|
|
 Re: في محاورة أفكار حسن موسي المطروحة في ندوة فلادلفيا (Re: Sinnary)
|
المشكلة إنه ده الحلم لكن الواقع بيكذب الحلم عادة لأنه نظام مايو ما لقى في العملية الثقافية اكثر من دور الأداة الدعائية عشان ما يجمل بيها وجه النظام في اللحظة الإبتدت فيها خطط التنمية تنهار والمؤسسات الثقافية بقت مجرد وسائل حكومية في خدمة البروبقاندا وبعد نظام مايوكل الانظمة الحضرية الورثت جهاز الدولة ما شافت في الفن والأدب اكثر من مجرد وسيلة أداتية لتجميل وجه النظام. في بداية الثمانينات بتذكّر أنا انشغلت لفترة كنت بجمع في مادة بحث جامعي حول مؤسسات الفنون الحديثة في السودان وتوصلت من البحث ده لخلاصة إنه الدولة في السودان بتمثل الراعي الرئيسي وكمان الوحيد للفنانين المعاصرين على اساس إنه الدولة هي الوحيدة البتدرس الفنانين في كلية الفنون والمعمار والدولة هي المخدم الوحيد للناس ديل وبالتالي الفنانيين لما يتخرجوا ويلقوا نفسهم في الحياة العملية بلقوا نفسهم ما عندهم مفر من إنهم يتصرفوا وفق النموذج بتاع الفندي يعني هم أفندية وينتظروا المرتبات وعلاوات السلم الوظيفي هؤلاء الناس العندهم مزاج ذي دا بتجي لحظة من اللحظات لما يجي رئيسهم في الدولة أو لما يجي يقول ليهم نحنا عندنا مهرجان الثقافة الفلاني ومهرجان الغناء الفلاني تعالوا أعملوا الحاجة الفلانية بيجوا يعملوها على أساس ده جزء من شغل الحكومة وكمان يكون فيها اوفرتايم وعلاوات ، فهؤلاء الفنانين الإشتغلوا على نموذج الأفندي هم مكنوا الناس الإشتغلوا على جهاز الدولة سواء كان في أيام مايو أو بعد مايو من أنهم يجعلوا من الدولة راعي لا يرد له طلب فدا شكل من أشكال الرعاية أنا بسميه رعاية آيدلوجية للفنانيين في السودان الدولة طبعاً في السودان هي دولة قوية جداً يعني الدولة مثلاً في النموذج بتاع التطور الاجتماعي الكلاسيكي في أوروبا مثلا الدولة هي بنت المجتمع يعني المجتمع بيتطور وبعدين هو المهيمن فالدولة بتعمل ثورتها عشان تغير بيها أحوالها المشكلة إنه في السودان الدولة جابوها الانجليز بضراعهم وسلاحهم وفرضوها على المجتمع السوداني والناس السودانيين الورثوا دولة الإنجليز دولة كتشنر دي إستمروا يمارسوا ويتعاملوا مع المجتمع السوداني من فوق وهم دايرين يخلقوا الأمة السودانية ودايرين يغيروا المجتمع ودايرين يعملوا ويربوا الناس ولحدي الليلة الناس الإستولوا على جهاز الدولة في السودان كان عندهم حلم ذي دا إنهم هم أقوى من المجتمع السوداني وهم دايرين يغيروا المجتمع السوداني بالتالي بيدوا الناس أوامر عشان الناس يتصرفوا بالطريقة الفلانية والنماذج كتيرة ما بتخفى عليكم .
في شكل من اشكال الرعاية السودانية للفنانيين ما بنلقاه في أي مكان يعني أنا مشيت فتشت لقيته كان في رعايا للفنانيين في مصر أي زول ما داير يشتغل في الإتحاد الاشتراكي بيضايقوه أو حتى يحاربوهو في عيشته وفي العراق عند صدام حسين كان في نموذج ذي دا وفي السنغال عند سنغور كان في نموذج ذي دا ودي كلها أشياء عندها علاقة بجيولوبتيك الفترة بتاعت ما بعد الاستقلال اللهي كانت الفترة بتاعت ما بعد الحرب الباردة والدول والأجهزة الحكومية الكانت الأنظمة كلها بتتصرف على سياسة التوازنات الكبيرة البتفرضها في الفترة دي ـ، لكن لحدي الليلة بنلقى إنه في دول في الخليج وفي السعودية في ناس رعاة للفن جدد إبتدوا يتصرفوا على اساس أنهم هم ورثة الرعاية الآيدلوجية الكانت موجودة عند صدام حسين مثلا لي الليلة بتلقى في الخليج في شيوخ وأمراء إبتدوا يعملوا متاحف ويدعوا لي تظاهرات فنية وبيدعوا للفن الإسلامي ومرة يقولوا ده الفن العربي وكده ومستمرة يعني لكن كل هولاء الناس الإكتشفوا رعاية الفنون مؤخراً ما إخترعوا شيء جديد أيام مايو كان في قوائم شرف لحدي الليلة الحاجات مكتوبة كان في الجرائد ، ما بتتمسح بتمشوا تلقو في كل مهرجان ناس النميري كانوا بيدوا الأنواط والجوائز النيشانات لعدد من الفنانين وكده ولو شفته بشكل عام الأسماء الكبيرة في حركة الفن والادب في السودان بتلقوا إنه معظم الفنانيين والأدباء المهمين إنه الناس ديل كانوا أفندية وبيشغلوا مناصب مهمة جدا كانوا وكلاء وزارات ومدراء وسفراء وكانوا ملحقين يعني هؤلاء الناس أنا ما داير أجيب اسماء بتكونوا عارفين انتوا براكم لكن هؤلاء الناس ساهموا في إنه تتأسس في السودان فكرة الفن الرسمي وهي فكرة مهمة جدا لأنه الدولة محتاجة للفن ومحتاجة تقول يا جماعة نحن ما دولة بتقمع الناس لكن نحنا عندنا محتوى حضاري وفني وأدبي وكده والدليل إنه فلان وفلان وفلان ديل معانا وإنهم بيجيبوا شعرهم وفنهم ونحنا بنديهم الأنواط والأوسمة ودأ في مواجهة الفن الرسمي البترعاه أجهزة الدولة ..بتكلم من تجربتي مع عدد من الأشحاص في جيلي يعني إنه نظرتهم لي الفنون إنهم عندهم حاجات لتنمية الفن السوداني اللي هو خليط من عناصر العروبة وعناصر الإفريقية وبعدين نقوم نمشي شوية نقرأ الجرايد ونسمع إنه في ناس دايرين يدخلوا الدم الأفريقي في الادب العربي في الشعر العربي ودايرين يعملوا تمازج بين الغابة والصحراء وترحيل نموذج سنّار على أساس سنار دي هي نموذج المجتمع الخلاسي في السودان وبيطرحوا ده كلو كنموذج للسودانيين بيقولوا ليهم يا جماعة تعالوا نحنا دايرين نعمل سنار جديدة او دايرين نعمل تماذج بين العناصر العربية والعناصر الافريقية المشكلة طبعاً في نوع الحجج الذي دي إنه الناس ديل بينسوا انو ما يسمى بالمجموعات العربية الموجودة في السودان هؤلاء هم عرب السودان هم أفارقة ، هم أفارقة ذيهم وذي أغاريق السودان وبيض جنوب أفريقيا وزي باقي الناس يعني إذا ما قبلنا بي حاجة ذي دي بعد داك بنمشي نفرز انت يا فلان جيت متين هنا وفي الآخر ممكن نلقى إنه إفريقيا دي ذاتها مافي زول بيقول أنا إفريقي يعني فكرة التمازج بين عناصر العروبة وعناصر الإسلام عشان يعملوا الفن في السودان هي فكرة غريبة جداً جداً لانوا الناس البيفتكروا إنه عناصر العروبة ديل ما سودانيين وما أفارقة ، الفكرة بتاعة تمازج العروبة والإسلام او الغابة والصحراء هي قائمة على فكرة التمازج بين ثقافتين وهي فكرة غريبة جدا الناس ديل بيفتكروا إنه في ثقافة قايمة بي هنا براها عربية صافية وثقافة إفريقية بي هنا صافية وإنه الثقافتين ديل بيقوموا يتمازجوا ويعملوا الكائن الخلاسي اللي هم بيحلموا بيه الناس ديل في سنار لأنوا مافي ثقافة صافية من الشوائب الثقافات اصلها هي كلها مختلطة وملخبطة ومافي زول بيقدر يقول انه هي الحتة الفلانية للحتة الفلانية هي الثقافة الفلانية ، المسألة كلها مدغمسة وملخبطة وفكرة إنه في ثقافة عربية و إنه في ناس بينتموا لي الثقافة العربية الخالصة هي فكرة عنصرية وفكرة ما عملية وما منطقية المشكلة طبعا إنه الناس ممكن تقول الأفكار الدايراها لكن المشكلة طبعا إنه على اساس هذه الأفكاربتقوم سياسة إنه الناس تتبنى فن معين وتتبنى فنانيين معينين وبعدين يستبعدوا الناس التانيين الفن والفنانيين التانيين الما بيدخلوا في الإطار دا. المشكلة التانية إنه على أساس المعطيات دي على أساس الغابة والصحراء لما طرحوا نموذج سنار كنموذج خلاسي لكل شعوب السودان نسوا او تناسوا إنه سنار كانت مجتمع مسلم ودولة مسلمة والسلطة في سنار هي سلطة مسلمة السودان لحدي الليلة ما كلهم مسلمين وفي ناس مسلمين وما كلهم عرب وماكلهم أفارقة يعني فكرة إنه الناس يقوموا يفرزوا الناس ذي بالشكل البدائي دا ما بتجوز مافيها أي ذكاء ومافيها أي خيال وما فيها معرفة بالواقع الحقيقي بتاع المجتمع السوداني على أساس الافكار الطرحوها هؤلاء الفنانيين وإتبنتها الدولة كسياسة رسمية في المهرجانات في خلال خطبها وسياستها الثقافية طرحت مسائل قضية مثلاً زي قضية الهوية إنه نحن شنو نحن عرب لا ما عرب نحن خلاسيين نحن شنو نحن مزيج من العرب والأفارقة وكده وابتدأ الكلام عن السودانوية وإبتدأ النقاش مع الطيب زين العابدين وأخدوها ناس تانيين بقو لما يتكلموا عن السودانوية مابجيهم شك إنه دي النظرية البتخلص السودانيين من كل المشاكل بتاعتهم، المشكلة إنه قضية الهوية هي قضية بالغة التعقيد وهي قضية لما الناس يشيلوها ويشتغلوا بيها في حتة العمل السياسي المباشر بتفشل لأنه العمل السياسي بيتم في مستوى الناس ما بيقبلوا فيه التعقيد بتاع الإمور لأنه الناس عندهم حاجة معينة شغالين فيها وفكرة إنه الناس يجي زول يقول ليهم نحن شغالين على مسألة الهوية وهويتنا كذا وكذا وكذا في تلاتة كلمات دي ما بتخارج زول .
|
|
 
|
|
|
|
|
| العنوان |
الكاتب |
Date |
| في محاورة أفكار حسن موسي المطروحة في ندوة فلادلفيا | Sinnary | 07-07-12, 05:04 AM |
| Re: في محاورة أفكار حسن موسي المطروحة في ندوة فلادلفيا | دينا خالد | 07-07-12, 06:37 AM |
| Re: في محاورة أفكار حسن موسي المطروحة في ندوة فلادلفيا | هيثم طه | 07-07-12, 10:13 AM |
| Re: في محاورة أفكار حسن موسي المطروحة في ندوة فلادلفيا | عبدالوهاب علي الحاج | 07-07-12, 11:53 AM |
| Re: في محاورة أفكار حسن موسي المطروحة في ندوة فلادلفيا | Sinnary | 07-07-12, 02:02 PM |
| Re: في محاورة أفكار حسن موسي المطروحة في ندوة فلادلفيا | Abdalla aidros | 07-07-12, 03:57 PM |
| Re: في محاورة أفكار حسن موسي المطروحة في ندوة فلادلفيا | Sinnary | 07-07-12, 05:21 PM |
| Re: في محاورة أفكار حسن موسي المطروحة في ندوة فلادلفيا | عبداللطيف حسن علي | 07-07-12, 05:55 PM |
| Re: في محاورة أفكار حسن موسي المطروحة في ندوة فلادلفيا | Sinnary | 07-08-12, 04:28 AM |
| Re: في محاورة أفكار حسن موسي المطروحة في ندوة فلادلفيا | Sinnary | 07-08-12, 04:30 AM |
| Re: في محاورة أفكار حسن موسي المطروحة في ندوة فلادلفيا | Sinnary | 07-08-12, 05:15 AM |
| Re: في محاورة أفكار حسن موسي المطروحة في ندوة فلادلفيا | محمد حيدر المشرف | 07-08-12, 05:23 AM |
| Re: في محاورة أفكار حسن موسي المطروحة في ندوة فلادلفيا | Sinnary | 07-08-12, 04:03 PM |
| Re: في محاورة أفكار حسن موسي المطروحة في ندوة فلادلفيا | Sinnary | 07-08-12, 04:04 PM |
| Re: في محاورة أفكار حسن موسي المطروحة في ندوة فلادلفيا | Sinnary | 07-08-12, 04:37 PM |
| Re: في محاورة أفكار حسن موسي المطروحة في ندوة فلادلفيا | Sinnary | 07-08-12, 06:56 PM |
| Re: في محاورة أفكار حسن موسي المطروحة في ندوة فلادلفيا | Sinnary | 07-08-12, 09:00 PM |
| Re: في محاورة أفكار حسن موسي المطروحة في ندوة فلادلفيا | Sinnary | 07-08-12, 09:05 PM |
| Re: في محاورة أفكار حسن موسي المطروحة في ندوة فلادلفيا | Sinnary | 07-09-12, 07:55 AM |
| Re: في محاورة أفكار حسن موسي المطروحة في ندوة فلادلفيا | Sinnary | 07-09-12, 07:21 PM |
| Re: في محاورة أفكار حسن موسي المطروحة في ندوة فلادلفيا | بدر الدين اسحاق احمد | 07-09-12, 10:27 PM |
| Re: في محاورة أفكار حسن موسي المطروحة في ندوة فلادلفيا | بدر الدين اسحاق احمد | 07-09-12, 10:27 PM |
| Re: في محاورة أفكار حسن موسي المطروحة في ندوة فلادلفيا | بدر الدين اسحاق احمد | 07-09-12, 10:27 PM |
| Re: في محاورة أفكار حسن موسي المطروحة في ندوة فلادلفيا | بدر الدين اسحاق احمد | 07-09-12, 10:27 PM |
| Re: في محاورة أفكار حسن موسي المطروحة في ندوة فلادلفيا | Sinnary | 07-10-12, 06:23 AM |
| Re: في محاورة أفكار حسن موسي المطروحة في ندوة فلادلفيا | Sinnary | 07-10-12, 06:24 AM |
| Re: في محاورة أفكار حسن موسي المطروحة في ندوة فلادلفيا | Kostawi | 07-10-12, 10:23 AM |
| Re: في محاورة أفكار حسن موسي المطروحة في ندوة فلادلفيا | Sinnary | 07-11-12, 07:59 AM |
| Re: في محاورة أفكار حسن موسي المطروحة في ندوة فلادلفيا | Sinnary | 07-12-12, 05:13 AM |
| Re: في محاورة أفكار حسن موسي المطروحة في ندوة فلادلفيا | Sinnary | 07-14-12, 08:57 AM |
| Re: في محاورة أفكار حسن موسي المطروحة في ندوة فلادلفيا | عوض محمد احمد | 08-22-12, 07:10 AM |
| Re: في محاورة أفكار حسن موسي المطروحة في ندوة فلادلفيا | بدر الدين اسحاق احمد | 08-22-12, 08:19 AM |
|
| |
Sinnary
فيس بوك
تويتر
انستقرام
يوتيوب
بنتيريست