هيثم طه !!!

Quote: غايتو يا يوسف الطيب --صديقك دا لو ختا الكتابة بالصفحات ماعندو عووجة ! يعنى لو رحمنا بى سطرين بالكتير عشرة بنقدر نقول معاكم حاجه

-وبالذات في عالم الاسفير معظم الناس شكلهم دايرين (تيك اوي !) والمشكلة التانية الناس دائما بتضغط و تبل الزول من نقطة ضعفو زي الحاصل عليْ !!
لكن الحاجة الاساسية البتخليني اكتب مداخلة طويلة انو مثلا بلاحظ مرات التاني لامن يجي يحاورك ما بناقشك في
النقاط الواحد ذكرها لكن كمساجلة بخلي كلامك وبجيب كلام من عندو ! و في الحالة دي بكتب كلامي و بزيد عليهو (الارقيومنت ) الانا متوقعو منو ! (واصلا طريقة تفكيرنا مكشوفة ! و من ما اتخلقنا بنقول في نفس الكلام) !!وعشان اقفل عليهو السكة والحوار يمشي لقدام لو في حوار !- يعني مثلا انا لو قلت (الكيزان كعبين ) -التاني ممكن
يخلي كلامي و يقول لي (طيب الشيوعيين برضو كعبين) - زي كلامنا العادي كسودانيين !!وكدة الحوار ما عندو اي معني ! - و عشان اتحاشي الحتة دي اقوم اقول (الكيزان كعبين و بالتاكيد ما بقصد انو غيرهم او الشيوعيين كويسين لكن كدة و كدة) ! وبالطريقة دي انا قلت كلامي و كلام الاخر الانا متوقعو والمداخلة تبقي طويلة !! يعني ممكن تكون مرات المداخلة طويلة ببدهيات لكن الغرض هو المحاصرة !
والسبب التاني لطول المداخلة -لانو نحن غالبا بنجي نقرأ كلام الاخر بافكارنا(يعني نقوّلو
كلام ما قالو! ) ونضطر نجي راجعين تاني نشرح كلامنا وانو انا ما قلت كدة و ما قصدت كدة ---وأقوم عشان
الاخر ما يتبرع لي بفهم خاص من عندو بحاول اقفل عليهو السكة و بقصّر (الثغرات ) عشان فكرتي بالضبط
تصل ليهو وكدة اكون انا مسؤول تماما من الحاجة الوصلتو وأعاقب عليها بالقانون !!-ودي اكيد بتخلي المداخلة طويلة !

وفي النهاية مهما تكون تبريراتي-عارفها بتظل نقطة ضغف و ح اتبل بيها !
وحسع زاتو ما عارفك ح تقري المداخلة دي وألاّ لا

(عدل بواسطة هيثم طه on 06-04-2012, 11:31 PM)