(6) إمتداد الدرجة الثالثة.. ذلك الحي المتفرد

Quote: العذيذ دكتور طارق كيفك وكيف شبابنا المعاك ؟ عساكم كلكم طيبين ...بالامس ياطارق بحمدالله إنتهت دوره مراحيم مربع٣ وكما هو متوقع كان النهائي رائع كروعه اخوانا في اللجنه المنظمه الريس بابكر يوسف،كمال صالح،اسامه كوبلي،مجدي النعيم،احمد الرشيد وكل منىساهم في إنجاح هذا العمل منا لهم الف تحيه..التنظيم كان رهيب يادكتور شى صيوان وشى ساوند سيستم وحضور كبير جدا وتكريم لي أسر المراحيم وهدايا قيمه للفرق المتباريه...غايتو بس كان ناقصها حضوركم وشباب الامتداد في منبركم العامر..اما بخصوص المباراه النهائيه فذي ماانت عارف كان بين النجوم والمعلمين تستاهل بالجد تكون نهائي قوه ومهاره وحماس من الجانبين وكالعاده كانت الغلبه للمعلمين بهدف وحيد احرزه حافظ خليل-الزوول سكتني ياطارق-والله كاشح ليهو كوره من النص اظن القون ماشافها الا جوه الشبك،،في ناس حاقدين كده قالو صدفت معاهو ساي،،لكن والله قون سمح..الكوره في مجملها كان متكافئه رغم انو النجوم ضيعو قونين مضمونااات...اها بعد الكوره انتهت ناس النجوم قامو لي حركاتهم بتاعت الرابطه الذمااان ديك وقالو الا يدقو الحكم لكن العقلاء اتدخلو ومرت الليله بسلام..تم تسليم الكاس والميداليات في جو احتفالى بهيج كان نصيب الاسد في الاحتفال لي شباب مربع ٢ ساهرو للساعات الاولى من الصباح،،ناس النجوم مشو حردانين شويه قالو علي الاقل كان يدوهم كوره مع الميداليات الفضيه إلا انو بابكر قال الناس ديل كانو دايرين يدقو الحكم فكفاهم الفضه..هداف الدوره شال كاسو الفاضل من النجوم اما احسن لاعب فكانت من نصيب اشرف ابو صاحبو من سلام١١ ..فضل اقول ليك يادكتور شباب مربع ٢ والمعلمين اهدوا الكاس لارواح جميع مراحيم الدوره طمبل باي ،مدثر قطبي، صديق حمد ،هاشم الجص،عمر محمد نور،فتح الرحمن وشمس الدين عثمان،سامي العبيد،اسامه مبارك،متوكل جبريل والكوتش عبد الستار وكل من فاتني ذكر اسمه نسأل الله ان يتغمدهم جميعا بواسع رحمته. طبعا ذي ماوعدتك يادكتور مرسل ليك كميه صور اكيد فيها البتعرفهم والمابتعرفهم،،،طبعا بعتذر منكم لانو الكوالتي ما قاطعه بسبب الاضاءه الا إنها كفايه عشان تميز بيها الوجوه الطيبه دي. ختاما سلامي لك ولكل حبايبنا بالمنبر فردا فردا وإن كان لابد من تخصيص فسلامي ودعواتي للحبيب عماد محمود اقال الله عثرته..والله فاقدنك يا عماد شد حيلك تعال عشان تحصل دوره السنه الجايه وحاتك ربيع٣ بي وراكم رقد واطه ناس كوبلي غطسو حجرو تعالو الحقوهو يا عمده..شكرا دكتور طارق علي فتح باب التواصل ده ولنا عوده إنشاءالله لو فضل في العمر بقيه...سلام.