالاضافة الى المراقبة الشديدة للتلفونات ودي المشكلة الاساسية كل الشغل مراقب عبر المكالمات ولسه الشباب ماقادرين يخلوا حكاية الشغل بالتلفونات دي . بكرة حاوافيك بالمستجدات بعد المحكمة تحياتي